អ្នកតាមដានបានអំពាវនាវឱ្យមានការរឹតបន្ដឹងច្បាប់និងចុះត្រួតពិនិត្យសំណង់អគារនីមួយៗ ដើម្បីធានាប្រព័ន្ធសុវត្ថិភាពក្នុងគ្រាអាសន្ន ជាពិសេសករណីអគ្គិភ័យ។ ការអំពាវនាវនេះ ក្រោយមានអគ្គិសនីឆេះស្លាប់មនុស្ស៨នាក់ក្នុងក្លឹបកម្សាន្ដមួយកន្លែងនៅរាជធានីភ្នំពេញ កាលពីថ្ងៃទី១ ខែកក្កដា ឆ្នាំ២០២៣។
ជនរងគ្រោះទាំង៨នាក់នោះ មានជនជាតិចិន៦នាក់ ខ្មែរ១នាក់ និងវៀតណាម១នាក់។ អគ្គិភ័យនេះបានកើតឡើងនៅក្នុងសង្កាត់ផ្សារដេប៉ូទី១ ខណ្ឌទួលគោក រាជធានីភ្នំពេញ។
លោក មាស នី អ្នកវិភាគបញ្ហាសង្គម លើកឡើងថានេះជាការធ្វេសប្រហែសមិនយកចិត្តទុកដាក់របស់រដ្ឋាភិបាល និងកម្រិតសមត្ថភាពរបស់មន្រ្ដីជំនាញក្នុងការគិតគូរចំពោះច្រកសុវត្ថិភាពតាមអគារខ្ពស់ៗសម្រាប់ករណីអាសន្ន។
លោកប្រាប់វីអូអេថា៖ «រីឯករណីនៃផ្លូវចេញ ច្រកចេញសម្រាប់គ្រាអាសន្ននេះ ខ្ញុំដូចជាឃើញក្រសួងពាក់ព័ន្ធ ពិសេសខាងសំណង់ដែនដីហ្នឹង ដូចជាមិនទាន់យកចិត្តទុកដាក់ពិនិត្យមើលអាហ្នឹងទេ។ អ៊ីចឹងទាល់តែមានឆេះម្ដងៗ ទាល់តែមានស្លាប់អ៊ីចឹង បានយើងចាប់ផ្ដើមមើល ប៉ុន្ដែមើលហើយមិនដឹងថានឹងមានសកម្មភាពអីនឹងត្រូវឆ្លើយតប ក្រៅពីរឿងគ្រាន់តែប្ដឹងទៅម្ចាស់សំណង់ ម្ចាស់រង្គសាល ក៏ប៉ុន្ដែសំណងដទៃទៀតតើមានត្រូវការចុះត្រួតពិនិត្យផ្លូវចេញ ច្រកចេញសម្រាប់ករណីដែលអាសន្នដែរឬអត់?»។
លោកយល់ថាខណៈសំណង់អគារខ្ពស់ៗកំពុងដុះដាលពេញទីក្រុងភ្នំពេញ ក្រសួងរៀបចំដែនដី នគរូបនីយកម្ម និងសំណង់ ត្រូវពន្លឿនចាត់វិធានការចុះត្រួតពិនិត្យ ដើម្បីធានានូវគុណភាពនៃការសាងសង់សំណង់អគារធំៗ ឱ្យត្រូវទៅតាមស្ដង់ដារ មានច្រកចេញចូលឱ្យបានគ្រប់ជ្រុងជ្រោយសម្រាប់គ្រាអាសន្ន ដើម្បីបង្ការមានការជាប់គាំងមនុស្សស្លាប់។
អ្នកវិភាគរូបនេះជំរុញឱ្យរដ្ឋាភិបាលអនុវត្តច្បាប់ឱ្យបានតឹងរ៉ឹង ជាពិសេសមន្រ្ដីជំនាញត្រូវពិនិត្យប្លង់សំណង់អគារ មុនអនុញ្ញាតឱ្យមានការសាងសង់។
លោកថ្លែងថា៖ «មានការទទួលខុសត្រូវខ្ពស់ទាំងម្ចាស់អគារ និងមន្រ្ដីជំនាញផ្នែកសំណង់ផងហ្នឹង បាទធ្វើម៉េចឱ្យច្បាប់ហ្នឹង ឱ្យបានតឹង ឬធ្វើម៉េចឱ្យបានMake sure ឬក៏ធ្វើឱ្យបានច្បាស់ថាផ្លូវច្រកចេញចូលពេលមានអាសន្ន គឺត្រូវតែមាននៅក្នុងអគារនីមួយៗ សូម្បីតែអគារហ្នឹងតែមួយជាន់ ឬពីរជាន់ក៏ដោយ»។
លោក យង់ គិមអេង ប្រធានមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍និងសន្តិភាពយល់ថាម្ចាស់ក្លឹបនីមួយៗត្រូវត្រួតពិនិត្យច្រកចេញចូលឱ្យបានត្រឹមត្រូវ និងបំពាក់នូវសម្ភារៈសុវត្ថិភាពឱ្យបានគ្រប់គ្រាន់ចៀសវាងមានហានិភ័យកើតឡើង ដែលអាចបង្កផលប៉ះពាល់ដល់ប្រជាពលរដ្ឋដែលនៅក្បែរខាង ភ្ញៀវដែលចូលកម្សាន្ដ ក៏ដូចជាផលប្រយោជន៍ម្ចាស់ក្លឹប។
លោកថ្លែងថា៖« អ្នកម្ចាស់ក្លឹបគួរតែមានបំពង់អគ្គិភ័យឱ្យបានគ្រប់គ្រាន់ដែលអាចធ្វើអន្ដរាគមន៍បានជាបឋម ទម្រាំទ្បានទឹកគេមកដល់។ បើមិនអ៊ីចឹងទេ បើអត់មានបំពង់អគ្គិភ័យ ឬបំពងអគ្គិភ័យតិចតួចពេក មិនគ្រប់គ្រាន់ គួរតែគិតពីរឿងបញ្ហាអស់ហ្នឹង។ អ៊ីចឹងខាងអគ្គិភ័យ ប៉ូលិសអគ្គិភ័យអាចចុះទៅវាយតម្លៃឱ្យគាត់ដែរថាក្លឹបរបស់គាត់មួយហ្នឹង គឺគួរប្រើបំពង់អគ្គិភ័យប៉ុន្មាន តើកន្លែងសុវត្ថិភាពសម្រាប់ពេលដែលអគ្គិភ័យកើតឡើងគួរតែទៅតាមផ្លូវណា ដើម្បីឱ្យងាយស្រួលគ្នាចាកចេញកុំឱ្យមានគ្រោះថ្នាក់»។
លោកបន្ដថាអាជ្ញាធរមន្រ្ដីពាក់ព័ន្ធត្រូវមានវិធានការផ្លូវច្បាប់ ចុះវាយតម្លៃកម្រិតស្ដង់ដារប្រព័ន្ធសុវត្ថិភាពក្នុងអគារ និងទីតាំងសាងសង់ក្លឹបកម្សាន្ដនីមួយៗ ដើម្បីបញ្ចៀសករណីមានឆ្លងចរន្តអគ្គិសនី ឬការឆាបឆេះនានា។
រដ្ឋលេខាធិការ និងជាអ្នកនាំពាក្យក្រសួងមហាផ្ទៃ លោក ខៀវ សុភ័គ ប្រាប់វីអូអេថាអាជ្ញាធរមានភារកិច្ចទទួលខុសត្រូវតែមួយផ្នែកប៉ុណ្ណោះ ដែលទាមទារឱ្យមានការសហការចូលរួមប្រុងប្រយ័ត្នបន្ថែមពីម្ចាស់អគារ។
លោកថ្លែងថា៖ «មកពីការធ្វេសប្រហែសសំខាន់ពីអ្នកគ្រប់គ្រងកន្លែងហ្នឹងឯង ឧទាហរណ៍ឆេះផ្ទះខ្ញុំអី ខ្ញុំមិនបន្ទោសអាជ្ញាធរ មកពីខ្ញុំប្រហែស ហើយអ្នកណាថាមកពីអាជ្ញាធរ បើឆេះផ្ទះខ្លួនឯង កុំបន្ទោសអាជ្ញាធរ មកពីខ្លួនឯងតភ្លើង តអីមិនច្បាស់លាស់ហ្នឹង»។
លោកបន្ដថាកន្លងមកអាជ្ញាធរក៏បានក្រើនរំឭកណែនាំប្រជាពលរដ្ឋ ក៏ដូចជាចុះពិនិត្យតាមសំណង់អគារនីមួយៗទៅលើការភ្ជាប់ចរន្តភ្លើងឱ្យស្របទៅតាមស្តង់ដាបច្ចេកទេសផងដែរ។
អ្នកនាំពាក្យរូបនេះស្នើឱ្យម្ចាស់អគារនីមួយៗ គួរមានសម្ភារៈពន្លត់អគ្គិភ័យឱ្យបានគ្រប់គ្រាន់ និងគោរពរតាមច្បាប់ស្ដីពីការសាងសង់អគារ។
វីអូអេមិនទាន់អាចសុំការអត្ថាធិប្បាយពីលោក សេង ឡូត អ្នកនាំពាក្យរបស់ក្រសួងរៀបចំដែនដី នគរូបនីយកម្ម និងសំណង់បាននៅឡើយទេ។
គួររំឭកថាកាលពីចុងឆ្នាំ២០២២ មានករណីឆេះសណ្ឋាគារ និងកាស៊ីណូនៅក្រុងប៉ោយប៉ែត ខេត្តបន្ទាយមានជ័យ សម្លាប់មនុស្សចំនួន២៦នាក់ ដែលភាគច្រើនជាជនជាតិថៃ៕
