ដោយយកលេសថាជាបញ្ហាសន្តិសុខជាតិ គណបក្សកុម្មុយនិស្តចិនកំពុងប្រើប្រាស់ច្បាប់សន្តិសុខដែលទើបត្រូវបានប្រកាសឲ្យប្រើកាលពីពេលថ្មីៗនេះ ដើម្បីការពារ និងពង្រីកការគ្រប់គ្រងអំណាចផ្ដាច់ការនិយមបក្សតែមួយ លើទីក្រុងហុងកុង ដែលជាអតីតដែនដីអាណានិគមរបស់ចក្រភពអង់គ្លេស។ នេះបើតាមការលើកឡើងរបស់ក្រុមអ្នកតាមដានស្ថានការណ៍។
តើអ្នកណាជាគោលដៅបន្ទាប់នៃការធ្វើទុក្ខបុកម្នេញផ្នែកនយោបាយរបស់គណបក្សកុម្មុយនិស្តចិន? អ្នកទាំងនោះគឺអ្នកគាំទ្រប្រជាធិបតេយ្យនៅក្នុងទីក្រុងហុងកុង និងសកម្មជនដែលមានគំនិតដូចក្រុមនេះ ដែលក្នុងនោះរួមមានទាំងអ្នកប្រកបវិជ្ជាជីវៈសារព័ត៌មាន ដែលរិះគន់រដ្ឋាភិបាលក្រុងប៉េកាំង និងគំរាមកំហែងខ្លាំងដល់អំណាចគ្រប់គ្រងរបស់គណបក្សកុម្មុយនិស្តចិននៅទីក្រុងហុងកុងផងដែរ។ នេះបើតាមការបញ្ជាក់របស់មេធាវីសិទ្ធិមនុស្សល្បីឈ្មោះមួយរូបនៅប្រទេសចិន ប្រាប់ VOA កាលពីពេលថ្មីៗនេះ។
មេធាវីរូបនេះបានជាប់ពន្ធនាគារបន្ទាប់ពីត្រូវបានផ្ដន្ទាទោសពីបទញុះញង់ឲ្យមានការធ្វើវិទ្ធង្សនាប្រឆាំងនឹងរដ្ឋ។
ផលប្រយោជន៍របស់បក្ស
មេធាវីរូបនេះ ដែលថ្លែងក្នុងលក្ខខណ្ឌមិនបញ្ចេញឈ្មោះដោយសារតែបញ្ហារសើបនេះ បាននិយាយថា៖ «វាមិនមែនសម្រាប់ប្រយោជន៍ជាតិនោះទេ ប៉ុន្តែវាសម្រាប់ប្រយោជន៍របស់របបកុម្មុយនិស្តច្រើនជាង ដែលគណបក្សកុម្មុយនិស្តចិនកំពុងការពារ»។
លោកបន្ថែមថា៖ «ដរាបណាអ្នកមិនយល់ស្របជាមួយរដ្ឋាភិបាលក្រុងប៉េកាំង មតិយោបល់របស់អ្នកអំពីកិច្ចការនៅទីក្រុងហុងកុងអាចនាំទៅដល់ការជាប់ពន្ធនាគារ»។
ក្រុមអ្នកគាំទ្រប្រជាធិបតេយ្យនៅទីក្រុងហុងកុងបានឈ្នះយ៉ាងភ្លូកទឹកភ្លូកដីនៅក្នុងការបោះឆ្នោតក្រុមប្រឹក្សាស្រុកកាលពីខែវិច្ឆិកា ឆ្នាំមុន ដែលនេះទំនងជាធ្វើឲ្យចុះខ្សោយដល់ការរំពឹងទុករបស់ក្រុមអ្នកគាំទ្ររដ្ឋាភិបាលក្រុងប៉េកាំងនៅក្នុងការបោះឆ្នោតសភានៅខែកញ្ញាខាងមុខ និងការបោះឆ្នោតជ្រើសរើសមេដឹកនាំទីក្រុងហុងកុងនៅឆ្នាំ ២០២២។
សេរីភាពក្នុងការបញ្ចេញមតិ?
លោក Zhang Xiaoming អនុប្រធានការិយាល័យកិច្ចការទីក្រុងហុងកុងនិងម៉ាកាវ បានបដិសេធថា ច្បាប់នេះមិនមែនធ្វើឡើងក្នុងគោលបំណងបំបិទមាត់អ្នកគាំទ្រប្រជាធិបតេយ្យនៅទីក្រុងហុងកុងនោះទេ។
ដោយលើកឡើងពីពាក្យសម្ដីរបស់អតីតមេដឹកនាំចិនលោក តេង ស៊ាវភីង ក្នុងពេលធ្វើសន្និសីទសារព័ត៌មានកាលពីពេលថ្មីៗនេះ លោក Zhang Xiaoming បានលើកឡើងអំពីរូបភាពជារួមនៃទិដ្ឋភាពនយោបាយនាពេលអនាគតសម្រាប់ទីក្រុងហុងកុង។
លោ Zhang Xiaomingបានថ្លែងយ៉ាងដូច្នេះថា៖ «ពួកអ្នកប្រឆាំងនៅតែអាចបញ្ចេញមតិផ្ទុយពីនេះបាន ដែលក្នុងនោះរួមមានទាំងមតិយោបល់ដែលរិះគន់រដ្ឋាភិបាលផងដែរ។ លោក តេង ស៊ាវភីង ធ្លាប់បាននិយាយថា បន្ទាប់ពីទីក្រុងហុងកុងត្រូវបានប្រគល់ជូនចិនវិញ ពលរដ្ឋក្នុងទីក្រុងនេះនឹងនៅតែអាចរិះគន់គណបក្សកុម្មុយនិស្ដចិនបាន ហើយនឹងមិនមានវិធានការអ្វីធ្វើឡើងប្រឆាំងនោះឡើយ»។
លោកបានបន្តថា៖ «ទីក្រុងហុងកុងមិនអាចក្លាយទៅជាមូលដ្ឋានសម្រាប់ចលនាប្រឆាំងនឹងប្រទេសចិនដោយឈរក្រោមស្លាកប្រជាធិបតេយ្យឡើយ។ នេះមានន័យថា នឹងមានព្រំដែនកំណត់សម្រាប់ការអនុវត្តគោលការណ៍ប្រទេសមួយប្រព័ន្ធពីរ»។
លោកបានបន្ថែមថា រដ្ឋាភិបាលក្រុងប៉េកាំងនឹងមិនអត់ធ្មត់ចំពោះអ្នកដែលមិនបានរក្សានូវព្រំដែនកំណត់នេះឡើយ។
ការបង្វែរចំណាប់អារម្មណ៍រឿងនយោបាយ
ខណៈដែលមានការរឹតបន្តឹងការគ្រប់គ្រងនៅទីក្រុងហុងកុង ច្បាប់សន្តិសុខថ្មីនេះក៏ដើរតួជាវិធីមួយសម្រាប់មេដឹកនាំចិនលោក Xi Jinping នៅក្នុងការបង្វែរចំណាប់អារម្មណ៍របស់ពលរដ្ឋចេញពីសម្ពាធនយោបាយនិងសេដ្ឋកិច្ចដែលចេះតែកើនឡើង ដែលលោកកំពុងប្រឈមទាំងនៅក្នុងប្រទេស និងនៅលើឆាកអន្តរជាតិ។ នេះបើតាមការបញ្ជាក់របស់អ្នកតាមដានស្ថានការណ៍។
លោក Wu Ruei-ren អ្នកសិក្សាស្រាវជ្រាវនៅបណ្ឌិត្យសភា Sinica ក្នុងទីក្រុងតៃប៉ិ កោះតៃវ៉ាន់ បាននិយាយថា លោកសង្ស័យថា រដ្ឋបាលរបស់លោក Xi Jinping បានប្រញាប់ប្រញាល់អនុម័តច្បាប់នេះតែក្នុងរយៈពេលមួយខែប៉ុណ្ណោះ បន្ទាប់ពីច្បាប់នេះត្រូវបានស្នើឡើងជាលើកដំបូង ហើយការធ្វើបែបនេះគឺដើម្បីបង្វែរចេញពីការឃ្លាំមើលលើការតស៊ូផ្នែកនយោបាយរបស់លោកផ្ទាល់។
លោក Wu កត់សម្គាល់ថា ការគ្រប់គ្រងរបស់លោក Xi Jinping ត្រូវបានលប់លើដោយការផ្ទុះឆ្លងរាលដាលឡើងវិញនៃជំងឺកូវីដ១៩ នៅទីក្រុងប៉េកាំង បញ្ហាប្រឈមផ្នែកសេដ្ឋកិច្ចនៅក្រោយវិបត្តិជំងឺកូវីដ១៩ ការរកឃើញថ្មីនៃជំងឺផ្ដាសាយជ្រូកប្រភេទថ្មីនៅក្នុងប្រទេសចិន ដែលអាចឆ្លងដល់មនុស្ស ក៏ដូចជាគ្រោះទឹកជំនន់ខ្លាំងក្លានៅភាគខាងត្បូងប្រទេសចិនផងដែរ។
លោក Wu បានប្រាប់ VOA ដូច្នេះថា៖ «នេះគឺជាយុទ្ធសាស្ត្រដែលគេប្រើជាញឹកញាប់ នៅពេលគេជួបបញ្ហាធំៗ។ នៅពេលមានវិបត្តិ អ្នកព្យាយាមបង្វែរចំណាប់អារម្មណ៍ពីរឿងខាងក្នុង ទៅរឿងខាងក្រៅ។ នេះគឺជាការបង្វែរចំណាប់អារម្មណ៍។ ខ្ញុំគិតថា លោក Xi Jinping កំពុងតែព្យាយាមបង្វែរចំណាប់អារម្មណ៍»។
ប៉ុន្តែលោក Wu និងមេធាវីដែលមិនបញ្ចេញឈ្មោះនោះ បាននិយាយថា ច្បាប់សន្តិសុខជាតិថ្មីដែលមាន ៦៦ មាត្រានេះ មិនត្រឹមតែត្រូវបានអនុម័តឡើងយ៉ាងតក់ក្រហល់ប៉ុណ្ណោះទេ ប៉ុន្តែវាថែមទាំងត្រូវបានតាក់តែងឡើងដោយមានខ្លឹមសារនិងការប្រើប្រាស់ពាក្យពេចន៍ដែលមាន «ភាពស្រពិចស្រពិលខ្លាំង និងធ្វើតាមតែការនឹកឃើញ» ថែមទៀតផង៕
