ប្រទេសបង់ក្លាដែសបានបញ្ជូនជនភៀសខ្លួន Rohingya រាប់សិបនាក់ដែលបានជាប់នៅសមុទ្រជាច្រើនថ្ងៃទៅកាន់កោះដែលងាយលិចទឹកមួយកន្លែងនៅឈូងសមុទ្របឹងហ្គាល (Bay of Bengal)។
ក្រុមមន្ត្រីនិយាយថា ជនភៀសខ្លួនទាំងនេះដោយរួមមានស្ត្រី១៥នាក់និងកុមារ៦នាក់ ត្រូវបានយកទៅកាន់កោះ Bhasan Char កាលពីថ្ងៃសៅរ៍។ ក្រុមនេះ ត្រូវគេគិតថាបានស្ថិតនៅក្នុងចំណោមជនភៀសខ្លួន Rohingya ៥០០នាក់ដែលបានជាប់នៅលើកប៉ាល់នេសាទចំនួន៥ ដែលត្រូវអាជ្ញាធរម៉ាឡេស៊ីឃាត់មិនឲ្យចូលដោយសារមានវិធានការបិទព្រំដែនដ៏តឹតតែងដោយសារការទប់ស្កាត់វីរុសកូរ៉ូណា។
ប្រទេសបង់ក្លាដែលបានកសាងជំរំមួយដែលអាចដាក់មនុស្សបាន១០០.០០០នាក់នៅលើកោះ Bhasan Char នៅក្នុងកិច្ចប្រឹងប្រែងមួយដើម្បីបន្ធូរបន្ថយសម្ពាធពីជំរំ Cox’s Bazar ដ៏ណែនណាន់តាន់តាប់នៅភាគខាងត្បូងប្រទេសបង់ក្លាដែស ដែលពេលថ្មីៗនេះមានជនភៀសខ្លួន Rohingya ១លាននាក់បានស្នាក់នៅ។ ប៉ុន្តែក្រុមមន្តីនិយាយមិនជនភៀសខ្លួនណាម្នាក់បានស្ម័គ្រចិត្តទៅជំរំថ្មីលើកោះនោះទេ។
ជនជាតិ Rohingya ដែលកំពុងរស់នៅជំរំ Cox’s Bazar បានរត់ភៀសខ្លួនឆ្លងព្រំដែនពីប្រទេសមីយាន់ម៉ាជាប់ខាងនោះ ដើម្បីរត់គេចពីយុទ្ធនាការដ៏ឃោរឃៅប្រឆាំងនឹងពូគគេពីសំណាក់យោធាមីយ៉ាន់ម៉ា ដែលអង្គការសហប្រជាជាតិបានពិពណ៌នាថាជាការបោសសម្អាតជាតិសាសន៍ ដោយក្នុងនោះមានសកម្មភាពចាប់រំលោភនិងដុតផ្ទះសម្បែងផង។ ប្រទេសមីយ៉ានម៉ាដែលភាគច្រើនកាន់ពុទ្ធសាសនា មិនចាត់ទុកជន Rohingya ជាពលរដ្ឋរបស់ខ្លួនឡើយបើទោះបីជាពួកគេបានរស់នៅក្នុងប្រទេសនេះអស់ជាច្រើនជំនាន់ក្តី។
មានជនភៀសខ្លួន Rohingya រាប់ពាន់នាក់បានព្យាយាមរត់គេចពីជំរំនៅបង់ក្លាដែសនេះតាមទូកដ៏ចង្អៀតដើម្បីឲ្យបានទៅដល់ប្រទេសម៉ាឡឹស៊ីឬប្រទេសថៃ៕
