គ្រូបង្រៀនជាង១២៥.០០០នាក់ក្នុងប្រទេសមីយ៉ាន់ម៉ា ត្រូវបានរដ្ឋអំណាចយោធាព្យួរការងារដោយសារពួកគេចូលរួមចលនាមិនស្តាប់បង្គាប់ស៊ីវិលមួយដើម្បីប្រឆាំងនឹងរដ្ឋប្រហារយោធាកាលពីខែកុម្ភៈ។ នេះបើតាមមន្រ្តីមួយរូបនៃសហព័ន្ធគ្រូបង្រៀនមីយ៉ាន់ម៉ា ហើយត្រូវបានទីភ្នាក់ងារព័ត៌មាន Reuters យកមកចុះផ្សាយ។
ការព្យួរការងារនេះ កើតមានឡើងប៉ុន្មានថ្ងៃប៉ុណ្ណោះ មុនបវេសនកាលឆ្នាំសិក្សាថ្មីដែលគ្រូបង្រៀន និងមាតាបិតាសិស្សមួយចំនួនកំពុងបន្តធ្វើពហិការក្នុងយុទ្ធនាការដែលបានធ្វើឱ្យប្រទេសស្ថិតក្នុងស្ថានភាពជាប់គាំងចាប់តាំងពីរដ្ឋប្រហារដែលបានបង្អាក់ដំណើរកំណែទម្រង់ប្រជាធិបតេយ្យក្នុងរយៈពេល១ទសវត្សរ៍នេះ។
គ្រូបង្រៀនសរុបទាំងអស់ចំនួន១២៥.៩០០រូប ត្រូវបានគេព្យួរការងារកាលពីពេលថ្មីៗនេះ នេះបើតាមសំដីមន្រ្តីមួយរូបនៃសហព័ន្ធគ្រូបង្រៀនដដែលនេះ ដែលបដិសេធមិនប្រាប់ឈ្មោះដោយហេតុភ័យខ្លាចមានការសងសឹក។ ឈ្មោះលោក ក៏ស្ថិតក្នុងបញ្ជីរបស់រដ្ឋាភិបាលយោធាដែលចោទលោកពីបទញុះញង់ឱ្យមានការស្អប់រដ្ឋាភិបាល។
ក្នុងរយៈពេល២ឆ្នាំចុងក្រោយនេះ មីយ៉ាន់ម៉ា មានគ្រូបង្រៀនសរុបចំនួន៤៣០.០០០នាក់ នេះបើយោងតាមស្ថិតិថ្មីបំផុត។
មន្ត្រីរូបនោះដែលជាគ្រូបង្រៀនដែរនោះ បាននិយាយថា៖
«ការព្យួរការងារបែបនេះ គឺក្នុងន័យគំរាមកំហែងមនុស្សឱ្យត្រឡប់ចូលមកធ្វើការវិញ។ ប្រសិនបើរដ្ឋាភិបាលពិតជាបណ្តេញគ្រូបង្រៀនដ៏ច្រើនបែបនេះមែន ប្រព័ន្ធទាំងមូលនឹងជាប់គាំង»។
លោកនិយាយបន្តទៀតថា មានគេប្រាប់លោកថា បទចោទប្រកាន់មកលើរូបលោកនឹងត្រូវគេទម្លាក់ចោល ប្រសិនបើលោក ត្រឡប់ចូលមកបម្រើការងារវិញ។
ទីភ្នាក់ងារសារព័ត៌មាន Reuters មិនអាចទាក់ទងអ្នកនាំពាក្យរដ្ឋាភិបាលយោធា ឬក្រសួងអប់រំដើម្បីបកស្រាយលើករណីនេះបានឡើយ។ កាសែតដែលគ្រប់គ្រងដោយរដ្ឋឈ្មោះ Global New Light of Myanmar បានអំពាវនាវឱ្យគ្រូបង្រៀន និងសិស្សទាំងអស់ត្រឡប់មកសាលារៀនវិញ ដើម្បីអាចឱ្យប្រព័ន្ធអប់រំអាចដំណើរការឡើងវិញបាន។
ភាពរអាក់រអួលដែលកើតមានតាមសាលារៀននេះ ក៏កើតមានដែរក្នុងវិស័យសុខាភិបាល និងស្ថាប័នរដ្ឋាភិបាល និងផ្នែកធុរកិច្ចឯកជនផងដែរ ចាប់តាំងពីប្រទេសនេះ ធ្លាក់ចូលក្នុងភាពចលាចលដោយសាររដ្ឋប្រហារ និងការចាប់ខ្លួនមេដឹកនាំជាប់ឆ្នោតលោកស្រី Aung San Suu Kyi។
តាមក្រុមគ្រូបង្រៀនបានបញ្ជាក់ថា បុគ្គលិកបម្រើការតាមសាកលវិទ្យាល័យប្រហែល១៩.៥០០ នាក់ ក៏ត្រូវបានគេព្យួរការងារដែរ។
ការចុះឈ្មោះចូលរៀនសម្រាប់ឆមាសថ្មីក្នុងខែមិថុនា បានធ្វើឡើងកាលពីពេលថ្មីៗនេះ ក៏ប៉ុន្តែមាតាបិតាសិស្ស បាននិយាយថា ពួកគេ មិនបញ្ជូនកូនៗទៅសាលារៀនទេ។
អ្នកស្រី Myint អាយុ៤២ឆ្នាំដែលមានកូនស្រីអាយុ១៤ឆ្នាំម្នាក់បាននិយាយថា៖
«ខ្ញុំ មិននាំកូនស្រីខ្ញុំទៅចុះឈ្មោះចូលរៀនទេ ខ្ញុំមិនចង់ឱ្យកូនស្រីខ្ញុំទទួលការអប់រំពីរដ្ឋាភិបាលយោធាផ្តាច់ការឡើយ។ ខ្ញុំក៏ព្រួយបារម្ភពីសុវត្ថិភាពរបស់នាងដែរ»។
សមាគមជួយអ្នកទោសនយោបាយភូមា បានបញ្ជាក់ថា និស្សិតដែលធ្វើការតវ៉ានៅជួរមុខជារៀងរាល់ថ្ងៃ ក៏បាននិយាយដែរថា ពួកគេនឹងធ្វើពិហិការមិនចូលរៀនផងដែរ។ ចាប់តាំងពីរដ្ឋប្រហារមក មនុស្សជាង៨០០នាក់ ត្រូវបានកងកម្លាំងសន្តិសុខសម្លាប់ ហើយមនុស្សជាង៤.២០០នាក់ផ្សេងទៀត ត្រូវបានគេចាប់ខ្លួន រងការចោទប្រកាន់ ឬត្រូវបានកាត់ទោស។
និស្សិត Lwin អាយុ១៨ឆ្នាំ និយាយថា៖
«ខ្ញុំត្រឡប់ចូលសាលារៀនវិញ លុះត្រាតែយើងទទួលបានរបបប្រជាធិបតេយ្យមកវិញ»។
ប្រព័ន្ធអប់រំរបស់ប្រទេសមីយ៉ាន់ម៉ា ស្ថិតក្នុងក្រុមកម្រិតទាបបំផុតក្នុងតំបន់ និងជាប់ចំណាត់ថ្នាក់ទី៩២ ក្នុងចំណោមប្រទេសទាំង៩៣ នៅក្នុងការស្ទង់មតិសាកលមួយកាលពីឆ្នាំមុន។
ទោះបីក្រោមការដឹកនាំរបស់លោកស្រី Suu Kyi ដែលបានខ្នះខ្នែងលើកស្ទួយវិស័យអប់រំក៏ដោយ ការចំណាយថវិកាជាតិលើវិស័យនេះ មានតិចជាង២ភាគរយនៃកំណើនផលិតផលក្នុងស្រុកសរុប (GDP)។ ខ្ទង់ចំណាយនេះ ជាអត្រាទាបបំផុតមួយក្នុងពិភពលោក នេះបើយោងតាមតួលេខរបស់ធនាគារពិភពលោក៕
ប្រែសម្រួលដោយលោក កោះ សុគន្ធី
