ក្រសួងសុខាភិបាលណែនាំឱ្យប្រជាពលរដ្ឋអនុវត្តវិធានការការពារជំងឺឆ្លងភ្នែកក្រហម ដើម្បីបញ្ចៀសការរាលដាលបន្តពីមនុស្សម្នាក់ទៅមនុស្សម្នាក់ទៀតចូលក្នុងសហគមន៍។
ក្នុងសេចក្តីប្រកាសព័ត៌មានរបស់ក្រសួងសុខាភិបាល ចេញនៅថ្ងៃទី១៩ ខែតុលា ឆ្នាំ២០២៣ ក្រសួងបញ្ជាក់ថា បើគិតត្រឹមថ្ងៃទី១៨ ខែតុលា ឆ្នាំ២០២៣នេះ ក្រសួងបានរកឃើញករណីជំងឺភ្នែកក្រហមកំពុងកើតឡើងថ្មីគួរឱ្យកត់សម្គាល់ ក្នុងបណ្ដាខេត្តមួយចំនួននៅកម្ពុជា។
សេចក្តីប្រកាសព័ត៌មានដដែលបញ្ជាក់ថា៖ «ក្នុងខណៈនេះក្រុមឆ្លើយតបបន្ទាន់របស់ក្រសួងសុខាភិបាល មន្ទីរសុខាភិបាល ស្រុកប្រតិបត្តិ មន្ទីរពេទ្យបង្អែក និងមណ្ឌលសុខភាព បានចុះអង្កេត ឆ្លើយតប តាមដាន ផ្តល់ការព្យាបាល និងអប់រំបង្ការការឆ្លងរាលដាល ដើម្បីទប់ស្កាត់ការឆ្លងបន្តក្នុងសហគមន៍»។
បើតាមក្រសួងសុខាភិបាល រោគសញ្ញាជំងឺឆ្លងភ្នែកក្រហមរួមមាន ភ្នែកឡើងពណ៌ផ្កាឈូក ឬពណ៌ក្រហមនៅផ្នែកសនៃភ្នែក ហើមត្របកភ្នែក រកាំភ្នែក ឬក្រហាយភ្នែក។ ជំងឺនេះបង្កឡើងដោយមូលហេតុធំៗពីរប្រភេទ គឺវីរុស និងបាក់តេរី ដែលអាចចម្លងពីមនុស្សម្នាក់ទៅមនុស្សម្នាក់ទៀតយ៉ាងងាយ និងឆាប់រហ័ស ប្រសិនបើបុគ្គលនោះមិនបានអនុវត្តអនាម័យឱ្យបានដិតដល់។
ជំងឺភ្នែកក្រហមដែលបង្កឡើងដោយវីរុស និងបាក់តេរីនេះ ភាគច្រើនជាករណីស្រាល ដែលអាចជាសះស្បើយក្នុងរយៈពេលខ្លី ចន្លោះពី៧ ទៅ ១៤ថ្ងៃ ដោយមិនមានផលវិបាកក្នុងរយៈពេលវែង។ យ៉ាងណាក្តី ករណីខ្លះអាចមានរយៈពេល ២ ទៅ ៣ សប្តាហ៍ ឬច្រើនជាងនេះ។
ក្រសួងសុខាភិបាលបន្ថែមដោយរំឭកដល់អ្នកដែលបានឆ្លងជំងឺភ្នែកក្រហម និងអ្នកមិនទាន់ឆ្លងជំងឺនេះឱ្យបន្តអនុវត្តការធ្វើអនាម័យដៃជាប្រចាំ ចៀសវាងយក ដៃដែលមិនបានលាងសម្អាតទៅប៉ះភ្នែក មិនត្រូវប្រើថ្នាំបន្តក់ភ្នែករួមគ្នា មិនប៉ះវត្ថុដែលអាចមានវីរុស ឬបាក់តេរីដែលអាចឆ្លង ហើយត្រូវរក្សាគម្លាតពីអ្នកដែលមានជំងឺភ្នែកក្រហមជាដើម៕
