ជនចំណាកស្រុកដែលត្រូវបានចាប់ខ្លួនពេលឆ្លងដែនខុសច្បាប់ពីម៉ិកស៊ិកចូលអាមេរិកក្នុងខែកុម្ភៈមានចំនួនស្មើឬជិតស្មើនឹងចំនួនតិចបំផុតប្រចាំខែ។ នេះបើយោងតាមសេចក្ដីរាយការណ៍របស់ទីភ្នាក់ងារសារព័ត៌មាន Reuters ដែលយោងលើអ្នកនាំពាក្យក្រសួងសន្តិសុខមាតុភូមិអាមេរិកនិងប្រភពពីរផ្សេងទៀត។
ទីភ្នាក់ងារល្បាតព្រំដែនអាមេរិកបានចាប់ខ្លួនជនចំណាកស្រុកប្រមាណ ៨.៥០០ នាក់នៅតាមព្រំដែនក្នុងខែកុម្ភៈ។ នេះបើយោងតាមអ្នកនាំពាក្យក្រសួងសន្តិសុខមាតុភូមិអាមេរិកអ្នកស្រី Tricia McLaughlin។ ប្រភពពីរទៀតថាចំនួនជនចំណាកស្រុកដែលត្រូវបានចាប់ខ្លួនសរុបក្នុងមួយខែនេះស្មើឬជិតស្មើនឹងចំនួនទាបបំផុត។
ប្រធានាធិបតីអាមេរិកលោក Donald Trump បានចាត់វិធានការមួយចំនួនដើម្បីកម្លារារាំងអន្តោប្រវេសន៍ខុសច្បាប់ ក្រោយពីលោកបានចូលកាន់តំណែងនៅថ្ងៃទី ២០ ខែមករាមក។ លោកបាននិយាយថាការបង្ក្រាបគឺចាំបាច់បន្ទាប់ពីមានការធ្វើចំណាកស្រុកយ៉ាងច្រើនចូលមកក្នុងសហរដ្ឋអាមេរិកក្រោមរដ្ឋបាលលោកអតីតប្រធានាធិបតី Joe Biden។
វិធានការរបស់លោក Trump រួមមានទាំងការអនុវត្តបម្រាមលើការស្នើសុំសិទ្ធិជ្រកកោននៅតាមព្រំដែននិងការបង្កើនចំនួនកងទ័ពដើម្បីជួយខាងសន្តិសុខព្រំដែនផងដែរ។
សហជីព American Civil Liberties បានប្តឹងរដ្ឋបាលលោក Trump ដោយសារបម្រាមនេះកាលពីដើមខែកុម្ភៈ ដោយលើកឡើងថាបម្រាមនេះបានរំលោភច្បាប់សុំសិទ្ធិជ្រកកោនរបស់អាមេរិកនិងសន្ធិសញ្ញាអន្តរជាតិនានា។
រដ្ឋបាលលោក Trump ក៏បានចុះកិច្ចព្រមព្រៀងថ្មីជាមួយម៉ិកស៊ិកនិងប្រទេសនានាក្នុងតំបន់អាមេរិកកណ្តាលផងដែរដើម្បីឲ្យប្រទេសទាំងនោះទទួលយកជនដែលអាមេរិកបណ្តេញចេញដែលមកពីប្រទេសផ្សេង ហើយអាមេរិកបានបញ្ជូនជនចំណាកស្រុកខ្លះទៅជំរំមួយនៅឆកសមុទ្រ Guantanamo ក្នុងប្រទេសគុយបារួចហើយ៕
