គណៈកម្មាធិការនីតិកម្មនៃរដ្ឋសភាត្រូវគេរំពឹងថា នឹងអនុម័តលើបទចោទប្រកាន់ប្រឆាំងនឹងប្រធានាធិបតីលោក Donald Trump នៅព្រឹកថ្ងៃព្រហស្បតិ៍នេះ ខណៈក្រុមសំឡេងភាគច្រើនខាងគណបក្សប្រជាធិបតេយ្យនៅរដ្ឋសភាកំពុងជំរុញឲ្យមានការដាក់ទោសទណ្ឌលើមេដឹកនាំរូបនេះ ដោយពួកគេបានចោទប្រកាន់ថា លោកបានបំពានអំណាចរបស់លោក ខណៈគណបក្សសាធារណរដ្ឋរិះគន់ថា ដំណើរការស៊ើបអង្កេតចោទប្រកាន់នេះគឺជាការជំរុញផ្នែកនយោបាយនិងគ្មានភស្តុតាងគ្រប់គ្រាន់។
កាលពីយប់ថ្ងៃពុធ គណៈកម្មាធិការបានជជែកដេញដោលគ្នាអំពីបទចោទប្រកាន់ ដែលបានចោទថា លោក Trump បានបំពានអំណាចរបស់លោកតាមរយៈការស្វែងរកជំនួយពីរដ្ឋាភិបាលបរទេសគឺប្រទេសអ៊ុយក្រែន ដើម្បីឲ្យចូលជ្រៀតជ្រែកនៅក្នុងការបោះឆ្នោតឆ្នាំ២០២០ និងការរារាំងដំណើរការស៊ើបអង្កេតរបស់សភា តាមរយៈការបញ្ជាឲ្យរដ្ឋបាលរបស់លោកព្រងើយកន្តើយនឹងដីកាកោះហៅរបស់រដ្ឋសភានៅក្នុងដំណើរការស៊ើបអង្កេតលើសកម្មភាពរបស់លោក។
ការជជែកដេញដោលនេះនឹងបន្តដល់ថ្ងៃព្រហស្បតិ៍នេះ មុននឹងគណកម្មាធិការរៀបចំការបោះឆ្នោតពេញអង្គមួយដើម្បីសម្រេចថាតើនឹងបញ្ជូនបទចោទទាំងនេះនៅព្រឹទ្ធសភាឬយ៉ាងណា។
លោក Trump បានបដិសេធថា លោកមិនបានធ្វើអ្វីខុសទេ។ លោកបាននិយាយសំដៅដល់កិច្ចពិភាក្សារបស់លោកជាមួយមេដឹកនាំប្រទេសអ៊ុយក្រែនលោក Volodymyr Zelenskiy ថាជា កិច្ចពិភាក្សាដ៏ល្អមួយ និងបាននិយាយទៀតថាទាំងសេចក្តីថ្លែងការរបស់លោក Zelenskiy និងក្រុមមន្រ្តីអ៊ុយក្រែនបានបញ្ជាក់ពីភាពស្អាតស្អំរបស់លោករួចហើយ៕
