ប្រធានាធិបតីកូរ៉េខាងត្បូងលោក Moon Jae-in បានជួបជាមួយនាយករដ្ឋមន្រ្តីជប៉ុន លោក Shinzo Abe កាលពីថ្ងៃសុក្រ ដើម្បីពិភាក្សាអំពីការរិះគន់ទៅលើកិច្ចព្រមព្រៀង«សងជំងឺចិត្តចំពោះស្រ្តីកំដរអារម្មណ៍» ដែលទទួលរងអំពើអយុត្តិធម៌នៅអំឡុងសង្គ្រាមលោកលើកទី២។
លោក Abe កំពុងស្ថិតនៅក្នុងប្រទេសកូរ៉េខាងត្បូងដើម្បីចូលរួមក្នុងពិធីបើកការប្រកួតកីឡាអូឡាំពិករដូវរងានៅក្នុងទៅក្រុងព្យូងឆាង។
លោក Moon ក៏បានប្រាប់ទៅលោក Abe ថា លោកសង្ឃឹមថាប្រទេសទាំងពីរ«អាចក្លាយជាមិត្តពិតប្រាកដជាមួយគ្នា»។ នៅស្របពេលជាមួយគ្នានោះលោក Moon បាននិយាយបន្ថែមទៀតថា លោកមានគម្រោង« រក្សាកិច្ចសហប្រតិបត្តិការទៅថ្ងៃអនាគត ខណៈកំពុងពិនិត្យមើលយ៉ាងហ្មត់ចត់អំពីអ្វីដែលបានកើតឡើងកាលពីអតីតកាល»។
កិច្ចព្រមព្រៀងសងជំងឺចិត្តដល់ស្រ្តី គឺសំដៅទៅលើស្រ្តីអាស៊ីជាង២សែននាក់ ដែលត្រូវបានបង្ខំឲ្យធ្វើជាស្រ្តីបម្រើផ្លូវភេទសម្រាប់ពួកទាហានជប៉ុន ក្នុងអំឡុងពេលសង្គ្រាមលោកលើកទី២។
កាលពីឆ្នាំ២០១៥កូរ៉េខាងត្បូង និងជប៉ុនបានព្រមព្រៀងគ្នា«លើដំណោះស្រាយសងជំងឺចិត្ត»ចំពោះស្រ្តីជនជាតិកូរ៉េទាំងអស់ដែលជាជនរងគ្រោះពីការបង្ខំឲ្យធ្វើជាទាសករផ្លូវភេទក្នុងអំឡុងពេលសង្គ្រាមលោកលើកទី២។
កិច្ចព្រមព្រៀងនេះមានរួមបញ្ជូលទាំងសេចក្តីថ្លែងការណ៍ប្រយ័ត្នប្រយែងរបស់នាយករដ្ឋមន្ត្រីជប៉ុនលោក Shinzo Abe ថ្លែង«សុំទោសនិងមានវិប្បដិសារី»ចំពោះ«បទពិសោធន៍ដ៏សែនឈឺចាប់ទាំងនេះ» និងការឧបត្តម្ភជាទឹកប្រាក់ចំនួន៨លានដុល្លារ ជាមូលនិធិសម្រាប់ជនរងគ្រោះ ដែលជាដំណោះស្រាយតាមច្បាប់និងនយោបាយចំពោះបញ្ហាធ្ងន់ធ្ងរនេះ៕
