ប្រទេសជប៉ុននិងកូរ៉េខាងត្បូងនៅថ្ងៃសុក្រនេះបានប្រកាសដាក់ទណ្ឌកម្មដាច់ដោយឡែកពីគ្នាលើក្រុមហ៊ុន នាវា និងបុគ្គលមួយចំនួន ដែលមានការពាក់ព័ន្ធក្នុងការផ្គត់ផ្គង់អាវុធរបស់កូរ៉េខាងជើងទៅឱ្យប្រទេសរុស៊្សី ដើម្បីប្រើប្រាស់ក្នុងសង្គ្រាមក្នុងប្រទេសអ៊ុយក្រែន ដែលជាការបំពានទៅនឹងសេចក្តីសម្រេចចិត្តរបស់អង្គការសហប្រជាជាតិ។ នេះបើតាមសេចក្តីរាយការណ៍របស់ទីភ្នាក់ងារព័ត៌មាន AFP ។
កូរ៉េខាងត្បូងបានចោទប្រកាន់រដ្ឋាភិបាលក្រុងព្យុងយ៉ាងថាបានបញ្ជូនគ្រាប់រំសេវជាច្រើនពាន់កុងតឺណឺ ទៅឱ្យប្រទេសរុស្ស៊ី ដោយក្រុមអ្នកជំនាញនិយាយថា ការបាញ់សាកល្បងអាវុធញឹកញាប់នាពេលថ្មីៗនេះរបស់កូរ៉េខាងជើង គឺក្នុងគោលបំណងសម្រាប់ទុកប្រើប្រាស់ក្នុងសមរភូមិក្នុងប្រទេសអ៊ុយក្រែន។
កាលពីខែសីហាឆ្នាំទៅ ក្រសួងហិរញ្ញវិត្ថុសហរដ្ឋអាមេរិកបានដាក់ទណ្ឌកម្មប្រហាក់ប្រហែលគ្នាដែរ ខណៈពេលដែលក្រសួងនេះនិយាយថា រុស្ស៊ីបានប្រើប្រាស់គ្រាប់រំសេវអស់ និងបានរងការបាត់បង់គ្រឿងបរិក្ខាយោធាធន់ធ្ងន់ជាច្រើនក្នុងប្រទេសអ៊ុយក្រែន ដោយបង្ខំឱ្យរដ្ឋាភិបាលក្រុងមូស្គូត្រូវងាកទៅពឹងពាក់ដល់ក្រុមសម្ពន្ធមិត្តរបស់ខ្លួនមួយចំនួនតូច ដែលក្នុងនោះក៏មានរដ្ឋាភិបាលក្រុងព្យុងយ៉ាងផងដែរ ដើម្បីឱ្យជួយគាំទ្រខ្លួន។
អ្នកនាំពាក្យរដ្ឋាភិបាលជប៉ុន លោក Yoshimasa Hayashi និយាយនៅថ្ងៃសុក្រថា ជប៉ុន «ថ្កោលទោសជាខ្លាំង» ដល់ការជួយគាំទ្រដែលត្រូវបានចោទប្រកាន់ទាំងនេះ។
លោកថ្លែងថា៖ «យើងបានសហការជាមួយសម្ព័ន្ធមិត្តដូចជាសហរដ្ឋអាមេរិកជាដើមដើម្បីបង្កកទ្រព្យសម្បត្តិដល់ក្រុមហ៊ុនចំនួន ១១ និងបុគ្គលមួយរូប ដែលបានពាក់ព័ន្ធនៅក្នុងការផ្តល់ជំនួយយោធារបស់កូរ៉េខាងជើងដល់រុស្ស៊ី។
លោកបន្ថែមទៀតថា៖ «វាជាការរំលោភបំពានទៅលើសេចក្តីសម្រេចចិត្តនានារបស់ក្រុមប្រឹក្សាសន្តិសុខអង្គការសហប្រជាជាតិ ដែលបានហាមប្រាមមិនឱ្យបញ្ជូនឬផ្ទេរអាវុធនិងសម្ភារៈពាក់ព័ន្ធផ្សេងៗរបស់កូរ៉េខាងជើងនោះឡើយ»។
កាសែត Asah iរបស់ជប៉ុនបានរាយការណ៍ថា មានក្រុមហ៊ុនចំនួន ៩ និងបុគ្គលមួយរូបស្ថិតនៅក្នុងប្រទេសរុស្ស៊ី ខណៈអង្គការពីរទៀតមានមូលដ្ឋានក្នុងប្រទេសស៊ីប ត្រូវបានចោទប្រកាន់ពីការជួយដឹកជញ្ជូនអាវុធពីប្រទេសកូរ៉េខាងជើង។
កូរ៉េខាងត្បូងនៅថ្ងៃសុក្រនេះផងដែរ បានដាក់ទណ្ឌកម្ម ២ លើនាវារុស្ស៊ីចំនួន ២ គ្រឿង និងនាវាកូរ៉េខាងជើងចំនួន ៧ គ្រឿង ដែលបានធ្វើសកម្មភាពក្នុងពេលកន្លងទៅ ដែលរួមមានការធ្វើពាណិជ្ជកម្មផ្គត់ផ្គង់ផ្នែកយោធារវាងទីក្រុងមូស្គូនិងទីក្រុងព្យុងយ៉ាង។
កាលពីខែមុន កូរ៉េខាងជើងបានអរគុណដល់រុស្ស៊ីដែលបានប្រើប្រាស់ការបោះឆ្នោតវ៉េតូរបស់ខ្លួននៅក្រុមប្រឹក្សាសន្តិសុខអង្គការសហប្រជាជាតិដើម្បីរាំងខ្ទប់ការបន្តអណត្តិក្រុមអ្នកជំនាញការមួយ ដែលត្រួតពិនិត្យមើលពីទណ្ឌកម្មអន្តរជាតិ ទៅលើរបបមេដឹកនាំលោក Kim Jong Un៕
វេទិកាបញ្ចេញមតិ