កងទ័ពអ៊ីស្រាអែលបានចាប់ផ្តើមការវាយប្រហារថ្មីមួយកាលពីថ្ងៃសុក្រចូលក្នុងទីក្រុង Khan Younisភាគខាងត្បូងតំបន់ហ្កាហ្សាដែលដៅលើពួកអ្នកប្រយុទ្ធក្រុមហាម៉ាស់ដែលយោធាអ៊ីស្រាអែលអះអាងថានៅប្រតិបត្តិការនៅទីនោះនៅឡើយ ថ្វីបើមានការវាយប្រហារម្តងហើយម្តងទៀតក៏ដោយ នៅពេលដែលអ្នកសម្រុះសម្រួលអាមេរិក កាតានិងអេហ្ស៊ីបបានបន្តជំរុញឱ្យអ៊ីស្រាអែលនិងក្រុមហាម៉ាស់ឈោងដល់កិច្ចព្រម ព្រៀងឈប់បាញ់គ្នាក៏ដោយ។ នេះបើតាមសេចក្តីរាយការណ៍របស់ទីភ្នាក់ងារសារព័ត៌មាន AP។
បទបញ្ជាជម្លៀសរបស់អ៊ីស្រាអែលបានធ្វើឱ្យជនជាតិប៉ាឡេស្ទីនដ៏ច្រើនសន្ធឹកសន្ធាប់មួយលើកទៀតចេញពីស្រុក Khan Younis នៅភាគខាងកើតដែលរងការបំផ្លិចបំផ្លាញយ៉ាងខ្លាំងជាទីកន្លែងដែលជនជាតិប៉ាឡេស្ទីនជាច្រើនទើបតែវិលត្រឡប់ទៅទីនោះមិនដល់២សប្តាហ៍ផង បន្ទាប់ពីការលុកលុយលើកចុងក្រោយរបស់អ៊ីស្រាអែលនៅក្នុងទីក្រុងនោះកាលពីខែកក្កដា។
មនុស្សរាប់ពាន់នាក់បានរត់គេចខ្លួនកាលពីថ្ងៃព្រហស្បតិ៍ ដោយបាននាំយកទៅជាមួយនួវរបស់របរចាំបាច់ដូចជាកំប៉ុងហ្គាសតូចៗ ពូក តង់ សាក់កាដូស្ពាយនិងភួយ។
ពួកមន្ត្រីមកពីអ៊ីស្រាអែលនិងសហរដ្ឋអាមេរិកនិយាយថាពួកគេជឿថាលោក Yahya Sinwar មេដឹកនាំកំពូលថ្មីដែលទើបតែងតាំងរបស់ក្រុមហាម៉ាស់និងជាអ្នករៀបចំម្នាក់នៃការវាយប្រហារថ្ងៃទី៧ តុលាលើអ៊ីស្រាអែល អាចកំពុងលាក់ខ្លួននៅក្រុង Khan Younis។
យោធាអ៊ីស្រាអែលបាននិយាយកាលពីថ្ងៃសុក្រថាយន្តហោះចំបាំងរបស់ខ្លួនបានវាយប្រហារទីដៅចំនួន៣០របស់ក្រុមហាម៉ាស់នៅក្នុងទីក្រុង រួមទាំងពួកអ្នកប្រយុទ្ធនិងទីកន្លែងស្តុកអាវុធផង។ យោធាអ៊ីស្រាអែលបាននិយាយទៀតថាពួកកងទ័ពបានស្វែងរករូងក្រោមដីរបស់ក្រុមហាម៉ាស់និងហេដ្ឋារចនាសម្ព័ន្ធផ្សេងទៀតខណៈដែលកំពុងប្រយុទ្ធ«នៅលើដីនិងក្រោមដី»។
បន្ទាប់ពីសង្គ្រាម១០ខែនៅក្នុងតំបន់ហ្កាហ្សា ការជំរុញរបស់ពួកអ្នកសម្រុះសម្រួលមានគោលបំណងដើម្បីបន្តការចរចាដោយប្រយោលឱ្យមានការឈប់បាញ់គ្នាមួយដែលបានត្រូវផ្អាកចាប់តាំងពីលោក Ismail Haniyeh អ្នកកាន់តំណែងមុនរបស់លោក Sinwar បានត្រូវគេធ្វើឃាតនៅក្នុងការផ្ទុះមួយដែលគេសន្មត់ថាធ្វើដោយសារអ៊ីស្រា អែលនៅក្នុងរដ្ឋធានីតេហេរ៉ងនៃប្រទេសអ៊ីរ៉ង់កាលពីថ្ងៃទី៣១ ខែកក្កដា។
ការិយាល័យរបស់នាយករដ្ឋមន្ត្រីអ៊ីស្រាអែលលោក Benjamin Netanyahu បានបញ្ជាក់កាលពីថ្ងៃព្រហស្បតិ៍ថាខ្លួននឹងបញ្ជូនពួកអ្នកចរចាទៅចរចាដែលពួកអ្នកសម្រុះសម្រួលបានអំពាវនាវឱ្យធ្វើឡើងនៅថ្ងៃទី១៥ ខែសីហា ដែលត្រូវធ្វើឡើងនៅរាជធានីដូហា នៃប្រទេសកាតាឬរដ្ឋធានីគែរនៃប្រទេសអេហ្ស៊ីប៕
