ទីភ្នាក់ងាររបស់អ.ស.ប.ខាងការឃ្លាំមើលនុយក្លេអ៊ែរនិយាយថាប្រទេសអ៊ីរ៉ង់បានចាប់ផ្តើមប្រើប្រាស់វត្ថុប្រកបដោយបច្ចេកទេសទំនើបឋក្រឡុកចម្រាញ់សារធាតុនុយក្លេអ៊ែរភាសាអង់គ្លេសហៅថាសង់ទ្រីហ្វុយ (centrifuge) ដើម្បីសម្រិតសម្រាំងសារធាតុអ៊ុយរ៉ាញូម ដែលជាការរំលោភលើកិច្ចព្រមព្រៀងសំខាន់មួយជាមួយពួកប្រទេសមហាអំណាចពិភពលោក។
របាយការណ៍មួយរបស់ទីភ្នាក់ងារថាមពលបរមាណូអន្តរជាតិដែលទីភ្នាក់ងារព័ត៌មានបារាំងនិងទីភា្នក់ងារព័ត៌មាន Reuters បានទទួលបាននិយាយថាសង់ទ្រីហ្វុយ (centrifuge)ប្រកបដោយបច្ចេកវិជ្ជាទំនើបនៅឯរោងចក្របរមាណូ Natanz នៃប្រទេសអ៊ីរ៉ង់ «បានផលិតឬបានត្រូវប្រុងប្រៀបសម្រាប់ផលិតនិងសម្រិតសម្រាំងសារធាតុអ៊ុយរ៉ាញូម»។
សេចក្តីរាយការណ៍នេះក៏បាននិយាយដែរថាប្រទេសអ៊ីរ៉ង់ចង់ប្រើសង់ទ្រីហ្វុយ (centrifuge) ទំនើបច្រើនជាងការលាតត្រដាងឱ្យដឹងពីពេលមុនៗ។
ព្រឹត្តិការណ៍នេះរំលោភលើកិច្ចព្រមព្រៀងសំខាន់មួយដែលបានសម្រេចជាមួយពួកប្រទេសមហាអំណាចកាលពីឆ្នាំ២០១៥ដែលបានកម្រិតកម្មវិធីនុយក្លេអ៊ែររបស់ប្រទេសអ៊ីរ៉ង់ជាថ្នូរនឹងការបន្ធូរបន្ថយការដាក់ទណ្ឌកម្មលើអ៊ីរ៉ង់។
កិច្ចព្រមព្រៀងនេះអនុញ្ញាតឱ្យប្រទេសអ៊ីរ៉ង់ស្តុកទុកតែសារធាតុអ៊ុយរ៉ាញូម សម្រិតសម្រាំងនៅក្នុងសង់ទ្រីហ្វុយ (centrifuge) ជំនាន់ទីមួយរបស់ផងខ្លួន។
របាយការណ៍នេះប្រមែប្រមូលឯកសារនៃការរំលោភមួយចំនួនកាលពីពេលថ្មីៗនេះដោយប្រទេសអ៊ីរ៉ង់លើកិច្ចព្រមព្រៀងនេះចាប់តាំងពីលោកប្រធានាធិបតី
ស.រ.អា. Donald Trump បានដកប្រទេសអាមេរិកចេញពីកិច្ចព្រមព្រៀងនេះកាលពីឆ្នាំ២០១៨ហើយដាក់កំហិតការដាក់ទណ្ឌកម្មជាថ្មី ដោយមានជំនឿថាប្រទេសអ៊ីរ៉ង់ធ្លាប់មានកម្មវិធីអាវុធនុយក្លេអ៊ែរដែលខ្លួនបានលុបចោល។
ប្រទេសនៅសេសសល់ដែលបានចុះហត្ថលេខាលើកិច្ចព្រមព្រៀងនេះគឺប្រទេសអង់គ្លេស ចិន បារាំង អាល្លឺម៉ង់និងប្រទេសរុស្សីបានខិតខំព្យាយាមរក្សាទុកកិច្ចព្រមព្រៀងនេះ៕
