យ៉ាងហោចណាស់មនុស្សចំនួន ៩៤ នាក់ ត្រូវបានចាប់ខ្លួនតាំងពីចុងខែកក្កដាពាក់ព័ន្ធនឹងការរិះគន់កិច្ចសហប្រតិបត្តិការតំបន់ត្រីកោណអភិវឌ្ឍន៍កម្ពុជា ឡាវ វៀតណាម CLV-DTA។ នេះបើយោងតាមក្រុមអង្គការឃ្លាំមើលសិទ្ធិមនុស្សអន្តរជាតិ។
បើតាមសេចក្តីថ្លែងការណ៍ចុះថ្ងៃទី ២៨ ខែសីហា ឆ្នាំ ២០២៤ អង្គការឃ្លាំមើលសិទ្ធិមនុស្ស (Human Rights Watch) និងអង្គការលើកលែងទោសអន្តរជាតិ (Amnesty International) បានជំរុញរដ្ឋាភិបាលកម្ពុជាឱ្យដោះលែងពួកគេទាំងនោះជាបន្ទាន់។
សេចក្តីថ្លែងការណ៍ដដែលបញ្ជាក់ថា៖ «យ៉ាងហោចណាស់មនុស្ស ៥៩ នាក់ក្នុងចំណោមអ្នកដែលត្រូវបានចាប់ខ្លួន ដែលរួមមានសកម្មជនបរិស្ថាន សិទ្ធិមនុស្ស និងសកម្មជនផ្សេងទៀត ព្រមទាំងកុមារមួយចំនួនទៀត នៅតែត្រូវបានឃុំខ្លួនដោយខុសច្បាប់ និងត្រូវបានចោទប្រកាន់ពីបទបង្ហាញទស្សនៈរបស់ពួកគេដោយសន្តិវិធី។ អាជ្ញាធរគួរតែទម្លាក់ចោលរាល់ការចោទប្រកាន់ភ្លាមៗ ដែលមិនមានការចោទប្រកាន់ពីអន្តរជាតិ»។
អ្នកស្រី Bryony Lau នាយិការងទទួលបន្ទុកតំបន់អាស៊ីនៃអង្គការឃ្លាំមើលសិទ្ធិមនុស្ស បាននិយាយនៅក្នុងសេចក្តីថ្លែងការណ៍ថា៖ «ការចាប់ខ្លួនសកម្មជនពាក់ព័ន្ធតំបន់ត្រីកោណអភិវឌ្ឍន៍ CLV យ៉ាងច្រើន គឺជាកិច្ចខិតខំប្រឹងប្រែងដោយចេតនា និងសម្របសម្រួលដោយអាជ្ញាធរកម្ពុជា ដើម្បីបំភិតបំភ័យអ្នករិះគន់ និងរារាំងពួកគេមិនឱ្យធ្វើបាតុកម្មនៅក្នុងទីក្រុងភ្នំពេញ ឬចែករំលែកទស្សនៈរបស់ពួកគេនៅលើប្រព័ន្ធផ្សព្វផ្សាយសង្គម»។ ការឃុំខ្លួន និងការចោទប្រកាន់ខុសទាំងនេះបង្ហាញពីការមិនគោរពសិទ្ធិពលរដ្ឋកម្ពុជា និងកាតព្វកិច្ចអន្តរជាតិរបស់លោកនាយករដ្ឋមន្ត្រី ហ៊ុន ម៉ាណែត»។
ចំណែកលោក Kate Schuetze នាយករងប្រចាំតំបន់អាស៊ីអាគ្នេយ៍ អាស៊ីបូព៌ា និងការិយាល័យតំបន់ប៉ាស៊ីហ្វិកនៃអង្គការលើកលែងទោសអន្តរជាតិ បានលើកឡើងដែរថា ការរឹតត្បិតតាមតែអំពើចិត្តលើសេរីភាពនៃការធ្វើបាតុកម្ម ការជួបជុំដោយសន្តិវិធី និងសេរីភាពនៃការបញ្ចេញមតិ មិនត្រូវបានចាត់ទុកជាសុចរិតភាពនៅក្រោមច្បាប់អន្តរជាតិនោះទេ។
លោកបន្ថែមថា៖ «ការបៀតបៀនសកម្មជន និងក្រុមគ្រួសាររបស់ពួកគេ គឺមិនអាចទទួលយកបានឡើយ។ ជារឿងគួរឲ្យព្រួយបារម្ភ ការឆ្លើយតបដ៏ធ្ងន់ដៃរបស់រដ្ឋាភិបាលកម្ពុជាបានធ្វើឱ្យយុវជន រួមទាំងកុមារមួយចំនួនត្រូវបានឃុំខ្លួនដោយខុសច្បាប់ និងត្រូវបានចោទប្រកាន់ពីបទឧក្រិដ្ឋកម្មធ្ងន់ធ្ងរប្រឆាំងនឹងរដ្ឋ។ ដៃគូរបស់កម្ពុជាគួរតែអំពាវនាវជាសាធារណៈ និងរួមគ្នាបញ្ចប់ការការរំលោភលើសេរីភាពនៃការបញ្ចេញមតិ និងការជួបប្រជុំដោយសន្តិវិធី»។
ក្នុងព្រឹត្តិការណ៍ទប់ស្កាត់ចលនាធ្វើបាតុកម្មប្រឆាំងគម្រោងតំបន់ត្រីកោណអភិវឌ្ឍន៍កម្ពុជា ឡាវ វៀតណាម CLV-DTA អាជ្ញាធរមានសមត្ថកិច្ចនៅរាជធានីភ្នំពេញបានចាប់ខ្លួនយុវជនបីនាក់ចំពោះការសង្ស័យថា បានប៉ុនប៉ងវាយប្រហារមកលើគេហទំព័រក្រសួង-ស្ថាប័នរដ្ឋាភិបាល និងបានចូលរួមសកម្មភាពគាំទ្របច្ចេកទេសក្នុងចលនាបំផុសបំផុលប្រឆាំងគម្រោងដ៏ចម្រូងចម្រាសនេះ។
ពលរដ្ឋជាង ៦០ នាក់ផ្សេងទៀតដែលជាសកម្មជនសង្គម បុគ្គលិកអង្គការក្រៅរដ្ឋាភិបាល និងសមាគមក៏ត្រូវបានចាប់ខ្លួនក្នុងព្រឹត្តិការណ៍នេះដែរ តែមានមួយចំនួនត្រូវដោះលែង ក្រោយធ្វើការសុំទោស និងធ្វើកិច្ចសន្យាជាមួយអាជ្ញាធរ។ នេះបើតាមក្រុមអ្នកការពារសិទ្ធិមនុស្សក្នុងស្រុក៕
វេទិកាបញ្ចេញមតិ