នាយករដ្ឋមន្រ្តីជប៉ុនលោក ស៊ីនហ្សូ អាបេ កាលពីសប្តាហ៍មុន បានធ្វើសុន្ទរកថាខួបនៃការចុះចាញ់របស់ជប៉ុនក្នុងសង្គ្រាមលោកលើកទី២ដោយការគោរពវិញ្ញាណក្ខន្ធនៅទីសក្ការបូជា Yasukuni ដែលមានជាប់ទាក់ទិននឹងឧក្រិដ្ឋជនសង្គ្រាម។ ការណ៍នេះ បានធ្វើឲ្យមានការរកាំចិត្តដល់មនុស្សជាច្រើននៅក្នុងប្រទេសកូរ៉េខាងត្បូង ដែលកំពុងប្រារព្ធពិធីដែលពួកគេចាត់ទុកជា «ថ្ងៃរំដោះ» ដោយមានការតវ៉ាជាបន្តបន្ទាប់ប្រឆាំងនឹងជប៉ុន។ បាតុកម្មនេះកើតមានឡើងនៅពេលដែលចំណងទាក់ទងរវាងកូរ៉េខាងត្បូងនិងជប៉ុនធ្លាក់ចុះដល់កម្រិតទាបបំផុតក្នុងប៉ុន្មានឆ្នាំថ្មីៗនេះ។ កោះ Liancourt Rocks ត្រូវបានត្រួតត្រាដោយកូរ៉េខាងត្បូង ក៏ប៉ុន្តែ ក៏ត្រូវបានទាមទារដោយជប៉ុនផងដែរ។
ក្រុមវង់ភ្លេងកុមារកូរ៉េខាងត្បូងចង់ឲ្យអ្នកដឹងថាតើពួកគេគិតថា ប្រជុំកោះតូចៗជារបស់នរណា។
មានសញ្ញាពីការតានតឹងខាងជាតិនិយមក្នុងប្រទេសកូរ៉េខាងត្បូង។ ជាពិសេស អារម្មណ៍ប្រឆាំងនឹងជប៉ុនដែលជាអតីតអ្នកត្រួតត្រាតាមបែបអាណានិគមលើប្រទេសកូរ៉េ។ ស្នាមរបួស អាចជារឿងចាស់ ក៏ប៉ុន្តែ ការឈឺចាប់សម្រាប់ជនជាតិកូរ៉េខ្លះនៅថ្មីៗនៅឡើយ។ លោកស្រី Lee Yong-ju អតីតស្រ្តីបម្រើផ្លូវភេទម្នាក់ បាននិយាយថា៖ «ខ្ញុំ មិនអាចអត់ឱនឲ្យពួកគេបានទេ»។ ប្រវត្តិសាស្រ្តនៃការធ្វើពលកម្មដោយការបង្ខំរបស់ជប៉ុន រួមមានការជញ្ជក់ប្រយោជន៍ពីអ្វីដែលហៅថា «ស្រ្តីបម្រើផ្លូវភេទ» នៅតែជាមូលហេតុនៃភាពតានតឹងនៅពេលសព្វថ្ងៃនេះ។ នាង Nam Dong-ju ជាអ្នកស្រុកកូរ៉េខាងត្បូងម្នាក់ និយាយថា៖ «ពួកគាត់ជាស្រ្តីដូចជាខ្ញុំដែរ។ ហើយ វាជាបញ្ហាដែលនៅមិនទាន់ដោះស្រាយបាននៅឡើយ»។
សិស្សសាលាអាយុ១៨ឆ្នាំម្នាក់ទៀតនៅក្រុងសេអ៊ូល និយាយថា៖ «ចំពោះបញ្ហាស្រ្តីបម្រើផ្លូវភេទ ខ្ញុំគិតថា កូរ៉េខាងត្បូង ត្រូវតែទទួលបានការសុំអភ័យទោសដ៏ត្រឹមត្រូវពីជប៉ុន»។
នាង Wang Se-hyun អាយុ១៨ឆ្នាំនិយាយថា៖ «ជប៉ុន មិនត្រឹមតែសងប្រាក់ជំងឺចិត្តប៉ុណ្ណោះទេ។ជប៉ុន ត្រូវតែសុំទោសដោយស្មោះត្រង់ទៀត»។
ជប៉ុនបានសុំអភ័យទោស ក៏ប៉ុន្តែ បាននិយាយថា ការទាមទារសំណងទាំងអស់ បានត្រូវដោះស្រាយនៅក្នុងសន្ធិសញ្ញាឆ្នាំ១៩៦៥។ ការទាមទារទាំងនេះជាការតានតឹងដ៏ខ្លាំងដែលត្រូវបានគេមើលឃើញថា រដ្ឋាភិបាលក្រុងសេអ៊ូលនិងរដ្ឋាភិបាលក្រុងតូក្យូ បានបន្ថយចំណងទាក់ទងខាងពាណិជ្ជកម្ម។
ក្នុងសុន្ទរកថាកាលពីពេលថ្មីៗនេះ ប្រធានាធិបតីកូរ៉េខាងត្បូងលោក មួន ជាអ៊ីន បានព្យាយាមបន្ធូរបន្ថយភាពតានតឹងនេះ ដោយនិយាយថា កូរ៉េខាងត្បូង នឹងធ្វើការជាមួយជប៉ុន ប្រសិនបើ ជប៉ុន ជ្រើសរើសការសន្ទនា។
ក៏ប៉ុន្តែ នៅក្នុងរដ្ឋធានីសេអ៊ូល មានការអំពាវនាវឲ្យបន្តធ្វើពហិការ។ ហើយនៅពេលដែលទំនាក់ទំនងរវាងសម្ព័ន្ធមិត្តទាំង២របស់សហរដ្ឋអាមេរិកកាន់តែអាក្រក់ឡើង អ្នកខ្លះបាននិយាយថា សហរដ្ឋអាមេរិក មិនបានធ្វើការងារគ្រប់គ្រាន់ដើម្បីជួយនោះទេ។ លោក Patrick Gerard Buchan នៃគម្រោង US Alliance របស់មជ្ឈមណ្ឌលសម្រាប់ការសិក្សាយុទ្ធសាស្រ្ត និងអន្តរជាតិ និយាយថា៖ «មិនមានការព្រួយកង្វល់អំពីបញ្ហានេះទេ ហើយជាការពិត នេះជាការធ្លាក់ចុះទាបបំផុតក្នុងរយៈពេល៧០ឆ្នាំនៃទំនាក់ទំនងរវាងមិត្តភក្តិរបស់យើងទាំងនៅក្នុងទីក្រុងសេអ៊ូលនិងទីក្រុងតូក្យូ»។
កាលពីពេលមុន ប្រធានាធិបតីសហរដ្ឋអាមេរិកលោកដូណាល់ ត្រាំ បានត្អូញត្អែរពីការផ្សះផ្សារវាងប្រទេសទាំង២ដែលនឹងចំណាយពេលវេលាច្រើន។ ក៏ប៉ុន្តែ គេ មិនទាន់ដឹងច្បាស់ថា តើប្រទេសណាទៀតអាចជួយបានទេ។ លោក Patrick Gerard Buchan នៃគម្រោង US Alliance របស់មជ្ឈមណ្ឌលសម្រាប់ការសិក្សាយុទ្ធសាស្ត្រនិងអន្តរជាតិ និយាយទៀតថា៖ «សហរដ្ឋអាមេរិក នៅតែជាដៃគូសម្ព័ន្ធមិត្តខ្លាំងបំផុត។ សហរដ្ឋអាមេរិកនៅតែមានតួនាទីសំខាន់នៅក្នុងបញ្ហានេះ»។
ក៏ប៉ុន្តែ រហូតមកទល់ពេលនេះ សហរដ្ឋអាមេរិក បានព្យាយាមសម្រុះសម្រួលជាសាធារណៈដោយបានទទួលលទ្ធផលតិចតួចជាង៕
ប្រែសម្រួលដោយជឹង ប៉ូជីន
