លោក ហ៊ុន សែន កាលពីព្រឹកថ្ងៃអង្គារនេះ បានបង្ហោះសារនៅលើហ្វេសប៊ុករបស់លោកថាលោកឆ្លងជំងឺកូវីដ១៩ នៅពេលលោកបានទៅចូលរួមកិច្ចប្រជុំកំពូលមេដឹកនាំនៃក្រុមប្រទេសដែលមានសេដ្ឋកិច្ចជឿនលឿនទាំង២០ ឬG20 នៅកោះបាលី នៃប្រទេសឥណ្ឌូណេស៊ី។ លោកបានទៅដល់ទីនោះកាលពីល្ងាចថ្ងៃចន្ទ។
ដោយសារឆ្លងកូវីដ១៩ លោក ហ៊ុន សែនបានលុបចោលការចូលរួមរបស់លោកក្នុងកិច្ចប្រជុំG20 និងកិច្ចសន្ទនាក្រៅផ្លូវការរបស់មេដឹកនាំ APEC នៅទីក្រុងបាងកកប្រទេសថៃ ដែលធ្វើឡើងនៅក្នុងសប្តាហ៍នេះ។ លោក ហ៊ុន សែន បានធ្វើដំណើរមកដល់ប្រទេសកម្ពុជាវិញ នៅវេលាម៉ោងជិត៧យប់។
បើតាមលោក ហ៊ុន សែន មុនធ្វើដំណើរចេញពីកម្ពុជា លោកបានធ្វើតេស្តរាល់ថ្ងៃ ពិសេសមុនពេលចេញដំណើរ ប៉ុន្តែលទ្ធផលឃើញថា មិនមានជំងឺកូវីដ១៩ នោះទេ។ លោកបានបង្ហោះសារលើហ្វេសប៊ុកថា៖ «ខ្ញុំមិនច្បាស់ថាមេរោគនេះមកនៅជាមួយខ្លួនខ្ញុំចាប់ពីពេលណាមកនោះឡើយ តែអ្វីដែលច្បាស់ពេលមកដល់ ពេទ្យឥណ្ឌូណេស៊ីយកសំណាកពេលល្ងាច លុះព្រឹកឡើងបញ្ជាក់ថា វិជ្ជមានកូវីដ១៩ ដែលយើងត្រូវតែទទួលស្គាល់ បើទោះជាក្នុងខ្លួនយើងមិនមានអាការៈចម្លែកក៏ដោយ»។
មុនធ្វើដំណើរទៅកោះបាលី លោក ហ៊ុន សែន បានជួបជាមួយព្រះចៅស៊ុលតង់នៃប្រទេសប្រ៊ុយណេ ដែលបានមកចូលរួមកិច្ចប្រជុំអាស៊ាន។ នៅពេលចាប់ដៃគ្នា លោក ហ៊ុន សែន បានពាក់ម៉ាសផងដែរ។
លោក ហ៊ុន សែន បានលើកឡើងបន្ថែមក្នុងសារតាមហ្វេសប៊ុកថាលោកមិនបានទៅចូលរួមបាយល្ងាចជាមួយប្រមុខរដ្ឋ ប្រមុខរដ្ឋាភិបាលមួយចំនួនដែលត្រូវបានរៀបចំដោយប្រធានាធិបតីបារាំង នៅកោះបាលី ដោយសារលោកបានទៅដល់យឺត។
កាលពីថ្ងៃទី១៣ ខែវិច្ឆិកា លោក ហ៊ុន សែន ដែលមានវ័យ៧០ឆ្នាំ បានប្រាប់ក្រុមអ្នកកាសែតដែលយកព័ត៌មានក្នុងសន្និសីទសារព័ត៌មាននៅវិមានសន្តិភាពថាលោកធ្វើការមួយរយៈនេះច្រើនម៉ោង ដែលមានរហូតទៅដល់ជាង១០ម៉ោងក៏មាន។
លោក ផៃ ស៊ីផាន អ្នកនាំពាក្យរដ្ឋាភិបាល ប្រាប់វីអូអេនៅព្រឹកថ្ងៃអង្គារនេះថា ប្រហែលជាលោកនាយករដ្ឋមន្ត្រីផ្តាសាយធំតែប៉ុណ្ណោះ ប៉ុន្តែលោកត្រូវតែគោរពតាមលទ្ធផលនៃការធ្វើតេស្ត។
លោកបញ្ជាក់ថា៖ «ចំពោះខ្ញុំវិញ ខ្ញុំយល់ឃើញថាជាជំងឺផ្តាសាយធំ ពីព្រោះជាបទពិសោធន៍របស់យើងហ្នឹង បន្ទាប់ពីចាក់ថ្នាំការពារហើយឱ្យតែជំងឺផ្តាសាយហ្នឹង វាឱ្យសញ្ញាថាកើតកូវីដណា៎ពីព្រោះលោកអស់កម្លាំងខ្លាំង។ ពេលឃើញថ្ងៃចុងក្រោយរបស់លោកហ្នឹង លោកលើកជើងដើរស្ទើរមិនចង់រួចហើយ»។
បើតាមលោក ផៃ ស៊ីផាន នៅក្នុងកិច្ចប្រជុំG20នោះ នឹងមានតំណាងរបស់កម្ពុជាចូលរួមជាធម្មតា បើទោះបីជាអវត្តមានលោកនាយករដ្ឋមន្ត្រី ហ៊ុន សែន ក៏ដោយ។
ប្រធានសមាគមគ្រូពេទ្យគុណធម៌កម្ពុជា លោក អ៊ូច វុទ្ធី យល់ឃើញថា នៅកម្ពុជា ការវាយលុករបស់ជំងឺកូវីដ១៩ ទំនងមិនកើតមានទៀតនោះទេ។ លោកបន្តថា ដោយសារ អាកាសធាតុកម្ពុជាមានការប្រែប្រួលមួយរយៈនេះ ទើបបណ្តាលឱ្យមនុស្សងាយឈឺផ្តាសាយធំ ដែលតែងតែសង្ស័យទៅលើជំងឺកូវីដ១៩នោះ។ លោកបន្ថែមថាមនុស្សចាស់គឺងាយឆ្លងខ្លាំងជាងគេបំផុត។
លោកថ្លែងថា៖ «បើសិនជាកូវីដវាយលុកមកស្រុកខ្មែរយើងដូចជាវាអស់ហើយ វាអត់មានទេ។ បើនិយាយវាជាស្ថានភាពនៃបងប្អូនវា ជាគ្រួសារវា ព្រោះអាហ្នឹងវាជាគ្រុនផ្តាសាយធំ ដូចគ្នាហើយលឿនណាស់គ្រុនផ្តាសាយធំហ្នឹង តែប្អូនឯងនៅជិតអ្នកណា ដែលឆឺតឆតៗ ប្អូនឯងឆ្លងភ្លាមណា៎»។
នៅពេលកម្ពុជាធ្វើជាម្ចាស់ផ្ទះនៃកិច្ចប្រជុំកំពូលអាស៊ាន លោកនាយករដ្ឋមន្ត្រី ហ៊ុន សែន បានជួបមេដឹកនាំមួយចំនួនក្នុងជំនួបទ្វេភាគី ក្នុងនោះរួមមានប្រធានាធិបតីសហរដ្ឋអាមេរិក នាយករដ្ឋមន្ត្រីកាណាដា ជប៉ុន ឥណ្ឌា និងអគ្គលេខាធិការអាស៊ានជាដើម។
បើតាមសេតវិមាន លោក Joe Biden ប្រធានាធិបតីសហរដ្ឋអាមេរិក បានធ្វើតេស្តកូវីដ ហើយលទ្ធផលបង្ហាញថា អវិជ្ជមាន គិតត្រឹមថ្ងៃអង្គារនេះ៕
