លោកនាយករដ្ឋមន្ត្រី ហ៊ុន សែន បានប្រាប់ក្រុមមន្ត្រីរដ្ឋាភិបាល ក្នុងពិធីសម្ពោធអគាររដ្ឋបាលរដ្ឋមួយក្នុងរាជធានីភ្នំពេញថា ការចាក់វ៉ាក់សាំងបង្ការជំងឺកូវីដ១៩ ដូសទីបួន នឹងត្រូវផ្តល់ជូនដល់បុគ្គលិកមន្ត្រីរាជការ និងកងកម្លាំងប្រដាប់អាវុធ ប្រមាណជា៥០ម៉ឺននាក់ ខណៈប្រទេសកម្ពុជា កំពុងខិតខំរក្សាលំនឹងកំណើនសេដ្ឋកិច្ច ដែលតាមការព្យាករណ៍ អាចនឹងកើនដល់៣ភាគរយ នៅឆ្នាំ២០២១នេះ។
នៅឯពិធីសម្ពោធដាក់ឲ្យប្រើប្រាស់អគាររដ្ឋបាលអគ្គនាយកដ្ឋានគយ និងរដ្ឋាករ ធ្វើឡើងនាថ្ងៃព្រហស្បតិ៍នេះ លោកហ៊ុន សែនថ្លែងថា មន្ត្រីបុគ្គលិករាជការជាគ្រូពេទ្យ គ្រូបង្រៀន គយ និងកងទ័ព ព្រមទាំងនគរបាល ដែលជាក្រុមខ្សែត្រៀមជួរមុខ អាចនឹងទទួលបានវ៉ាក់សាំងដូសទីបួននេះមុនគេ។
លោកលើកឡើងនៅចំពោះមុខក្រុមមន្ត្រីរដ្ឋាភិបាលជាន់ខ្ពស់ និងមន្ត្រីគយយ៉ាងដូច្នេះថា៖ «យើងចាក់បានសរុបជាងបីលាននាក់ ជាងបីលាននាក់ហើយ ជាមួយនឹងវ៉ាក់សាំងរបស់យើងនៅសល់ ដែលនឹងមកដល់ផង គឺប្រមាណជា១២លានដូសហើយស្រេច។ ប៉ុន្តែយើងត្រូវគិតគូដុសទីបួនសម្រាប់ខ្សែត្រៀមជួរមុខ ខ្សែត្រៀមជួរមុខ ខ្សែត្រៀមជួរមុខរបស់យើងមានប្រហែលជា...៥០ម៉ឺននាក់ប៉ុណ្ណឹង»។
ដំណាលគ្នានោះដែរ លោក ហ៊ុន សែន ថ្លែងរិះគន់បុគ្គលដែលបញ្ចេញយោបល់ពាក់ព័ន្ធនឹងបញ្ហាកូវីដ១៩ មួយចំនួនដែលមានលក្ខណៈញុះញង់ ហើយដែលត្រូវសមនឹងទទួលបានការនាំខ្លួនមកដាក់ក្នុងពន្ធនាគារ។
លោកថ្លែងយ៉ាងដូច្នេះថា៖ «ជីវិតវាសំខាន់ណាស់ អ្នកខ្លះនិយាយឡើង អត់គិតពីជីវិតទេ និយាយតែពីរឿង បញ្ចេញមតិ ចុះបើងាប់ទៅលោកឯងបញ្ចេញមតិអាម៉េច ខ្ញុំឆ្ងល់។ ខ្ញុំជួយលោកឯងឲ្យវារស់។ ហើយលោកឯងជេរខ្ញុំ ក៏ជេរទៅ មានអាណាគេថាអី ប៉ុន្តែបើជេរខុសទំនង អាហ្នឹងមានតែទៅមួយកន្លែង ទុកម្តុំហើយកុំឆ្ងល់ពេក»។
លោកបន្ថែមថា៖ «ជេរខុសរឿង ហើយជេរមានលក្ខណៈ ជាការញុះញង់ បង្កចលាចលអាហ្នឹង គឺវាត្រូវតែនៅមួយកន្លែង ព្រោះគេបង្កើតគុកមកគេមិនដែលយកអាអ្នកល្អទៅដាក់ទេ គេយកអាអ្នកខូច»។
ក្នុងឆ្នាំ២០២១នេះ មានសកម្មជនអតីតគណបក្សជំទាស់មួយចំនួន បានកំពុងបន្តជាប់ក្នុងពន្ធនាគារចំពោះការនិយាយស្តីរបស់ពួកគេ ពាក់ព័ន្ធនឹងជំងឺកូវីដ១៩ ហើយត្រូវចោទពីបទញុះញង់ និងកំពុងរង់ចាំការជម្រះទោស។
នាយករងទទួលបន្ទុកឃ្លំាមើលសិទ្ធិមនុស្សនៃអង្គការលីកាដូលោក អំ សំអាត សាទរចំពោះជោគជ័យរបស់រដ្ឋាភិបាលក្នុងការផ្តល់វ៉ាក់សាំងជូនប្រជាពលរដ្ឋទាំងដូសទី២ និងដូសទី៣ក្នុងចំនួនដ៏ច្រើនមួយគួរឲ្យសម្គាល់ នាំឲ្យកម្ពុជាស៊ឹងតែក្លាយជាប្រទេសនាំមុខគេមួយក្នុងតំបន់អាស៊ាន ពាក់ព័ន្ធនឹងការចាក់វ៉ាក់សាំងនេះ។
ទាក់ទិនបញ្ហាបញ្ចេញមតិអំពីការចាក់វ៉ាក់សាំងនេះ អ្នកការពារសិទ្ធិមនុស្សរូបនេះយល់ថា ប្រជាពលរដ្ឋខ្មែរមួយចំនួនខ្វះខាតព័ត៌មាន ជុំវិញការប្រើប្រាស់វ់ាក់សាំងប្រឆាំងនឹងការឆ្លងជំងឺកូវីដ១៩ ដែលធ្វើឲ្យការបញ្ចេញមតិខ្លះក្លាយជាដើមចមនៃការចោទប្រកាន់របស់តុលាការ។
«ចឹង អ្វីដែលសំខាន់ហ្នឹង គឺគ្រាន់តែថា អ្នកបញ្ចេញមតិ គឺគាត់ត្រូវតែថ្លឹងថ្លែងអំពីព័ត៌មានឲ្យបានគ្រប់គ្រាន់ ហើយធ្វើការបញ្ចេញមតិ បើសិនជារិះគន់ ធ្វើយ៉ាងម៉េចដើម្បីក្នុងន័យស្ថាបនា គឺវាមិនមានអ្វីដែលខុសនឹងច្បាប់ទេបាទ»។
ក្នុងពិធីសម្ពោធដាក់ឲ្យប្រើប្រាស់អគាររដ្ឋបាលអគ្គនាយកដ្ឋានគយ និងរដ្ឋាករដដែលនោះ លោកនាយករដ្ឋមន្ត្រីហ៊ុន សែនលើកឡើងទៀតថា ស្ថិតក្នុងស្ថានភាពនៃការរស់នៅជាមួយជំងឺកូវីដ១៩តាមគន្លងថ្មី គឺកម្ពុជាត្រូវបន្តប្រយុទ្ធជាមួយនឹងជំងឺកូវីដ១៩ ហើយស្របពេលជាមួយគ្នានោះ កម្ពុជា នឹងត្រូវអនុវត្តន៍យុទ្ធសាស្ត្រជំរុញកំណើនសេដ្ឋកិច្ចឡើងវិញផងដែរ៕
