លោកនាយករដ្ឋមន្ត្រី ហ៊ុន ម៉ាណែត កាលពីថ្ងៃពុធ បានព្រមានប្រើប្រាស់កម្លាំងការពារអធិបតេយ្យភាពកម្ពុជា បើភាគីថៃឈ្លានពានកម្ពុជា។ ការថ្លែងរបស់លោកហ៊ុន ម៉ាណែតបែបនេះ ធ្វើឡើងក្នុងពិធីចែកសញ្ញាបត្រមួយក្នុងទីក្រុងភ្នំពេញ នាថ្ងៃទី ១៩ ខែកុម្ភៈ ឆ្នាំ ២០២៥។
លោកនាយករដ្ឋមន្ត្រីរូបនេះថ្លែងថា៖ «កម្ពុជាក៏រក្សាសិទ្ធិនៅក្នុងការការពារខ្លួនគ្រប់មធ្យោបាយ រួមទាំងការប្រើប្រាស់កម្លាំងប្រដាប់អាវុធ បើសិនជាប្រទេសណាមួយហ៊ានប្រើប្រាស់កម្លាំងប្រដាប់អាវុធមកឈ្លានពានកម្ពុជា»។
លោក ហ៊ុន ម៉ាណែត ទទូចកុំឲ្យអ្នកជាតិនិយមយកនយោបាយមកឡូកឡំជាមួយការងារបច្ចេកទេស ដែលលោកថាអាចរុញស្ថានការណ៍ឲ្យកាន់តែស្មុគស្មាញថែមទៀត។
លោកបញ្ជាក់ថា៖ «ហើយខ្ញុំសុំយកឱកាសនេះបញ្ជូនសារទៅអ្នកនយោបាយទាំងអស់ទាំងខ្មែរ ទាំងថៃ សុំកុំយករឿងនយោបាយមកលូកលាន់នឹងកិច្ចការងារបច្ចេកទេសឲ្យសោះ ព្រោះអ្នកនយោបាយអត់ដឹងកិច្ចការងារបច្ចេកទេស ជាងអ្នកភូមិសាស្ត្រទេ ទុកឲ្យអ្នកបច្ចេកទេសគេធ្វើការ ដោះស្រាយតាមការងារបច្ចេកទេស រឿងព្រំដែនវាទាក់ទងនឹងបញ្ហាបច្ចេកទេសនិងច្បាប់អន្តរជាតិ ឲ្យគេប្រើមូលដ្ឋានហ្នឹងដើម្បីដោះស្រាយ។ យើងកុំទៅលោតហេហា នាំឲ្យវាយគ្នា»។
បើតាមលោក ហ៊ុន ម៉ាណែត ការវាយគ្នារវាងភាគីថៃនិងកម្ពុជា មិនចំណេញអ្វីឡើយ ហើយនាំឲ្យប្រជាជាតិទាំងពីរមើលមុខគ្នាមិនចំ។
កាលពីពេលថ្មីៗនេះ មានការប៉ះទង្គិចពាក្យសម្តីគ្នារវាងកងទ័ពកម្ពុជានិងកងទ័ពថៃនៅប្រាសាទតាមាន់ធំ ក្រោយទាហានកម្ពុជាច្រៀងបទភ្លេងជាតិនៅបរិវេណប្រាសាទ ប៉ុន្តែត្រូវបានភាគីថៃហាមឃាត់មិនឲ្យច្រៀង ដោយថា នៅលើទឹកដីថៃជាពិសេសនោះមានការគំរាមប្រើប្រាស់អាវុធទៀតផង។
ទីប្រឹក្សាគណបក្សកម្លាំងជាតិលោក រ៉ុង ឈុន ប្រាប់វីអូអេថា កម្ពុជាត្រូវតែការពារបូរណភាពទឹកដី និងអធិបតេយ្យភាពជាតិយ៉ាងយកចិត្តទុកដាក់ខ្ពស់បំផុត ក្នុងករណីភាគីអ្នកជិតខាងរំលោភបំពាន។
លោកថ្លែងថា៖ «អាហ្នឹងវាត្រូវតែចេញការពារ ការធានានូវអ្វីដែលជារបស់ខ្មែរយើង»។
បើតាមលោក រ៉ុង ឈុន អ្នកនយោបាយកម្ពុជាគួរតែតម្កល់ផលប្រយោជន៍ជាតិជាធំ ហើយផ្សះផ្សាគ្នា ជាពិសេសនោះលោកថាគួរតែដោះលែងអ្នកនយោបាយប្រឆាំងឲ្យមានសេរីភាពដើម្បីឲ្យពួកគេអាចបម្រើជាតិបាន៕
វេទិកាបញ្ចេញមតិ