លោកស្រី Carrie Lam មេដឹកនាំក្រុងហុងកុងបានផ្អាក កាលពីថ្ងៃសៅរ៍ នូវសេចក្តីព្រាងច្បាប់ដែលគ្មានប្រជាប្រិយភាពដែលនឹងអនុញ្ញាតឲ្យធ្វើបត្យាប័នទៅកាន់ចិនដីគោក បន្ទាប់ពីការតវ៉ាប្រឆាំងមួយសប្តាហ៍ធ្វើឲ្យកក្រើកទឹកដីតំបន់ស្វ័យភាពរបស់ចិន។
នៅឯសន្និសីទកាសែតគ្រោងទុកដ៏ប្រញាប់ប្រញាល់មួយ ដែលបានប្រកាសកាលពីថ្ងៃសៅរ៍ លោកស្រី Lam បានប្រាប់ពួកអ្នកយកព័ត៌មាននៅក្នុងបន្ទប់មួយថា រដ្ឋាភិបាល បានបញ្ឈប់ការងាររបស់ខ្លួនលើសេចក្តីព្រាងច្បាប់នោះ ដើម្បីឲ្យរដ្ឋាភិបាលអាចប្រមូលព័ត៌មានដែលផ្តល់មកវិញ។
លោកស្រី Lam បាននិយាយថា៖ «យើងមិនមានគោលបំណងកំណត់កាលបរិច្ឆេទសម្រាប់ការធ្វើការងារនេះទេហើយសន្យាថា រាយការណ៍និងពិគ្រោះយោបល់ជាមួយពួកសមាជិកគណៈកម្មការក្រុមប្រឹក្សាច្បាប់ស្តីពីសន្តិសុខ មុនពេលយើងសម្រេចថា នឹងត្រូវធ្វើវិធានការរអ្វីបន្ទាប់ទៀត។
កាសែត Sing Tao Daily បានរាយការណ៍ថា ការប្រកាសរបស់លោកស្រី Lam កើតមានឡើងមួយថ្ងៃ បន្ទាប់ពីមានសេចក្តីរាយការណ៍ថា លោកស្រី Lam បានជួបជាមួយមន្រ្តីជាន់ខ្ពស់ចិននៅក្នុងទីក្រុង Shenzhen។
លោកស្រីបាននិយាយទៀតថា លោកស្រីបានធ្វើការសម្រេច បន្ទាប់ពីការតវ៉ាប្រឆាំងដ៏ធំមួយកាលពីថ្ងៃអាទិត្យ និងថ្ងៃពុធ ក៏ប៉ុន្តែបានបន្តធ្វើការពិភាក្សាចំណុចសំខាន់ៗ ដែលសាធារណជនមិនបានយល់ថា តើសេចក្តីព្រាងច្បាប់នោះល្អ យ៉ាងណាទេ។
លោកស្រីបាននិយាយថា៖ «ខ្ញុំសូមសារភាពថា ការងារពន្យល់និងការតាំងចិត្តរបស់យើងមិនមានប្រសិទ្ធិភាពទេ»៕
