ក្រសួងសុខាភិបាលកម្ពុជាបានលើកឡើងថា ករណីជំងឺផ្តាសាយបក្សី H5N1 ដែលបានកើតឡើងនៅក្នុងខេត្តព្រៃវែង មិនមែនជាការឆ្លងពីមនុស្សទៅមនុស្សឡើយ។ នេះបើតាមសេចក្តីប្រកាសព័ត៌មានរបស់ក្រសួងសុខាភិបាល ចេញផ្សាយកាលពីថ្ងៃព្រហស្បតិ៍ ទី ២ ខែមីនា។
សេចក្តីប្រកាសព័ត៌មាននោះបានឱ្យដឹងថា៖ «ក្រសួងសុខាភិបាលច្រានចោលទាំងស្រុងនូវការចេញផ្សាយព័ត៌មានមិនត្រឹមត្រូវ និងមិនពិត បែបប្រឌិត ស្តីពីករណីជំងឺផ្តាសាយបក្សី H5N1ដែលបានរកឃើញនៅខេត្តព្រៃវែង នាពេលកន្លងទៅនេះថា ករណីឆ្លងពីមនុស្សទៅមនុស្ស»។
ក្រសួងសុខាភិបាលបន្ថែមថា គិតត្រឹមថ្ងៃទី ២ ខែមីនា ឆ្នាំ ២០២៣ ក្រសួងបានរកឃើញករណីជំងឺផ្តាសាយបក្សី H5N1ចំនួនពីរករណីតែប៉ុណ្ណោះ នៅភូមិរលាំង ឃុំរំលេច ស្រុកស៊ីធរកណ្តាល ខេត្តព្រៃវែង ដែលកុមារីអាយុ ១១ ឆ្នាំម្នាក់ បានស្លាប់ ហើយឪពុកកុមារីនោះបានជាសះស្បើយ និងបានចេញពីមន្ទីររួចហើយ។ ក្រសួងសុខាភិបាលបានសន្និដ្ឋានថា ករណីវិជ្ជមានផ្តាសាយបក្សី H5N1 ពីរនាក់ឪពុកកូននេះ គឺជាករណីដែលឆ្លងពីសត្វបក្សីមកមនុស្ស ហើយមិនមែនជាការចម្លងពីមនុស្សទៅមនុស្សឡើយ។
ក្រសួងក៏បានអំពាវនាវឱ្យសាធារណជន ព្រមទាំងអ្នកសារព័ត៌មានទាំងអស់ កែតម្រូវ និងទទួលខុសត្រូវនូវរាល់ការផ្សាយព័ត៌មានរបស់ខ្លួន ចៀសវាងការប្រឌិត ឬមិនត្រឹមត្រូវ។
គួរបញ្ជាក់ថា ជំងឺផ្តាសាយបក្សី H5N1 គឺជាជំងឺឆ្លងក្នុងចំណោមពពួកបក្សី ឬសត្វស្លាប តែអាចមានការឆ្លងជំងឺនេះមកលើមនុស្ស ហើយអាចបង្កជាជំងឺធ្ងន់ធ្ងរ និងមានអត្រាស្លាប់ខ្ពស់។ នេះបើតាមអង្គការសុខភាពពិភពលោក។
ក្រសួងសុខាភិបាលកម្ពុជាឲ្យដឹងថា ជំងឺផ្តាសាយបក្សីនេះចាប់ផ្តើមកើតមាននៅក្នុងប្រទេសកម្ពុជា តាំងពីឆ្នាំ ២០០៥ ដោយមានអ្នកឆ្លងជំងឺនេះសរុបចំនួន ៥៧ នាក់ ក្នុងនោះ ៣៨ នាក់បានស្លាប់៕
