លោកប្រធានាធិបតីស.រ.អាបារ៉ាក់ អូបាម៉ា នឹងរៀបចំសន្និសីទកំពូលរបស់រដ្ឋទាំង៦ដែលដឹកនាំពួកនិកាយស៊ុននីនៃក្រុមប្រឹក្សាកិច្ចសហប្រតិបត្តិការតំបន់ឈូងសមុទ្រពែកស៍នៅសប្តាហ៍ក្រោយ ដែលត្រូវគេរំពឹងថានឹងផ្តោតលើកិច្ចខិតខំប្រឹងប្រែងដើម្បីឈានទៅដល់កិច្ចព្រមព្រៀងនុយក្លេអ៊ែជាមួយប្រទេសអ៊ីរ៉ង់ និងការពាក់ព័ន្ធរបស់រដ្ឋាភិបាលទីក្រុង Tehran នៅក្នុងជម្លោះចាប់តាំងពីប្រទេសយេម៉ែនរហូតដល់ប្រទេសស៊ីរី។
ចំពោះមេដឹកនាំនៃបណ្តាប្រទេសក្នុងឈូងសមុទ្រពែកស៍ ទិដ្ឋភាពនៃក្រុមឧទ្ទាម Houthi ដែលគាំទ្រដោយប្រទេសអ៊ីរ៉ង់ដែលកំពុងកាន់កាប់រដ្ឋធានី Sanaa នៃប្រទេសយ៉េម៉ែន និងការបណ្តេញរដ្ឋាភិបាលដែលគាំទ្រដោយស.រ.អាចេញពីតំណែងនៅឆ្នាំនេះ ជាសញ្ញានៃការកើនឡើងនៃការគម្រាមកំហែងពីប្រទេសអ៊ីរ៉ង់ ហើយពួកគេ ចូលរួមក្នុងសន្និសីទកំពូលនេះ ដើម្បីស្វះស្វែងរកការធានាសារជាថ្មីឡើងវិញនូវការគាំទ្ររបស់ស.រ.អា។
ការជជែកឲ្យហេតុរបស់លោកប្រធានាធិបតីអូបាម៉ាគឺថា ការចរចាកិច្ចព្រមព្រៀងនុយក្លេអ៊ែជាមួយអ៊ីរ៉ង់មានន័យថា ជាសន្និសុខសម្រាប់ប្រទេសទាំងនោះ។
លោកប្រធានាធិបតីអូបាម៉ា មានប្រសាសន៍ថា «ខ្ញុំជឿជាក់ថា ប្រសិនបើគម្រោងនេះនាំទៅកាន់កិច្ចព្រមព្រៀងផ្តាច់ព្រ័ត្រ និងទូលំទូលាយមួយកិច្ចព្រមព្រៀងនោះនឹងធ្វើឲ្យប្រទេសរបស់យើង សម្ព័ន្ធមិត្តរបស់យើង និងពិភពលោករបស់យើង មានសុវត្ថិភាពកាន់តែខ្លាំងឡើង។ ក៏ប៉ុន្តែ ដៃគូរបស់អាមេរិកក្នុងតំបន់ឈូងសមុទ្រពែកស៍ មិនមានការប្រាកដប្រជាទេ។
លោក Yousef al-Otaiba ឯកអគ្គរដ្ឋទូតប្រទេសអារ៉ាប់រួម ប្រចាំនៅស.រ.អា និយាយថា ពួកមេដឹកនាំតំបន់ឈូងសមុទ្រពែកស៍ ចង់ធ្វើឲ្យប្រសើរឡើងនូវទំនាក់ទំនងខាងសន្តិសុខរបស់ខ្លួនជាមួយរដ្ឋាភិបាលទីក្រុងវ៉ាស៊ីនតោន។
លោកនិយាយទៀតថា «យើងកំពុងស្វែងរកការធានាខាងសន្តិសុខ ចំពោះអាកប្បកិរិយារបស់អ៊ីរ៉ង់ និងចំពោះការរើបឡើងនៃការគម្រាមកំហែងរបស់ពួកជ្រុលនិយម។ យើងប្រាកដចង់បានទំនាក់ទំនងកាន់តែខ្លាំងឡើង។ កាលពីអតីតកាល យើងបានស្ថិតស្ថេរគង់វង្ស ដោយសារកិច្ចព្រមព្រៀងជាមួយស.រ.អាអំពីសន្តិសុខ។ ខ្ញុំគិតថា នៅពេលសព្វថ្ងៃនេះ យើងត្រូវការអ្វីជាលាយលក្ខណ៍អក្សរ ហើយយើងត្រូវការអ្វីដែលជាស្ថាប័ន។
ខណៈដែលគ្មានសន្ធិសញ្ញានឹងត្រូវចុះហត្ថលេខា លោកប្រធានាធិបតីអូបាម៉ា មានផែនការធ្វើការពិភាក្សាជាមួយពួកមេដឹកនាំឈូងសមុទ្រពែកស៍អំពីការស្ថាបនាសមត្ថភាពខាងវិស័យការពារប្រទេសរបស់ពួកគេ។ គេរំពឹងថា នឹងមានការបង្កើននូវការលក់ដូរអាវុធ បង្កើតប្រព័ន្ធការពារក្នុងតំបន់ប្រឆាំងនឹងការគម្រាមកំហែងពីកាំជ្រួចមីស៊ីលរបស់អ៊ីរ៉ង់ និងការចូលរួមសមយុទ្ធខាងយោធា៕
