ប្រទេសក្វាតេម៉ាឡានឹងទទួលយកពលរដ្ឋនៃបណ្ដាប្រទេសនៅតំបន់អាមេរិកកណ្ដាលណាដែលត្រូវបានបញ្ជូនចេញពីសហរដ្ឋអាមេរិក។ នេះបើយោងតាមសេចក្ដីរាយការណ៍របស់ទីភ្នាក់ងារសារព័ត៌មាន Reuters ដែលយោងលើប្រភព ៣ ដែលដឹងអំពីរឿងនេះ។ ការបញ្ជាក់របស់ប្រទេសក្វាតេម៉ាឡានេះបានធ្វើឡើងនៅពេលដែលប្រទេសនេះមានបំណងកសាងទំនាក់ទំនងវិជ្ជមានជាមួយនឹងលោក Donald Trump ដែលនឹងចូលកាន់តំណែងជាប្រធានាធិបតីអាមេរិកនៅថ្ងៃទី ២០ ខែមករាខាងមុខ។
មន្ត្រីក្វាតេម៉ាឡាម្នាក់បាននិយាយក្នុងលក្ខខណ្ឌមិនបញ្ចេញឈ្មោះថា៖ «ចាំបាច់ត្រូវមានការឆ្លើយតបថ្នាក់តំបន់។ ហើយយើងចង់ធ្វើជាផ្នែកមួយនៃដំណោះស្រាយនេះ»។
សហរដ្ឋអាមេរិកមានការលំបាកក្នុងការបញ្ជូនចេញនូវពលរដ្ឋមកពីប្រទេសដូចជានីការ៉ាហ្គា វ៉េណេស៊ុយអេឡា និងហៃទីជាដើមដោយសារទំនាក់ទំនងតានតឹង។ ករណីនេះអាចជាការប្រឈមសម្រាប់លោក Trump ដែលបានប្ដេជ្ញាថានឹងបញ្ជូនជនអន្ដោប្រវេសន៍ខុសច្បាប់នៅក្នុងសហរដ្ឋអាមេរិកចេញពីប្រទេសក្នុងចំនួនដ៏ច្រើនមិនធ្លាប់មានពីមុន។
ក្រុមរបស់លោក Trump បានទាក់ទងរដ្ឋាភិបាលប្រទេសមួយចំនួនរួចហើយដើម្បីស្ទង់មើលអំពីឆន្ទៈរបស់ប្រទេសទាំងនោះក្នុងការទទួលយកពលរដ្ឋប្រទេសផ្សេងដែលត្រូវបញ្ជូនចេញពីសហរដ្ឋអាមេរិក។
ប្រទេសជិតខាងសហរដ្ឋអាមេរិកជាច្រើនដូចជាម៉ិកស៊ិកនិងបាហាម៉ាជាដើមបានបញ្ជាក់ថាពួកគេមិនចង់ទទួលយកពលរដ្ឋប្រទេសផ្សេងដែលត្រូវបញ្ជូនចេញពីសហរដ្ឋអាមេរិកនោះទេ។
នៅក្នុងឆ្នាំ ២០២២ ជាង ៤០% នៃជនអន្តោប្រវេសន៍ដែលរស់នៅខុសច្បាប់ក្នុងសហរដ្ឋអាមេរិកគឺមកពីប្រទេសម៉ិកស៊ិក ដែលស្មើនឹងចំនួន ៤ លាន ៨ សែននាក់ក្នុងចំណោមចំនួនសរុប ១១ លាននាក់។ នេះបើយោងតាមរបាយការណ៍របស់ក្រសួងសន្តិសុខមាតុភូមិសហរដ្ឋអាមេរិក។ បន្ទាប់ពីនេះគឺប្រទេសក្វាតេម៉ាឡា អែលសាល់វ៉ាឌ័រ និងហុងឌូរ៉ាស ដែលជនអន្តោប្រវេសន៍ខុសច្បាប់មកពីប្រទេសទាំង ៣ នេះស្មើនឹងចំនួនជាងមួយភាគប្រាំនៃចំនួនសរុប៕
