ការបិទរដ្ឋាភិបាលមួយផ្នែក ដែលយូរជាងគេក្នុងប្រវត្តិសាស្ត្រអាមេរិក បានធ្វើឲ្យសេដ្ឋកិច្ចអាមេរិកខាតអស់ប្រមាណ៣ពាន់លានដុល្លារ ចំពោះសកម្មភាពសេដ្ឋកិច្ចដែលត្រូវបាត់បង់ទាំងស្រុង។ នេះបើតាមការសន្និដ្ឋានកាលពីថ្ងៃច័ន្ទដោយការិយាល័យថវិការបស់សភាជាតិអាមេរិកហៅកាត់ថា CBO។
ការិយាល័យ CBO និយាយថាការវាយតម្លៃរបស់ខ្លួនអំពីផលប៉ះពាល់នៃការបិទរដ្ឋាភិបាលអាមេរិករយៈពេល៣៥ថ្ងៃនេះ ចំពោះសេដ្ឋកិច្ចដែលធំជាងគេក្នុងពិភពលោកមួយនេះ បង្ហាញថាសកម្មភាពសេដ្ឋកិច្ចតម្លៃ៣ពាន់លានដុល្លារត្រូវបានបាត់បង់ក្នុងប៉ុន្មានថ្ងៃចុងឆ្នាំ២០១៨ ចាប់ពីក្រោយការបិទរដ្ឋាភិបាលកាលពីថ្ងៃទី២២ ខែធ្នូ។ សកម្មភាពសេដ្ឋកិច្ចតម្លៃ៨ពាន់លានដុល្លារផ្សេងទៀតត្រូវបាត់បង់ក្នុងខែមករា ដែលមានរយៈពេលរហូតដល់ថ្ងៃសុក្រសប្ដាហ៍មុន នៅពេលការបិទរដ្ឋាភិបាលបានបញ្ចប់។
ក៏ប៉ុន្តែការិយាល័យ CBO បានបញ្ជាក់ថា ដោយសារបុគ្គលិករដ្ឋការសហព័ន្ធ៨សែននាក់ដែលគេបានត្រូវឲ្យឈប់ធ្វើការជាបណ្តោះអាសន្នឬត្រូវបង្ខំឲ្យធ្វើការដោយគ្មានប្រាក់ខែ នឹងទទួលបានប្រាក់ខែសងវិញ ហើយសកម្មភាពរដ្ឋាភិបាលបានដំណើរការឡើងវិញ សកម្មភាពសេដ្ឋកិច្ចដែលបាត់បង់នឹងត្រូវបានស្តារឡើងវិញនៅក្នុងប៉ុន្មានសប្តាហ៍ខាងមុខ លើកលែងតែសកម្មភាពសេដ្ឋកិច្ចតម្លៃ៣ពាន់លានដុល្លារដែលមិនអាចស្តារមកវិញបាន។
ការិយាល័យ CBO បានប៉ាន់ស្មានថា គម្រោងចំណាយរបស់រដ្ឋាភិបាលសហព័ន្ធប្រមាណ១៨ពាន់លានដុល្លារត្រូវបានពន្យារពេលក្នុងអំឡុងការបិទរដ្ឋាភិបាល។ គម្រោងចំណាយទាំងនេះភាគច្រើននឹងត្រូវគេអនុវត្តឡើងវិញ លើកលែងតែមានការបិទរដ្ឋាភិបាលជាថ្មីឡើងវិញនៅក្នុងរយៈពេលតិចជាងបីសប្តាហ៍ខាងមុខ។
លោកប្រធានាធិបតី Donald Trump ព្រមទាំងមេដឹកនាំសភាពីខាងគណបក្សប្រជាធិបតេយ្យនិងសាធារណរដ្ឋបានយល់ព្រមបញ្ចប់ការបិទរដ្ឋាភិបាល ហើយបង្កើតក្រុមការងារមកពីគណបក្សទាំងពីរដើម្បីចរចាកិច្ចសន្យាសន្តិសុខតាមព្រំដែនអាមេរិកម៉ិចស៊ិក។
ការបិទរដ្ឋាភិបាលអាមេរិកបានកើតឡើងដោយសារការខ្វែងគំនិតអំពីការទាមទាររបស់លោកប្រធានាធិបតី Trump ឲ្យមានថវិកា៥,៧ពាន់លានដុល្លារដើម្បីស្ថាបនាជញ្ជាំងតាមព្រំដែនដើម្បីទប់ការធ្វើអន្តោប្រវេសន៍ខុសច្បាប់ ដែលនេះជាការសន្យាធំជាងគេរបស់លោកពេលលោកឃោសនាបោះឆ្នោតកាលពីឆ្នាំ២០១៦។ ប៉ុន្តែក្រុមគណបក្សប្រជាធិបតេយ្យដែលជាគណបក្សប្រឆាំង បានបដិសេធមិនព្រមផ្តល់ថវិកាសម្រាប់ស្ថាបនាជញ្ជាំងព្រំដែននេះ។ ពួកគេថ្លែងថាពួកគេសុខចិត្តផ្តល់ថវិកាសម្រាប់វិធានការសន្តិសុខផ្សេងទៀត ដូចជាការបន្តឹងការពិនិត្យនៅច្រកព្រំដែន ការបង្កើនភ្នាក់ងារប្រចាំនៅព្រំដែន និងការបង្កើនការប្រើប្រាស់បច្ចេកវិទ្យាដើម្បីឃ្លាំមើលការឆ្លងព្រំដែនដោយខុសច្បាប់។
លោក Trump បានថ្លែងកាលពីថ្ងៃអាទិត្យថា លោកគិតថាលទ្ធភាពដែលក្រុមការងារចរចាររបស់សភាអាចឈានដល់ការព្រមព្រៀងគ្នាត្រឹមថ្ងៃទី១៥ ខែកុម្ភៈ មានតិចជាង៥០ភាគរយ។ លោក Trump ថា ការបិទរដ្ឋាភិបាលម្តងទៀត«ពិតជាជម្រើសមួយ» ប្រសិនបើមិនមានការយល់ព្រម ហើយលោកក៏នឹងអាចធ្វើប្រកាសអាសន្នរបស់ជាតិ ដើម្បីព្យាយាមស្ថាបនាជញ្ជាំងព្រំដែនដោយមិនមានការយល់ព្រមពីសភា ដោយលោកទាញយកថវិកាពីថវិការដ្ឋាភិបាលដែលមិនទាន់ចំណាយ។
ក៏ប៉ុន្តែសមាជិកសភាសំខាន់ៗពីខាងគណបក្សសាធារណរដ្ឋមួយចំនួនបានទទូចលោកប្រធានាធិបតី Trump មិនឲ្យប្រកាសអាសន្នជាតិ ដោយសកម្មភាពនេះនឹងនាំឲ្យមានការប្តឹងប្រឆាំងយ៉ាងឆាប់រហ័សពីក្រុមគណបក្សប្រជាធិបតេយ្យ។
ការិយាល័យថវិការបស់សភាជាតិអាមេរិកហៅកាត់ថា CBO ថ្លែងថា ការណ៍ដែលសេដ្ឋកិច្ចអាមេរិកបានខាតបង់៣ពាន់លានដុល្លារជាអចិន្ត្រៃយ៍ មានន័យថា សេដ្ឋកិច្ចអាមេរិកដែលត្រូវបានទស្សន៍ទាយថា នឹងមានទំហំ១៩លានលានដុល្លារនៅឆ្នាំ២០១៩ មានទំហំ០.២ភាគរយតូចជាងទំហំសេដ្ឋកិច្ចប្រសិនបើមិនមានការបិទរដ្ឋាភិបាល។
ប៉ុន្តែរបាយការណ៍របស់ការិយាល័យ CBO នេះបានបន្ថែមថា «លើសពីផលប៉ះពាល់ដល់សេដ្ឋកិច្ចទាំងមូល គឺផលប៉ះពាល់ធ្ងន់ធ្ងរដល់អាជីវកម្មតូចតាចនិងពលករ។ ក្នុងចំណោមអ្នកដែលទទួលរងផលប៉ះពាល់អវិជ្ជមានដោយផ្ទាល់រួមមានបុគ្គលិករដ្ឋការសហព័ន្ធដែលត្រូវគេពន្យារការបើកប្រាក់ខែនិងក្រុមហ៊ុនឯកជនដែលត្រូវបាត់បង់អាជីវកម្ម។ ក្រុមហ៊ុនឯកជនទាំងនេះនឹងមិនអាចស្តារប្រាក់ចំណូលដែលបាត់បង់វិញទេ។
ទោះយ៉ាងនេះក្តីក៏ការិយាល័យ CBO និយាយថា «រាល់ផលប៉ះពាល់ដែលគេបានសន្មតទាំងនេះនិងរយៈពេលរបស់វា មិនមានភាពជាក់ច្បាស់ទេ។ ជាពិសេស ការិយាល័យ CBO មិនប្រាកដថា តើមានគម្រោងចំណាយរបស់រដ្ឋាភិបាលណាដែលត្រូវប៉ះពាល់ដោយការបិទរដ្ឋាភិបាលមួយផ្នែកនេះ តើបុគ្គលិករដ្ឋការសហព័ន្ធនិងបុគ្គលិកជាប់កិច្ចសន្យាបានកែតម្រូវការចំណាយរបស់ពួកគេយ៉ាងណាចំណោះការពន្យារពេលបើកប្រាក់ខែនេះ ហើយថា តើទីភ្នាក់ងាររដ្ឋនានានឹងកែសម្រួលការចំណាយរបស់ខ្លួនយ៉ាងណាក្រោយពីថវិកាមានឡើងវិញ»៕
