ពលរដ្ឋកម្ពុជាចំនួន៥៩នាក់ដែលត្រូវគេបោកឱ្យទៅធ្វើកម្មករនេសាទ ហើយក្រោយមកត្រូវបានជួយសង្គ្រោះនៅប្រទេសឥណ្ឌូនេស៊ីបានវិលត្រឡប់មកប្រទេសកម្ពុជាវិញហើយកាលពីថ្ងៃច័ន្ទនេះ។
ពលករទាំងនោះបានត្រឡប់មកដល់ប្រទេសកម្ពុជាតាមអាកាសយានដ្ឋានអន្តរជាតិភ្នំពេញ ក្រោមការជួយឧបត្តម្ភរបស់អង្គការទេសន្តរប្រវេសន៍អន្តរជាតិ (IOM)។
លោក កុយ គួង អ្នកនាំពាក្យក្រសួងការបរទេសបានប្រាប់ VOA ថា៖ «បាទអត់មានបាត់ម្នាក់ទេបាទ។ ចំនួន៥៩នាក់តែម្តង»។
ពលករខ្មែរដែលរងគ្រោះទាំងនេះភាគច្រើនជាកម្មករលើទូកនេសាទរបស់ថៃ។ ពួកគេគឺជាអ្នកដែលនៅក្នុងចំណោមក្រុមអ្នកនេសាទជាង៣០០នាក់ ដែលទើបត្រូវបានជួយសង្គ្រោះ ដោយអាជ្ញាធរឥណ្ឌូនេស៊ីកាលពីពេលថ្មីៗនេះ បន្ទាប់ពីមានរបាយការណ៍ស៊ើបអង្កេតមួយរបស់ទីភ្នាក់ងារសារព័ត៌មាន AP របស់អាមេរិកាំងលើឧស្សាហកម្មគ្រឿងសមុទ្រ។ អ្នកនេសាទទាំងនោះមកពីប្រទេសកម្ពុជា ថៃ និងឡាវ។
អង្គការទេសន្តរប្រវេសន៍អន្តរជាតិបានបញ្ជាក់ថា នៅមានពលករកម្ពុជាចំនួន៣៦នាក់ផ្សេងទៀតកំពុងជាប់នៅលើកោះ Benjina នៅឡើយ ហើយស្ថានភាពរបស់ពួកគេមិនទាន់ច្បាស់ទេ។
លោក កុយ គួង អ្នកនាំពាក្យក្រសួងការបរទេសបានបញ្ជាក់ថា ភាគីកម្ពុជានឹងទៅជួបតំណាងអង្គការទេសន្តរប្រវេសន៍អន្តរជាតិនៅព្រឹកថ្ងៃអង្គារ ដើម្បីជួបសម្ភាសន៍ពលករទាំង៣៦នាក់នេះ។ លោកក៏បន្តឲ្យដឹងទៀតថា អាជ្ញាធរឥណ្ឌូនេស៊ីបានរកឃើញពលករកម្ពុជា៣២នាក់ផ្សេងទៀតដែរ។
លោកបន្ថែមថា៖«ក្រៅពី៣៦នាក់នេះ យើងបានធ្វើការជាមួយអាជ្ញាធរឥណ្ឌូនេស៊ីបានរកឃើញ៣២នាក់ទៀត ហើយនៅខាងមុខទៀតមិនដឹងជាថានឹងរកឃើញប៉ុន្មាននាក់ទៀត យើងអត់ទាន់បានដឹងច្បាស់ »។
មានពលករកម្ពុជាជាងមួយលាននាក់បានចាកចេញពីប្រទេសទៅធ្វើការនៅប្រទេសថៃ ម៉ាឡេស៊ី និងឥណ្ឌូនេស៊ីទាំងស្របច្បាប់ និងមិនស្របច្បាប់។ ពួកគេមួយចំនួនតែងរងគ្រោះពីការធ្វើទុក្ខបុក្ខម្នេញពីថៅកែ ជាពិសេសអ្នកនេសាទតាមកប៉ាល់ថៃ៕
