សកម្មជនគាំទ្រលទ្ធិប្រជាធិបតេយ្យរបស់ក្រុងហុងកុងចំនួន៨នាក់ ត្រូវបានចាប់ខ្លួនកាលពីថ្ងៃអង្គារ ពីបទចូលរួមធ្វើបាតុកម្មកាលពីខែកក្កដាប្រឆាំងនឹងច្បាប់សន្តិសុខជាតិថ្មី ដែលត្រូវបានប្រកាសដាក់ឲ្យប្រើប្រាស់ក្នុងទីក្រុងនេះ ដោយប្រទេសចិនដីគោក។
សកម្មជនទាំង៨នាក់នោះ ក៏រួមមានអតីតសមាជិករដ្ឋសភាដែលគាំទ្រលទ្ធិប្រជាធិតេយ្យចំនួន៣រូប ដែលមាន លោក Leung Kwok-hung ដែលគេនិយមហៅថា ជាបុរស «សក់វែង» លោក Wu Chi-wa និងលោក Eddie Chu ផងដែរ។
ប៉ូលិសក្រុងហុងកុង បានបញ្ជាក់ក្នុងសេចក្តីថ្លែងការណ៍ថា សកម្មជនទាំង៨នាក់នេះ ដែលមានអាយុចន្លោះពី២៤ ដល់៦៤ឆ្នាំ ត្រូវបានចាប់ខ្លួន និងចោទប្រកាន់ពីបទបង្កអំពើញុះញង់ ការរៀបចំ និងការចូលរួមក្នុងការជួបជុំមួយដែលគ្មានការអនុញ្ញាត។ សេចក្តីថ្លែងការណ៍របស់ប៉ូលិស មិនបាននិយាយលម្អិតពីអត្តសញ្ញាណរបស់អ្នកដែលត្រូវបានចាប់ខ្លួនទាំងនោះទេ។
មនុស្សប្រមាណជាង៣៧០នាក់ ត្រូវបានចាប់ខ្លួននៅថ្ងៃទី១ ខែកក្កដា កន្លងទៅ គឺមួយថ្ងៃក្រោយពីរដ្ឋាភិបាលក្រុងប៉េកាំង បានយល់ព្រមដាក់ឲ្យប្រើប្រាស់ច្បាប់សនិ្តសុខជាតិថ្មី សម្រាប់ទីក្រុងហុងកុង ដែលជាការឆ្លើយតបចំពោះការប្រឆាំងតវ៉ាដែលកើតមានឡើងអស់រយៈពេលរាប់ខែកន្លងទៅ ដែលពេលខ្លះ ការប្រឆាំងតវ៉ានោះ ក៏បានក្លាយជាអំពើហិង្សាផងដែរ ដោយបានហុំព័ទ្ធមជ្ឈមណ្ឌលហិរញ្ញវត្ថុក្រុងហុងកុងក្នុងរយៈពេលកន្លះឆ្នាំចុងក្រោយ ក្នុងឆ្នាំ២០១៩។ ក្រោមច្បាប់សន្តិសុខជាតិថ្មី អ្នកទាំងឡាយណាក្នុងទីក្រុងហុងកុងដែលត្រូវគេជឿជាក់ថា ធ្វើសកម្មភាពភេរវកម្ម ការបំបែករដ្ឋ ធ្វើវិទ្ធង្សនាអំណាចរដ្ឋ ឬឃុបឃិតជាមួយកម្លាំងបរទេស អាចត្រូវកាត់ទោស និងជាប់ពន្ធនាគារអស់មួយជីវិត បើត្រូវរកឃើញថា មានពិរុទ្ធភាព។
ការចាប់ខ្លួនសកម្មជនទាំង៨នាក់នៅថ្ងៃអង្គារនេះ ត្រូវបានធ្វើឡើង ជាច្រើនម៉ោង ក្រោយសហរដ្ឋអាមេរិក បានសម្រេចដាក់ទណ្ឌកម្មមន្ត្រីចិនចំនួន១៤នាក់ ជុំវិញការបណ្តេញសមាជិករដ្ឋសភាទីក្រុងហុងកុងចំនួន៤នាក់ ដែលជាអ្នកគាំទ្រលទ្ធិប្រជាធិបតេយ្យ ក្នុងពេលកន្លងមក៕
