ក្រុមយោធានៃប្រទេសអ៊ុយក្រែនបាននិយាយថាទាហានពួកគេបួននាក់បានត្រូវសម្លាប់ហើយ៨នាក់ទៀតបានត្រូវរបួសជាលទ្ធផលនៃការបាញ់ផ្តក់ដោយក្រុមទាមទារបំបែករដ្ឋដែលគាំទ្រដោយរុស្សីក្នុងរយៈពេល២៤ម៉ាងកន្លងទៅនេះ។
លោក Andrei Lysenko អ្នកនាំពាក្យយោធាបាននិយាយកាលពីថ្ងៃសុក្រថាក្រុមឧទ្ទាមបានបាញ់រ៉ុក្កែតនិងគ្រាប់កាំភ្លើងត្បាល់ដាក់លើកងកម្លាំងរដ្ឋាភិបាល
ជាង៣០ដងនៅក្នុងរយៈពេលនោះ។ លោកបានភ្ជាប់ការបង្កើនការបាញ់ផ្តក់ទាំងនេះទៅនឹងប៉ែកខាងកើតនៃប្រទេសអ៊ុយក្រែននៃ «អ្វីដែលហៅថាក្បួនកុងវ័រមនុស្សធម៌មួយទៀត» ពីប្រទេសរុស្សី នេះបើតាមពាក្យសម្តីផ្ទាល់របស់លោក។
អាជ្ញាធរអ៊ុយក្រែនបានចោទប្រកាន់ប្រទេសរុស្សីថាបានប្រើប្រាស់ក្បួនកុងវ័រដើម្បីផ្តល់អាវុធឱ្យក្រុមទាមទារបំបែករដ្ឋនៅក្រោមការក្លែងបន្លំថាជាជំនួយមនុស្សធម៌ដែលជាការចោទប្រកាន់មួយដែលអាជ្ញាធររុស្សីបានបដិសេធហើយនោះ។
កាលពីថ្ងៃសុក្រ រដ្ឋបាលក្រុង Donetsk បានរាយការណ៍នៅក្នុងគេហទំព័រពួកគេថាការបាញ់ផ្តក់បានបណ្តាលឱ្យមនុស្សម្នាក់ត្រូវរបួសនិងនាំឱ្យមានការដាច់ភ្លើងអគ្គីសនីក្នុងសង្កាត់មួយចំនួនផងដែរ។
អាជ្ញាធរក្រុងនេះបាននិយាយកាលពីពេលមុននេះក្នុងថ្ងៃសុក្រដែរថាជនស៊ីវិលពីរនាក់បានត្រូវសម្លាប់ហើយមានមនុស្ស៧នាក់ទៀតបានត្រូវរបួសកាលពីថ្ងៃព្រហស្បតិ៍នៅពេលដែលសង្កាត់បួនបានរងការបាញ់ផ្តក់យ៉ាងខ្លាំង។ អាជ្ញាធរនេះក៏បាននិយាយដែរថាអាគារផ្ទះល្វែងមួយចំនួនក៏បានខូចខាតដែរនៅក្នុងការវាយប្រហារទាំងនេះ។
កំណើននៃការប្រយុទ្ធគ្នាកាលពីពេលថ្មីៗនេះមានទ្បើងនៅមុនជំនួបមួយអំពីវិបត្តិក្នុងប្រទេសអ៊ុយក្រែនរវាងក្រុមមេដឹកនាំនៃប្រទេសអាល្លឺម៉ង់ បារាំង អ៊ុយក្រែននិងប្រទេសរុស្សីដែលបានត្រូវកំណត់ប្រជុំកាលពីពេលមុននៅក្នុងរដ្ឋធានីអាស្តាណា (Astana) នៃប្រទេសកាហ្សាក់ស្ថាន (Kazakhstan) នៅថ្ងៃទី១៥ខែមករា៕
