ប្រទេសអាហ្វ្រិកបានក្លាយជាប្រទេសរីកចម្រើនផ្នែកទីផ្សារផ្ទេរប្រាក់សម្រាប់ក្រុមហ៊ុនដែលផ្តល់សេវាផ្ញើប្រាក់នានា ដូចទៅនឹងការរីកលូតលាស់ផ្នែកទូរគមនាគមន៍ និងសេដ្ឋកិច្ចដែរ។
ក្រុមហ៊ុន WorldRemit ជាក្រុមហ៊ុនផ្តល់សេវាកម្មផ្ទេរប្រាក់ដែលមានមូលដ្ឋាននៅចក្រភពអង់គ្លេស នាពេលថ្មីៗនេះបានចាប់ផ្តើមផ្សព្វផ្សាយសេវាកម្មផ្ទេរប្រាក់តាមប្រព័ន្ធឌីជីថលថ្មីមួយនៅក្នុងប្រទេសអាហ្វ្រិកខាងកើតចំនួន៤។ ក្រុមហ៊ុននេះបានផ្តល់សេវាកម្មផ្ទេរប្រាក់យ៉ាងហោចណាស់ចំនួន១ពាន់៦រយលានដុល្លារនៅក្នុងទ្វីបអាហ្វ្រិកជារៀងរាល់ឆ្នាំ។
លោក Ismail Ahmed សហស្ថាបនិកនិងជានាយកក្រុមហ៊ុន WorldRemit បានប្រាប់VOA អំពីការវិវត្តនៃសេវាកម្មផ្ទេរប្រាក់នៅក្នុងទ្វីបអាហ្វ្រិកក្នុងរយៈពេលប៉ុន្មានឆ្នាំនេះ។ លោក Ismail Ahmed បានថ្លែងដូច្នេះថា៖ «ពេលយើងចាប់ផ្តើមបម្រើសេវាកម្មផ្ទេរប្រាក់ដំបូងពេលនោះ គឺទាំងការទទួលនិងផ្ញើប្រាក់ ៩៩ភាគរយគឺជាលុយសុទ្ធ។
ប៉ុន្តែនៅថ្ងៃនេះមានការវិវត្តយ៉ាងឆាប់រហ័ស ហើយក្នុងរយៈពេលពីរបីឆ្នាំទៀត យើងគិតថាជាង៥០ទៅ៦០ភាគរយនៃការផ្ទេរប្រាក់អន្តរជាតិនឹងប្តូរពីលុយសុទ្ធដែលមានជាយូរមកហើយ ទៅជាការផ្ទេរតាមប្រព័ន្ធឌីជីថលជំនួសវិញ។ ហេតុដូច្នេះហើយបានជាសេវាកម្មផ្ទេរប្រាក់របស់យើងមានការវិវត្តយ៉ាងឆាប់រហ័សក្នុងរយៈពេលពីរបីឆ្នាំមកនេះ»។
លោកAhmed និយាយថាបន្ទាប់ពីបានប្តូរទៅជាប្រព័ន្ធឌីជីថលមក ថ្លៃសេវាផ្ញើប្រាក់បានធ្លាក់ចុះ ហើយការត្រួតពនិត្យលើការផ្ទេរប្រាក់នេះកាន់តែងាយស្រួលជាងមុន។
លោកIsmail Ahmedបានថ្លែងបន្តថា៖«វាកាន់តែមានភាពងាយស្រួលសម្រាប់អាជីវកម្មនិងអតិថិជនដើម្បីផ្ញើប្រាក់ទាំងនៅក្នុងនិងក្រៅប្រទេស។ វាកាន់តែងាយស្រួលជាងមុនក្នុងការប្រយុទ្ធប្រឆាំងនឹងឧក្រិដ្ឋកម្មហរិញ្ញវត្ថុ ពីព្រោះថាការធ្វើប្រតិបត្តិការតាមប្រព័ន្ធឌីជីថលអាចជួយឲ្យមានការត្រួតពិនិត្យលើការផ្ញើ បើធៀបទៅនឹងការប្រើលុយសុទ្ធដែលគ្មានការត្រួតពិនិត្យនោះ»។
លោក Gerrishon Ikiara សាស្រ្តាចារ្យផ្នែកកិច្ចការសេដ្ឋកិច្ចអន្តរជាតិនៅសាកលវិទ្យាល័យណៃរ៉ូប៊ីបានថ្លែងថា ការផ្ញើប្រាក់តាមប្រព័ន្ធឌីជីថលនឹងជួយជំរុញដល់វិស័យពាណិជ្ជកម្មក្នុងទ្វីបអាហ្វ្រិក។ ប៉ុន្តែត្រូវចងចាំថាប្រទេសមួយចំនួននៅមានការខ្វះខាតផ្នែកហេដ្ឋារចនាសម្ព័ន្ធមួយចំនួន។ លោកសាស្រ្តចារ្យ Gerrishon Ikiara បានថ្លែងថា៖ «ជាការពិត ឧបសគ្គចម្បងគឺកម្រិតនៃហេដ្ឋារចនាសម្ព័ន្ធ ពីព្រោះថាបើប្រទេសមួយគ្មានហេដ្ឋារចនាសម្ព័ន្ធល្អ ដូចជាប្រព័ន្ធអគ្គសនី និងហេដ្ឋារចនាសម្ព័ន្ធទូរគមនាគមន៍នោះ វានឹងបង្កការលំបាក»។
ធនាគារពិភពលោកបានប្រកាសថាកាលពីឆ្នាំ២០១៧ទឹកប្រាក់ចំនួន៣៧ពាន់៨រយលានដុល្លារត្រូវបានផ្ញើទៅប្រទេសនៅក្នុងទ្វីអាហ្វ្រិកតាមរយៈសេវាផ្ញើប្រាក់។ ឆ្នាំនេះគេរំពឹងថាចំនួនទឹកប្រាក់ដែលត្រូវបានផ្ញើនឹងកើនឡើងដល់ទៅ៣៩ពាន់លានដុល្លារ៕
ប្រែសម្រួលដោយ ស៊ូ ពេជ្រចិន្តា
