ក្រសួងការពារជាតិបានច្រានចោលការលើកឡើងនានាដែលថា ការផ្ទុះគ្រាប់បែក កាលពីសប្តាហ៍មុន នៅទីបញ្ជាការយោធភូមិភាគទី ៣ ក្នុងខេត្តកំពង់ស្ពឺ គឺជាការបះបោររបស់កងទ័ព និងជាអំពើភេរវកម្ម។ ក្រសួងបញ្ជាក់ថា ការផ្ទុះគ្រាប់សម្លាប់យោធិន ២០ នាក់ បណ្តាលមកពីបញ្ហាបច្ចេកទេស។ នេះបើតាមអ្នកនាំពាក្យក្រសួងការពារជាតិ និងសេចក្តីប្រកាសព័ត៌មានរបស់ក្រសួងការពារជាតិ ចុះថ្ងៃទី ១ ខែឧសភា។
លោក ម៉ៅ ផល្លា អ្នកនាំពាក្យកងយោធពលខេមរភូមិន្ទ ប្រាប់វីអូអេនៅថ្ងៃព្រហស្បតិ៍នេះថា មូលហេតុនៃការផ្ទុះគ្រាប់នៅទីបញ្ជាការយោធភូមិភាគទី ៣ នោះ គឺមកពីបញ្ហា«លក្ខណៈបច្ចេកទេស» ដោយក្រសួងនិងអង្គភាពមូលដ្ឋានកំពុងស្រាវជ្រាវរកមូលហេតុថា តើគ្រាប់ដែលដឹកពីខេត្តកោះកុងយកមករក្សាទុកនៅខេត្តកំពង់ស្ពឺដែលជាឃ្លាំងធំនោះបានធ្លាក់ ឬរបូតបែបណារហូតដល់ផ្ទុះទ្រង់ទ្រាយធំបែបនេះ។
លោកថ្លែងថា៖ «ពេលហ្នឹងមានតែ ២០ នាក់ នៅហ្នឹង[ទីបញ្ជាការដ្ឋានយោធភូមិភាគទី ៣]។យើងអត់ដឹងថា លក្ខណៈបច្ចេកទេសលើកទៅវាធ្លាក់ឬមួយយ៉ាងម៉េច។ យើងអត់ដឹង អត់ហ៊ាននិយាយ ត្រឹមសន្និដ្ឋានទេ»។
ក្រសួងការពារជាតិបានចេញសេចក្តីប្រកាសព័ត៌មានមួយ កាលពីថ្ងៃទី ១ ខែឧសភា ដោយអះអាងថា ឧបទ្ទវហេតុផ្ទុះគ្រាប់មិនមែនជាការបះបោររបស់កងទ័ព ឬពាក់ព័ន្ធនឹងអំពើភេរវកម្មអ្វីឡើយ។
សេចក្តីប្រកាសព័ត៌មាននោះបញ្ជាក់ថា៖ «ករណីឧបទ្ទវហេតុផ្ទុះគ្រាប់បែក កាលពីថ្ងៃទី ២៧ ខែមេសា ឆ្នាំ ២០២៤ នៅទីបញ្ជាការយោធភូមិភាគទី ៣ ក្នុងខេត្តកំពង់ស្ពឺ គឺជាបញ្ហាបច្ចេកទេស ដោយសារប្រភេទអាវុធជាតិផ្ទុះចាស់ៗ ខូចគុណភាព រួមជាមួយអាកាសធាតុក្តៅ មិនមែនជាបញ្ហាកងទ័ពបះបោរ អំពើភេរវកម្ម ឬចេតនារបស់បុគ្គលណាមួយដូចការបំផ្លើសឡើយ»។
ក្រោយកើតហេតុការណ៍ផ្ទុះគ្រាប់សម្លាប់មនុស្ស ២០ នាក់ និងធ្វើឱ្យមនុស្សមួយចំនួនរបួស អតីតមេដឹកនាំគណបក្សប្រឆាំងដែលនីរទេសខ្លួននៅក្រៅប្រទេស លោក សម រង្ស៊ី បានបង្ហោះសារតាមបណ្តាញសង្គមហ្វេសប៊ុក កាលពីថ្ងៃទី ២៨ ខែមេសា ដោយសរសេររៀបរាប់ថា៖ «ចលនាផ្ទៃក្នុងគណបក្សប្រជាជនកម្ពុជា និងកងកម្លាំងប្រដាប់អាវុធ ចាប់ផ្តើមផ្ទុះហើយដើម្បីទាមទារឱ្យដកចេញត្រកូលហ៊ុន (គឺ ហ៊ុន សែន និងកូនគាត់...)។ ចលនានេះបានរៀបចំឱ្យផ្ទុះឃ្លាំងគ្រឿងផ្ទុះជិតទីក្រុងភ្នំពេញ នៅថ្ងៃ ២៧ មេសា ២០២៤ នេះ»។
ដោយឡែកចំពោះទំហំទឹកប្រាក់នៃការខូតខាត និងបរិមាណគ្រាប់ដែលផ្ទុះវិញ អ្នកនាំពាក្យកងយោធពលខេមរភូមិន្ទ លោក ម៉ៅ ផល្លា មិនទាន់អាចបញ្ជាក់បាននៅឡើយទេ ដោយលោកថា លោកមិនទាន់ទទួលបានរបាយការណ៍ពីអង្គភាពមូលដ្ឋានដែលកំពុងស្រាវជ្រាវរកគ្រាប់ដែលខ្ទាតចេញបន្ថែមទៀត។
លោក ម៉ៅ ផល្លា បន្ថែមថា៖ «បញ្ហាគ្រាប់ខ្ញុំក្តាប់អត់បានទេ។ ដល់ពេលនេះ ខ្ញុំអត់ទាន់មានរបាយការណ៍ច្បាស់លាស់ទេ។ ប៉ុន្តែគ្រាន់តែយើងដឹកគ្រាប់ចាស់ៗមួយចំនួនយកមកដាក់ឃ្លាំងធំប៉ុណ្ណឹង»។
បើតាមរបាយការណ៍ចុះថ្ងៃទី ២៧ ខែមេសារបស់កងទ័ពជើងគោកយោធភូមិភាគទី ៣ដែលវីអូអេទទួលបាន ឧបទ្ទវហេតុផ្ទុះគ្រាប់នេះបានកើតឡើងនៅទីបញ្ជាការយោធភូមិភាគទី ៣ ស្ថិតក្នុងក្រុងច្បារមន ខេត្តកំពង់ស្ពឺ កាលពីថ្ងៃទី ២៧ ខែមេសា ឆ្នាំ ២០២៤ វេលាម៉ោង ២និង១៥នាទីរសៀល ដែលបណ្តាលឱ្យនាយទាហាន ២០ នាក់បានស្លាប់ ដោយក្នុងនោះនាយទាហាន ១៥ នាក់ មកពីខេត្តកោះកុង និង ៥ នាក់ទៀតជានាយទាហាននៃទីបញ្ជាការយោធភូមិភាគទី ៣ ក្នុងខេត្តកំពង់ស្ពឺ។
នាយទាហានទាំង ១៥ នាក់នោះបានប្រើប្រាស់រថយន្តចំនួន ៥ គ្រឿងដឹកគ្រាប់មកពីខេត្តកោះកុង យកមករក្សាទុកនៅទីបញ្ជាការយោធភូមិភាគទី ៣ ក្នុងខេត្តកំពង់ស្ពឺ ដោយក្នុងនោះរថយន្តមួយគ្រឿង រួមទាំងអាវុធគ្រាប់លើរថយន្តបានផ្ទុះខ្ទេច។ ចំណែករថយន្តមួយគ្រឿងទៀតខូតខាតតែផ្នែកខាងក្រៅ តែអាវុធគ្រាប់នៅដដែល និងរថយន្ត ៣ គ្រឿងទៀត ដែលមានផ្ទុកអាវុធគ្រាប់មិនរងការខូចខាតនោះទេ។ នេះបើតាមរបាយការណ៍នោះ។
របាយការណ៍ឱ្យដឹងទៀតថា អគារចំនួន ៤ ក្នុងទីបញ្ជាការយោធភូមិភាគ ៣ នោះរងការខូចខាត ដូចជាឃ្លាំងផ្ទុកអាវុធគ្រាប់ចំនួន ៣ ខ្នង ខូតខាតទាំងស្រុង និងអគារស្នាក់នៅ ១ ខ្នង និងអគារការិយាល័យ ខូចខាតផ្នែកខាងក្រៅ រួមមានទ្វារ បង្អួច និងដំបូល។ ផ្ទះប្រជាពលរដ្ឋចំនួន ២៥ ខ្នងដែលស្ថិតនៅជុំវិញបញ្ជាការយោធភូមិភាគទី ៣នោះរងការខូចខាតផងដែរ។
ក្រោយឧបទ្ទវហេតុនោះ លោកនាយករដ្ឋមន្ត្រី ហ៊ុន ម៉ាណែត បានបង្ហោះសាររំលែកទុក្ខ និងប្រកាសថា រដ្ឋាភិបាលនឹងទទួលរ៉ាប់រងទាំងអស់លើការចំណាយរៀបចំពិធីបុណ្យសពរបស់យោធិនដែលបាត់បង់ជីវិត។ លោក ហ៊ុន ម៉ាណែត បន្ថែមថា រដ្ឋាភិបាលឧបត្ថម្ភជាថវិកាជូនគ្រួសារយោធិនចំនួន ២ម៉ឺនដុល្លារអាមេរិក ក្នុងមួយគ្រួសារសព ហើយយោធិនដែលរងរបួសទទួលបានក្នុងម្នាក់ៗចំនួន ២០ លានរៀល។
បើតាមលោក ម៉ៅ ផល្លា ថវិកាដែលរដ្ឋាភិបាលឧបត្ថម្ភនោះត្រូវបានប្រគល់ដល់គ្រួសារសពយោធិន និងអ្នករងគ្រោះរួចរាល់ហើយ។
លោក អំ សំអាត នាយកទទួលបន្ទុកកិច្ចការទូទៅនៃអង្គការការពារសិទ្ធិមនុស្សលីកាដូជំរុញឱ្យក្រសួងការពារជាតិលាតត្រដាងលទ្ធផលនៃការស៊ើបអង្កេត ដើម្បីបង្ហាញអំពីហេតុការណ៍ជាក់ស្តែង និងទុកជាមេរៀនដើម្បីបញ្ចៀសការសង្ស័យ ឬការបកស្រាយខុសណាមួយ។
លោកប្រាប់វីអូអេនៅថ្ងៃព្រហស្បតិ៍នេះថា៖ «ករណីនេះ គួរតែបង្ហាញលទ្ធផលនៃការស៊ើបអង្កេត និងការស្រាវជ្រាវហ្នឹង ទោះបីជាការកើតឡើងដោយលក្ខណៈបច្ចេកទេសក៏ដោយ ក៏ វាជាបទពិសោធន៍ និងមេរៀនមួយ សម្រាប់ថ្ងៃក្រោយ ដើម្បីកុំឱ្យមានការកើតឡើងនូវសោកនាដកម្ម ឬឧបទ្ទវហេតុនេះតទៅទៀត ដើម្បីឱ្យមានការប្រុងប្រយ័ត្ន ហើយការយកចិត្តទុកដាក់បន្ថែមទៅលើលក្ខណៈបច្ចេកទេស»។
គួរបញ្ជាក់ថា ហេតុការណ៍ផ្ទុះឃ្លាំងដាក់គ្រាប់នៅបញ្ជាការយោធភូមិភាគទី ៣ ក្នុងខេត្តកំពង់ស្ពឺនោះ ក្រៅពីធ្វើឱ្យយោធិនបាត់បង់ជីវិត ក៏បានធ្វើឱ្យប៉ះពាល់ខូចខាតផ្ទះសម្បែងរបស់ប្រជាពលរដ្ឋ និងរោងចក្រដែលមានទីតាំងនៅជិតទីនោះផងដែរ។ នេះបើតាមអភិបាលខេត្តកំពង់ស្ពឺ លោក វ៉ី សំណាង ដែលប្រាប់វីអូអេកាលពីថ្ងៃចន្ទ។
អភិបាលខេត្តកំពង់ស្ពឺបានឱ្យដឹងទៀតថា ប្រជាពលរដ្ឋចំនួន ៣ នាក់ បានរងរបួស និងកម្មករកម្មការិនីរោងចក្រប្រមាណ ១៣ នាក់ ទទួលរងរបួស ព្រមទាំងបងប្អូនសាច់ញាតិយោធិនមួយចំនួនក៏ទទួលរងរបួសធ្ងន់ស្រាលផងដែរ៕
វេទិកាបញ្ចេញមតិ