យុទ្ធនាការឃោសនាបោះឆ្នោតប្រធានាធិបតីរបស់លោកស្រី Hillary Clinton បានត្រៀមខ្លួនរួចជាស្រេចក្នងុការការពារខ្លួនដោយសារមានរបាយការណ៍កាលពីពេលថ្មីៗនេះដែលសាកសួរអំពីលទ្ធភាពដែលមានជម្លោះខាងផលប្រយោជន៍ស្តីពីការបរិច្ចាគប្រាក់ឱ្យដល់មូលនិធិ Clinton។ យុទ្ធនាការនេះត្រូវដោះស្រាយរឿងមួយចំនួនដែលបានលាតត្រដាងដោយល្អិតល្អន់អំពីការអង្គាសប្រាក់របស់មូលនិធិ Clinton និងអំពីសុន្ទរកថាដែលលោកអតីតប្រធានាធិបតី Bill Clinton បានថ្លែងនៅទូទាំងពិភពលោក។
របាយការណ៍លម្អិតមួយនៅក្នុងកាសែត New York Times បាននិយាយដោយល្អិតល្អន់អំពីប្រធានប្រតិបត្តិនៃក្រុមហ៊ុនរ៉ែកាណាដាមួយដែលក្រុមហ៊ុនលោកបានត្រូវលក់ទៅឱ្យទីភ្នាក់ងារថាមពលបរមាណូ Rosatom នៃប្រទេសរុស្សី។ ការលក់នេះមានរួមបញ្ចូលអណ្តូងរ៉ែអ៊ុយរ៉ាញ៉ូមធំបំផុតមួយរបស់ស.រ.អា.ផងដែរ។
ការផ្តល់អំណោយប្រាក់កាសទាំងនេះដល់មូលនិធិ Clinton មិនបានត្រូវលាតត្រដាងឱ្យដឹងជាសាធារណៈទេហើយបានកើតមានទ្បើងនៅពេលមួយដែលកិច្ចព្រមព្រៀងត្រូវតែទទួលការយល់ព្រមដោយក្រសួងការបរទេសស.រ.អា.ដែលនៅពេលនោះឋិតនៅក្រោមការដឹកនាំរបស់លោកស្រី Hillary Clinton។
ការលាតត្រដាងទាំងនេះបានកើតមានទ្បើងជាផ្នែកដោយសារសៀវភៅថ្មីមួយមានចំណងជើងថា Clinton Cash ដែលប្រែថាប្រាក់សុទ្ធរបស់គ្រួសារ Clinton ដែលនិពន្ធដោយលោក Peter Schweizer ដែលជាអ្នកស្រាវជ្រាវម្នាក់នៅក្នុងស្ថាប័នអភិរក្សនិយម Hoover របស់សាកលវិទ្យាល័យ Stanford។ លោកស្រី Hillary Clinton បានប្រកាសកាលពីពេលមុននេះក្នុងខែនេះថាលោកស្រីនឹងស្វះស្វែងឱ្យបានទទួលការតែងតាំងជាបេក្ខនារីប្រធានាធិបតីរបស់គណបក្សប្រជាធិបតេយ្យក្នុងការបោះឆ្នោតប្រធានាធិបតីស.រ.អា.ក្នុងឆ្នាំ២០១៦។
លោក Brian Fallon អ្នកនាំពាក្យរបស់យុទ្ធនាការឃោសនាបោះឆ្នោតរបស់លោកស្រី Clinton បាននិយាយប្រាប់សារព័ត៌មាន New York Times ថា «គ្មានភស្តុតាងណាមួយ» ដែលបង្ហាញថាលោកស្រី Hillary Clinton បានធ្វើសកម្មភាពក្នុងឋានៈលោកស្រីជារដ្ឋមន្ត្រីការបរទេសដើម្បីគាំទ្រផលប្រយោជន៍នៃអ្នកផ្តល់ប្រាក់អំណោយឱ្យមូលនិធិ Clinton ទេ៕
