កាលពីថ្ងៃសុក្រ ប្រទេសចិនបានដាក់ទណ្ឌកម្មលើក្រុមហ៊ុនអាមេរិកចំនួន ៧ បន្ទាប់ពីរដ្ឋាភិបាលអាមេរិកបានយល់ព្រមផ្ដល់ជំនួយយោធាចំនួន ៥៧១,៣ លានដុល្លារដល់តៃវ៉ាន់កាលពីសប្ដាហ៍មុន និងបានបញ្ជាក់ថាជំនួយនេះប៉ះពាល់ដល់ «អធិបតេយ្យភាពនិងបូរណភាពទឹកដី» របស់ខ្លួន។ នេះបើយោងតាមសេចក្ដីរាយការណ៍របស់ទីភ្នាក់ងារសារព័ត៌មាន AFP។
កាលពីថ្ងៃសុក្រសប្ដាហ៍មុន ប្រធានាធិបតីអាមេរិកលោក Joe Biden បានអនុញ្ញាតផ្ដល់ជំនួយយោធាចំនួនរហូតដល់ ៥៧១,៣ លានដុល្លារដល់តៃវ៉ាន់។
ក្រសួងការបរទេសចិនបានបញ្ជាក់នៅពេលប្រកាសអំពីការដាក់ទណ្ឌកម្មនេះថា ទង្វើរបស់សហរដ្ឋអាមេរិក «ជ្រៀតជ្រែកចូលក្នុងកិច្ចការផ្ទៃក្នុងរបស់ចិន និងប៉ះពាល់ដល់អធិបតេយ្យភាពនិងបូរណភាពទឹកដីរបស់ចិន»។
សេចក្ដីថ្លែងការណ៍នេះបានរិះគន់លើកញ្ចប់ថវិកាផ្នែកការពារជាតិឆ្នាំ ២០២៥ របស់សហរដ្ឋអាមេរិក ដែលក្នុងនោះរួមមានទាំងគម្រោងផ្ដួចផ្ដើមកិច្ចសហប្រតិបត្តិការផ្នែកសន្តិសុខជាមួយតៃវ៉ាន់និងការអំពាវនាវឲ្យមានកិច្ចសហប្រតិបត្តិការផ្នែកការពារកាន់តែរឹងមាំជាងមុនជាមួយនឹងតៃវ៉ាន់ផងដែរ។
រដ្ឋាភិបាលចិននឹងបង្កកទ្រព្យសម្បត្តិនៅក្នុងប្រទេសចិនរបស់ក្រុមហ៊ុនផ្នែកការពាររបស់អាមេរិកដូចជាក្រុមហ៊ុន Insitu ក្រុមហ៊ុន Hudson Technologies ក្រុមហ៊ុន Saronic Technologies ក្រុមហ៊ុន Aerkomm និងក្រុមហ៊ុន Oceaneering International ក៏ដូចជាក្រុមហ៊ុន Raytheon នៅក្នុងប្រទេសកាណាដានិងសាខានានារបស់ក្រុមហ៊ុននេះនៅអូស្ត្រាលីផងដែរ។ នេះបើតាមការបញ្ជាក់របស់ក្រសួងការបរទេសចិន។
ទណ្ឌកម្មទាំងនេះ ដែលចូលជាធរមានកាលពីថ្ងៃសុក្រ ក៏ហាមឃាត់ក្រុមហ៊ុនទាំងនេះផងដែរមិនឲ្យធ្វើអាជីវកម្មជាមួយអង្គភាពនិងបុគ្គលនានានៅក្នុងប្រទេសចិន៕
