តុលាការចិន បានបើកសវនាការសំណុំរឿងមេធាវីដ៏ល្បី និងអ្នកតស៊ូមតិច្បាប់ជើងចាស់ម្នាក់កាលពីថ្ងៃទី១០ ខែធ្នូ ដែលជាទិវាសិទ្ធិមនុស្សអន្តរជាតិ។ សកម្មជនសិទ្ធិមនុស្ស បានថ្កោលទោសលើទង្វើនេះថា ជាការបង្ហាញពីការប្រឆាំងរបស់រដ្ឋាភិបាលក្រុងប៉េកាំងចំពោះសិទ្ធិមនុស្ស និងគុណតម្លៃជាសាកល។
អង្គការអ្នកការពារសិទ្ធិមនុស្សចិន ដែលជាអង្គការមានមូលដ្ឋាននៅក្នុងរដ្ឋធានីវ៉ាស៊ីនតោន និងដែលមានសកម្មជនសិទ្ធិមនុស្សចិនក្នុងស្រុក និងក្រៅប្រទេសជាសមាជិក បានរាយការណ៍អំពីចំណាត់ការរបស់អាជ្ញាធរចិនប្រឆាំងនឹងអ្នកច្បាប់ដ៏ល្បី គឺលោក Hao Jinsong នៅតុលាការក្នុងតំបន់ Dingxiang នៅទីរួមខេត្ត Shanxi ប្រទេសចិន កាលពីថ្ងៃទី១០ ខែធ្នូ។
លោក Hao ត្រូវបានឃាត់ខ្លួនអស់រយៈពេល៥១សប្តាហ៍ ចាប់តាំងពីថ្ងៃទី១៧ ខែធ្នូ ឆ្នាំ២០១៩ ហើយលោកត្រូវបានឃុំខ្លួននៅមជ្ឈមណ្ឌលឃុំខ្លួនក្នុងតំបន់ Wutai នៅក្នុងខេត្ត Shanxi។ លោកត្រូវបានគេចោទប្រកាន់ពី «បទញុះញង់បង្កបញ្ហា បរិហារកេរ្តិ៍ និងឆបោក»។
ក្នុងនាមជាអ្នកផ្តួចផ្តើមពាក្យបណ្តឹងសម្រាប់ផលប្រយោជន៍សាធារណៈ លោក Hao បានធ្វើការប្រយុទ្ធអស់រយៈពេលជាច្រើនឆ្នាំដើម្បីយុត្តិធម៌សង្គម និងនីតិរដ្ឋ តាមរយៈពាក្យបណ្តឹងរបស់លោកប្រឆាំងនឹងទីភ្នាក់ងាររដ្ឋាភិបាល និងក្រុមហ៊ុនផ្តាច់មុខដែលមានតែមួយ និងគ្រប់គ្រងដោយរដ្ឋ។
លោកមានភាពល្បីល្បាញដោយសារតែពាក្យបណ្តឹងប្រឆាំងនឹងក្រសួងផ្លូវរថភ្លើងដ៏មានអំណាច ដោយធ្វើការតតាំងចំពោះការបដិសេធរបស់ក្រសួងនេះ ដែលមិនផ្តល់វិក្កយបត្រពន្ធអាករសម្រាប់ទំនិញដែលបានទិញនៅលើរថភ្លើង និងគោលនយោបាយកំណត់តម្លៃសំបុត្ររថភ្លើងរបស់ខ្លួន។
លោកទទួលបានការចាប់អារម្មណ៍ពីអន្តរជាតិតិចជាងសកម្មជនដទៃទៀត ដោយសារតែលោកមានបំណងរឹតត្បិតខ្លួនលោកឱ្យមានការពាក់ព័ន្ធតិចតួចជាមួយនឹងករណីនយោបាយ។ ក្នុងនាមជាអ្នកតស៊ូមតិឱ្យមានការផ្លាស់ប្តូរបន្តិចម្តងៗ លោក Hao ទទូចថា ប្រជាធិបតេយ្យអាចនឹងឈ្នះ «ក្នុងល្បឿនដ៏ត្រឹមត្រូវមួយ»។
ទោះជាយ៉ាងនេះក្តី លោកត្រូវបានឃាត់ខ្លួននៅចុងឆ្នាំ២០១៩ និងត្រូវបានជាប់ចោទ នៅក្នុងខែមករា ឆ្នាំ២០២០។
លោក Hu Jia ដែលជាសកម្មជនសិទ្ធិមនុស្សចិនដ៏ល្បីម្នាក់បានប្រាប់ VOA ថា លោកជឿថា រដ្ឋាភិបាលក្រុងប៉េកាំងមានចេតនាចាប់ផ្តើមសវនាការនេះ នៅថ្ងៃទី១០ ខែធ្នូ ដែលជាទិវាសិទ្ធិមនុស្ស។
លោកបានប្រាប់ VOA ក្នុងន័យដើមថា «ពួកគេចង់បង្ហាញពីការប្រឆាំងនឹងសិទ្ធិមនុស្ស ដោយជ្រើសរើសយកថ្ងៃដែលសិទ្ធិមនុស្សត្រូវបានលើកកម្ពស់នៅទូទាំងពិភពលោក»។
លោកបានបន្ថែមថា នេះជាលើកដំបូងហើយដែលលោកខ្លួនឯងត្រូវបានគេបង្ខំឱ្យចេញពីក្រុងប៉េកាំង «ដើម្បីធ្វើវិស្សមកាល» នៅកន្លែងអាថ៌កំបាំងមួយនៅភាគខាងត្បូងនៃប្រទេស នៅមុនព្រឹត្តិការណ៍ដែលគាំទ្រដោយអង្គការសហប្រជាជាតិ។
មេធាវីសិទ្ធិមនុស្ស លោក Chen Jiangang ដែលបានរត់ចេញពីប្រទេសចិនកាលពីឆ្នាំមុនបាននិយាយថា រដ្ឋាភិបាលក្រុងប៉េកាំងមិនខ្វល់ពីកេរ្តិ៍ឈ្មោះលើឆាកអន្តរជាតិ ដូចពីមុនទៀតនោះទេ។
លោកបានប្រាប់ VOA ក្នុងន័យដើមថា «របបដឹកនាំរបស់លោកប្រធានាធិបតី ស៊ី ជីនពីង បានធ្វើឱ្យប្រទេសនេះមិនគោរពសិទ្ធិមនុស្ស ប្រជាធិបតេយ្យ និងនីតិរដ្ឋ។ ការដែលកាត់ទោសសកម្មជនសិទ្ធិមនុស្សនៅទិវាសិទ្ធិមនុស្សអន្តរជាតិ គឺជាចេតនាក្នុងការព្យាយាមបង្ហាញពីការប្រឆាំងរបស់ខ្លួនទៅនឹងគុណតម្លៃជាសាកល»។
ទាំងលោក Hu និងលោក Chen បានជំរុញឱ្យសហគមន៍អន្តរជាតិផ្តោតអារម្មណ៍លើសំណុំរឿងរបស់លោក Hao និងតស៊ូមតិឱ្យមានការដោះលែងលោកដោយឥតលក្ខខណ្ឌ។
សកម្មជនជាច្រើនផ្សេងទៀតបានប្រាប់ VOA ថា ពួកគេត្រូវបានគេតាមដានកាន់តែតឹងរ៉ឹងនៅមុនទិវាសិទ្ធិមនុស្ស។
អ្នកកាសែតចូលនិវត្តន៍មួយរូបអ្នកស្រី Gao Yu បានប្រាប់ VOA ថា ប៉ូលិសសម្ងាត់បានរារាំងមិនឱ្យអ្នកស្រីចូលរួមក្នុងព្រឹត្តិការណ៍នៅស្ថានទូតសហរដ្ឋអាមេរិកនៅក្នុងក្រុងប៉េកាំង។ អ្នកស្រី Gao បានបន្ថែមថា មេធាវីសិទ្ធិមនុស្ស អ្នកស្រី Wang Yu ត្រូវបានប៉ូលិសសម្ងាត់នាំទៅក្រុង Tianjin ដូច្នេះអ្នកស្រី ក៏មិនអាចចូលរួមព្រឹត្តិការណ៍ស្រដៀងគ្នានេះបានដែរនៅសា្ថនទូតអឺរ៉ុបដើម្បីអបអរសាទរទិវានេះ។
VOA ក៏ទទួលបានព័ត៌មានថា មេធាវីសិទ្ធិមនុស្ស លោក Li Heping លោក Wang Quanzhang និងគ្រួសាររបស់ពួកគេត្រូវហាមឃាត់មិនឱ្យចាកចេញពីផ្ទះផងដែរនៅថ្ងៃនោះ។ សូម្បីតែកូនៗរបស់ពួកគេក៏ត្រូវបានហាមឃាត់មិនឱ្យទៅសាលារៀនដែរ៕
