មហាសេដ្ឋីផ្នែកបណ្តាញសារព័ត៌មានហុងកុង និងជាសកម្មជនតស៊ូមតិខាងការគាំទ្រលទ្ធិប្រជាធបតេយ្យ លោក Jimmy Lai ត្រូវចាប់ខ្លួនជាថ្មី និងត្រូវបានចោទប្រកាន់ពីបទគៃបន្លំ។
លោក Jimmy Lai អាយុ៧៣ឆ្នាំ បានបង្ហាញមុខនៅក្នុងបន្ទប់តុលាការនៅថ្ងៃព្រហស្បតិ៍នេះ ជាមួយនឹងបុគ្គលិកថ្នាក់គ្រប់គ្រង២នាក់ផ្សេងទៀត នៃក្រុមហ៊ុនព័ត៌មាន Next Digital ដែលគេរាយការណ៍មកថា ពួកគេរងការចោទប្រកាន់ពីបទរំលោភលើលក្ខខណ្ឌជួលការិយាល័យបើកក្រុមហ៊ុន។
លោក Lai ត្រូវតុលាការបដិសេធមិនទទួលប្រាក់ធានាសុំនៅក្រៅឃុំ ហើយសំណុំរឿងលោកនឹងត្រូវពន្យារពេលរហូតដល់ខែមេសាឆ្នាំក្រោយ។
លោក Lai ត្រូវបានចាប់ខ្លួននៅផ្ទះរបស់លោកកាលពីខែសីហា ពីបទចោទនិងសង្ស័យថាបានសមគំនិតជាមួយបរទេស តាមច្បាប់សន្តិសុខជាតិថ្មីសម្រាប់ដែនដីហុងកុង ដែលត្រូវបានដាក់ឱ្យអនុវត្តដោយរដ្ឋាភិបាលចិន។ ជាច្រើនម៉ោងក្រោយពីការចាប់ខ្លួន មានមន្ត្រីប៉ូលិសជាង១០០នាក់ បានឆ្មក់ចូលលុកការិយាល័យកណ្តាលក្រុមហ៊ុនលោក Lai ហៅថា Next Digital ដែលបោះពុម្ភផ្សាយកាសែត Apple Day ។ ការសែតនេះបានផ្សាយបន្តបន្ទាល់ពីការចុះបង្ក្រាបដោបានបង្ហាញពីការលុកលុយចូលក្នុងការិយាល័យ ខណ:ដែលប៉ូលិសបានរុះរើទិន្នន័យឯកសាររបស់អ្នកយកព័ត៌មាន ខណៈពេលលោក Lai បាននាំខ្លួនកាត់បន្ទប់ព័ត៌មាន ដោយមានដៃជាប់ខ្នោះ។
លោកគឺជាមនុស្សម្នាក់ក្នុងចំណោម១០នាក់ ដែលត្រូវចាប់ខ្លួននៅថ្ងៃនោះ ដោយរួមមានកូនប្រុសរបស់លោកយ៉ាងតិចម្នាក់ផងដែរ។
ការចាប់ខ្លួនលោក Lai កាលពីថ្ងៃព្រហស្បតិ៍ កើតមានឡើងតែមួយថ្ងៃក្រោយពីសកម្មជនវ័យក្មេងហុងកុង៣រូបគឺ លោក Joshua Wong នាង Agnes Chow និងលោក Ivan Lam ត្រូវកាត់ទោសឲ្យជាប់ពន្ធនាគារពី៧ខែដល់១៣ខែកន្លះ ពីរឿងជាប់ទាក់ទងបាតុកម្មនៅក្រៅស្នាក់ការកណ្តាលប៉ូលិសកាលពីខែមិថុនា ឆ្នាំ២០១៩៕
