អង្គការសហប្រជាជាតិ បានរង់ចាំរដ្ឋាភិបាលក្រុងប៉េកាំងអស់ជាងមួយទសវត្សរ៍ដើម្បីសុខចិត្តទទួលយកសេចក្តីអញ្ជើញឲ្យបេសកជនពិសេសរបស់ខ្លួនស្តីពីភាពក្រីក្រ និងសិទ្ធិមនុស្សទៅបំពេញទស្សនកិច្ចនៅប្រទេសចិន។ ក៏ប៉ុន្តែ នៅទីបញ្ចប់ពេលដែលរដ្ឋាភិបាលក្រុងប៉េកាំង បានយល់ព្រមសំណើ និងអនុញ្ញាតឲ្យលោក Philip Alstonបេសកជនពិសេសរបស់អង្គការសហប្រជាជាតិទៅបំពេញទស្សនកិច្ចនៅខែនេះ លោកបានត្រូវពួកអាជ្ញាធរតាមដាន ហើយបានរារាំងមិនឲ្យជួបជាមួយពួកសាស្រ្តាចារ្យសាកលវិទ្យាល័យ។
ពួកអ្នកគាំទ្រសិទ្ធិមនុស្ស បាននិយាយថា ការព្យាបាទរបស់ពួកអាជ្ញាធរលើលោក Alston ក្នុងអំឡុងនៃដំណើរទស្សនកិច្ចរបស់លោក បង្ហាញពីការខ្វះភាពស្មោះត្រង់របស់ពួកអាជ្ញាធរ។ ចិនបានបដិសេធថា ខ្លួនបានរឹតត្បិតសកម្មភាពរបស់លោក Alton ហើយបានចោទប្រកាន់លោកពីការភូតកុហក។
នៅឯសន្និសីទមួយបន្ទាប់ពីដំណើរបំពេញទស្សនកិច្ចរយៈពេល៩ថ្ងៃរបស់លោក លោក Alston បានប្រាប់ពួកអ្នកយកព័ត៌មានថា លោកបានបញ្ជូនបញ្ជីឈ្មោះរបស់សាស្រ្តាចារ្យសាកលវិទ្យាល័យដែលលោកចង់ជួបក្នុងអំឡុងនៃដំណើរបំពេញទស្សនកិច្ចរបស់លោក។ នៅពេលដែលលោក បានអញ្ជើញទៅដល់ លោកបានត្រូវគេប្រាប់ថា សាស្ត្រាចារ្យសាកលវិទ្យាល័យទាំងនោះជាច្រើន បានត្រូវគេប្រាប់ថា ពួកគេគួរតែឈប់សម្រាកវិសមកាល។
លោក Alstonបានមានប្រសាសន៍ថា «រដ្ឋាភិបាលបានយល់ថា បេសកជនពិសេសរបស់អង្គការសហប្រជាជាតិដូចជាភ្ញៀវការទូតអញ្ចឹងហើយភ្ញៀវនោះ ត្រូវបានគេបានផ្តល់ឲ្យនូវសន្តិសុខដោយការតាមមើលគ្រប់ទីកន្លែងដែលលោកបានទៅ។ លោកនិយាយថា ភ្ញៀវនោះ ត្រូវបានគេការពារដោយមិនអនុញ្ញាតឲ្យជួបជាមួយបុគ្គលឯកជនដោយគ្មានការផ្តល់ដំណឹងជាមុនដល់រដ្ឋាភិបាល»។
លោក Alston បានសរសើរការខំប្រឹងប្រែងរបស់ចិនដើម្បីលុបបំបាត់ភាពក្រីក្រក្នុងរយៈពេលប៉ុន្មានឆ្នាំថ្មីៗនេះដោយលោកបានហៅការខំប្រឹងប្រែងទាំងនេះថា ជាការដ៏អស្ចារ្សមួយ៕
