អាជ្ញាធរដែនដីភាគខាងជើងប្រទេសអូស្តា្រលីបានទិញសត្វលាព្រៃមួយហ្វូងដាក់នៅក្នុងស្ថានីយ៍ស្រាវជ្រាវមួយនៅជិតទីក្រុង Katherine ដែលជាទីក្រុងដាច់ស្រយាលមួយ។ កាលពីដើមខែនេះប្រតិភូអ្នកជំនួញចិនបានធ្វើទស្សនកិច្ចនៅស្ថានីយ៍ស្រាវជ្រាវនេះហើយក្រុមហ៊ុនចិនចំនួន៥០ក្រុមហ៊ុនមានចំណាប់អារម្មណ៍ចង់ទិញដីដើម្បីធ្វើជាកសិដ្ឋានចិញ្ចឹមសត្វលា។
មានការប៉ាន់ស្មានថា សត្វលាព្រៃជិត៦ម៉ឺនក្បាលនៅក្នុងដែនដីភាគខាងជើងប្រទេសអូស្ត្រាលី។ សត្វលាត្រូវបានគេនាំយកទៅប្រទេសអូស្រា្តលីពីតំបន់អាហ្វ្រិក យកទៅ ដឹកជញ្ជូនសម្ភារៈកាលពីទសវត្សរ៍១៨៦០ ហើយសត្វលាជាច្រើនត្រូវបានគេព្រលែងចោលនៅពេលគេលែងត្រូវការពួកវាទៀត។ ជាច្រើនឆ្នាំមកនេះសត្វលាព្រៃត្រូវបានពួកកសិករចាត់ទុកជាសត្វចង្រៃ។ សត្វលាព្រៃទាំងនេះជាប្រភេទសត្វបំផ្លាញរុក្ខជាតិក្នុងតំបន់ ធ្វើឲ្យស្មៅដុះរាលដាល និងដណ្តើមអាហារនិងទឹកពីសត្វគោក្នុងស្រុក។
ឥឡូវនេះពួកអាជ្ញាធរជឿថាសត្វលាព្រៃផ្តល់អត្ថប្រយោជន៍សេដ្ឋកិច្ចជាច្រើន។
លោក Alister Trier ប្រធាននាយកដ្ឋានឧស្សហកម្មចម្បងនៃដែនដីភាគខាងជើង ជឿថាពាណិជ្ជកម្មសត្វលាគឺជាជំនួញដ៏ល្អទៅថ្ងៃអនាគត។ លោកបានមានប្រសាសន៍ថា៖ «ខ្ញុំគិតថាឧស្សាហកម្មនេះនឹងរីកចម្រើន ប៉ុន្តែវានឹងមិនជំនួសឲ្យឧស្សាហកម្មសត្វគោនោះទេ។ ខ្ញុំមិនគិតថាវានឹងកើតឡើងទេ។ អ្វីដែលនឹងកើតឡើងគឺថាជំនួញសត្វលានឹងបន្ថែមឱកាសក្នុងការប្រើប្រាស់ដីវាលស្មៅ និងដីរបស់ពួកជនជាតិដើមនៅក្នុងដែនដីភាគខាងជើងប្រទេសអូស្រា្តលី»។
នៅប្រទេសចិន គេយកស្បែកសត្វលាទៅស្ងោរចម្រាញ់ធ្វើជាប្រូតេអ៊ីន សម្រាប់ធ្វើជាថ្នាំចិនសែន និងគ្រឿងសម្អាង។
ក្រុមធ្វើយុទ្ធនាការដើម្បីសិទ្ធិរបស់សត្វកំពុងដាក់សម្ពាធពួកអាជ្ញាធរកុំអនុញ្ញាតឲ្យ
នាំចេញសត្វលាទៅប្រទេសចិន ដោយពួកគេអះអាងថាការដឹកជញ្ជូនមានសភាពព្រៃផ្សៃ និងមិនអាចទទួលយកបាន។
ពួកសកម្មជនក៏ទាមទារថាសត្វលាមានជំងឺនៅពេលគេដាក់វានៅក្នុងហ្វូងដ៏ច្រើន។
អង្គការ Royal Society សម្រាប់ទប់ស្កាត់អំពើឃោរឃៅទៅលើសត្វ នៅក្នុងប្រទេស អូស្ត្រាលីចង់បញ្ឈប់ការជួញដូរសត្វលាទាំងអស់ ដោយសារពួកគេបារម្ភថា សត្វទាំងនោះនឹងត្រូវគេបកយកស្បែកទាំងរស់និងរងអំពើព្រៃផ្សៃផ្សេងៗទៀត៕
ប្រែសម្រួលដោយស៊ូ ពេជ្រចិន្តា
