អាជ្ញាធរកម្ពុជាត្រៀមខ្លួនក្នុងការទប់ទល់នឹងទឹកជំនន់ ខណៈកម្ពស់ទឹកទន្លេមេគង្គកំពុងហក់ឡើង ហើយតំបន់ ខេត្តមួយចំនួនកំពុងជន់លិចដោយសារទឹកភ្លៀង។
បើតាមក្រសួងធនធានទឹក និងឧតុនិយម ចាប់ពីថ្ងៃទី ១៨ ដល់ថ្ងៃទី ២៣ ខែកញ្ញា ឆ្នាំ ២០២៤ កម្ពុជានឹងទទួលរងឥទ្ធិពលពីព្យុះទី ១៤ ឈ្មោះពូលឡាសាន (Pulasan) និងពីប្រព័ន្ធវិសម្ពាធ និងរបបខ្យល់មូសុងនិរតី ដែលមានឥទ្ធិពលខ្លាំងលើកម្ពុជា បណ្តាលឱ្យមានភ្លៀង ផ្គរ រន្ទះច្រើនលើសពីកម្រិតធម្មតា។
លោក ចាន់ យុត្ថា អ្នកនាំពាក្យក្រសួងធនធានទឹក និងឧតុនិយម ប្រាប់វីអូអេនៅថ្ងៃពុធនេះថា បច្ចុប្បន្នខេត្តចំនួន ៤ នៅជាប់ទន្លេមេគង្គអាចប្រឈមទឹកជំនន់។ លោកអំពាវនាវឱ្យប្រជាពលរដ្ឋនៅបណ្តាខេត្តទាំងនោះប្រុងប្រយ័ត្ននឹងគ្រោះទឹកជំនន់ដែលអាចកើតមាននាពេលខាងមុខ។
លោកបញ្ជាក់ថា៖ «យើងក៏មានការអំពាវនាវឱ្យប្រជាពលរដ្ឋមានការប្រុងប្រយ័ត្នដែរទាក់ទងនឹងជំនន់ទន្លេមេគង្គ ដែលបន្តកើនឡើងពីមួយថ្ងៃទៅមួយថ្ងៃ ជាពិសេសនៅខេត្តទាំង ៤ នៅតំបន់ទន្លេមេគង្គលើរបស់កម្ពុជា គឺមានស្ទឹងត្រែង ក្រចេះ ត្បូងឃ្មុំ និងខេត្តកំពង់ចាម ដែលទឹកអាចឈានទៅដល់កម្រិតឱ្យមានការប្រុងប្រយ័ត្ន»។
បើតាមលោក ចាន់ យុត្ថា អាជ្ញាធរមានសមត្ថកិច្ចបានត្រៀមខ្លួនរួចរាល់ដើម្បីអន្តរាគមន៍។
លោកបញ្ជាក់ថា៖ «ការសង្គ្រោះគឺយើងមានជាបន្តបន្ទាប់ ពេលដែលមាន គ្រោះមហន្តរាយ។ យើងឃើញមិនតែពេលនេះទេ។ ពេលណាក៏ដោយឱ្យតែមានគ្រោះមហន្តរាយកើតឡើង យន្តការគ្រប់ថ្នាក់ ទាំងថ្នាក់ជាតិ ក៏ដូចជាថ្នាក់ក្រោមជាតិ មានដូចជាកាកបាទក្រហមកម្ពុជា មានគណៈកម្មាធិការជាតិគ្រប់គ្រងគ្រោះមហន្តរាយ តែងតែជួយអន្តរាគមន៍ជាប់ជាប្រចាំ»។
បើតាមព្រឹត្តិបត្រព័ត៌មាន និងព្យាករណ៍កម្ពស់ទឹករបស់ក្រសួងធនធានទឹក និងឧតុនិយម ស្ថានីយជលសាស្ត្រទន្លេមេគង្គ ទន្លេសាប និងទន្លេបាសាក់ ទឹកបាននិងកំពុងឡើងជាបន្តបន្ទាប់ នៅថ្ងៃទី ១៨ ខែកញ្ញា ឆ្នាំ ២០២៤ នេះ ខណៈខេត្តក្រចេះដែលជាខេត្តជាប់ទន្លេមេគង្គមានកម្ពស់ទឹក ២០,២២ម៉ែត្រ ហើយកម្ពស់ដែលត្រូវប្រុងប្រយ័ត្នមាន ២២ម៉ែត្រ។
លោក សុទ្ធ គឹមកុលមុនី អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ ប្រាប់វីអូអេដែរថា ក្នុងរយៈពេលប៉ុន្មានសប្តាហ៍នេះ ប្រទេសក្នុងតំបន់មួយចំនួនបានរងផលប៉ះពាល់ពីព្យុះ ដែលធ្វើឱ្យកម្ពុជាក៏រងផលប៉ះពាល់តិចតួចដែរ។ លោកថា ផលប៉ះពាល់តិចតួចនេះបានធ្វើឱ្យមានភ្លៀងធ្លាក់ច្រើនតាមតំបន់មួយចំនួន ហើយនាំឱ្យមានទឹកជំនន់បន្តិចបន្តួច។
លោកបញ្ជាក់ថា៖ «តាមការព្យាកររបស់ជំនាញបង្ហាញថា នាពេលខាងមុខនឹងមានភ្លៀងរាយប៉ាយទូទាំងប្រទេសក្នុងបរិមាណមួយដែលអាចនឹងមានជំនន់ទឹកភ្លៀង ហើយស្របនៅពេលនេះដែរ ទឹកទន្លេមេគង្គកំពុងតែហក់ឡើងជាមួយគ្នាដែរ។ អ៊ីចឹងស្ថានភាពនៃការកើតនូវជំនន់ទឹកភ្លៀង ឬក៏ជំនន់ទន្លេអាចកើតមាននៅពេលខាងមុខ ប៉ុន្តែនៅក្នុងទំហំមួយដែលថា មិនធ្ងន់ធ្ងរនោះទេ»។
លោក សុទ្ធ គឹមកុលមុនី បន្ថែមថា អាជ្ញាធរបានត្រៀមខ្លួនរួចរាល់ តាមរយៈការត្រៀមកម្លាំង មធ្យោបាយ សម្ភារៈ ការតាមដាន និងប្រកាសឱ្យប្រជាពលរដ្ឋប្រុងប្រយ័ត្ន។
នៅថ្ងៃទី ១៨ ខែកញ្ញានេះ នៅតាមបណ្តាញសង្គមមានការបង្ហោះរូបភាព និងវីដេអូអំពីការជន់លិចដោយកន្លែង។ ក្នុងនោះមានខេត្តក្រចេះ ខេត្តព្រះសីហនុ ខេត្តកំពង់ចាម និងខេត្តត្បូងឃ្មុំជាដើម។
បើតាមព័ត៌មានផ្សព្វផ្សាយនៅលើបណ្តាញសង្គមហ្វេសប៊ុកនៅថ្ងៃពុធនេះ រមណីយដ្ឋាន «ទឹកធ្លាក់ក្បាលឆាយ» ក្នុងខេត្តព្រះសីហនុ រងការជន់លិច ខណៈនៅចន្លោះគីឡូម៉ែត្រលេខ១៦៨ និង១៦៩ ស្ថិតក្នុងភូមិមួយ ឃុំទំនប់រលក ស្រុកស្ទឹងហាវ ខេត្តព្រះសីហនុ មានករណីទឹកហូរកាត់ផ្លូវល្បឿនលឿនភ្នំពេញ-ព្រះសីហនុ។
ក្នុងសារសំឡេងពិសេសនៅថ្ងៃទី ១៨ ខែកញ្ញា ឆ្នាំ ២០២៤ នាយករដ្ឋមន្ត្រីកម្ពុជាលោក ហ៊ុន ម៉ាណែត បានណែនាំមន្ត្រីពាក់ព័ន្ធទាំងអស់ ត្រៀមលក្ខណៈអន្តរាគមន៍ ជួយសង្គ្រោះប្រជាពលរដ្ឋ ក្នុងករណីគ្រោះទឹកជំនន់កើតមានជាយថាហេតុ។
លោក ហ៊ុន ម៉ាណែត ថ្លែងថា៖ «ដោយសារឥទ្ធិពលព្យុះបានធ្វើឱ្យមានភ្លៀងធ្លាក់ច្រើនជាបន្តបន្ទាប់ ដែលបង្កលិចលង់នៅបណ្តាប្រទេសជិតខាងយើង។ អាស្រ័យហេតុនេះសូមឯកឧត្តម លោកជំទាវ អភិបាលនៃគណៈអភិបាលរាជធានី ខេត្តទាំងអស់ បង្កើនការយកចិត្តទុកដាក់ ប្រុងប្រយ័ត្នខ្ពស់ តាមដានឱ្យជាប់ និងដោះស្រាយឱ្យទាន់ពេលវេលា នៅក្នុងករណីដែលមានទឹកជំនន់ប៉ះពាល់នៅក្នុងភូមិសាស្ត្រទទួលខុសត្រូវរបស់ខ្លួន ជាពិសេសយកចិត្តទុកដាក់ទៅលើការជួយសង្គ្រោះអាយុជីវិត និងទ្រព្យសម្បត្តិរបស់ប្រជាពលរដ្ឋដែលរងផលប៉ះពាល់»។
គណៈកម្មាធិការទន្លេមេគង្គ នៅថ្ងៃទី ១៦ ខែកញ្ញានេះប្រកាសថា នៅចន្លោះថ្ងៃទី ១៧ ដល់ ២១ ខែកញ្ញា នឹងមានភ្លៀងធ្លាក់ខ្លាំងនៅភាគកណ្ដាលនៃអាងទន្លេមេគង្គ ដូចជាកំពង់ស្ពឺ កំពង់ធំ ក្រចេះ មណ្ឌលគិរី ព្រះវិហារ ស្ទឹងត្រែង និងរតនគិរី៕
វេទិកាបញ្ចេញមតិ