ព្រះមហាក្សត្រព្រះបាទ នរោត្តម សីហមុនី និងព្រះមហាក្សត្រី នរោត្តម មុនីនាថ សីហនុ នឹងយាងទៅពិនិត្យព្រះរាជសុខភាពនៅទីក្រុងប៉េកាំងនៅថ្ងៃពុធស្អែកនេះ ស្របពេលដែលប្រទេសកម្ពុជាកំពុងជួបវិបត្តិនៃការរាតត្បាតវីរុសកូរ៉ូណា។
ព្រះរាជសាររបស់ព្រះមហាក្សត្រចេញនៅថ្ងៃទី៣១ ខែមីនានេះ បញ្ជាក់ថា ព្រះមហាក្សត្រ និងព្រះវររាជមាតា នឹងយាងទៅពិនិត្យ ព្យាបាលព្រះរាជសុខភាព នៅទីក្រុងប៉េកាំង ប្រទេសចិន នៅថ្ងៃទី១ ខែមេសានេះ។ ព្រះរាជសារមានន័យដើមថា៖ «នៅក្នុងឱកាសអវត្តមានរបស់ទូលព្រះបង្គំ ខ្ញុំព្រះករុណា ខ្ញុំ ខាងលើនេះ សម្តេចវិបុល សេនាភក្តី សាយ ឈុំ ប្រធានព្រឹទ្ធសភា នឹងទទួលជួយទូលព្រះបង្គំ ខ្ញុំព្រះករុណា ខ្ញុំ ក្នុងឋានៈជាប្រមុខរដ្ឋស្តីទីនៃព្រះរាជាណាចក្រកម្ពុជា»។
ព្រះអង្គម្ចាស់ ស៊ីសុវត្ថិ ធម្មិកោ អតីតព្រះរាជលេខាផ្ទាល់របស់ព្រះបរមរតនកោដ្ឋ មានបន្ទូលប្រាប់VOAនៅថ្ងៃអង្គារនេះថា ព្រះមហាក្សត្រមានគម្រោងយាងទៅពិនិត្យព្រះរាជសុខភាព តាំងពីខែកុម្ភៈមក ប៉ុន្តែដោយសារមានការផ្ទុះឡើងមេរោគកូរ៉ូណា ទើបគ្រូពេទ្យនៅប៉េកាំងគាល់ព្រះមហាក្សត្រ ឲ្យយាងទៅនៅដើមខែមេសាវិញ។
យ៉ាងណាក្តីព្រះអង្គម្ចាស់ធម្មិកោមិនទាន់អាចបញ្ជាក់ថា ព្រះមហាក្សត្រនឹងយាងមកកម្ពុជាវិញនៅពេលណានៅឡើយទេ។
«ទៅតាមច្បាប់ចិនសព្វថ្ងៃហ្នឹង បរទេសចេញចូលប្រទេសចិនត្រូវតែឃុំទុក១៥ថ្ងៃ ដូច្នេះប្រហែលជាគេនឹងរៀបចំផែនការហ្នឹងទៅថ្វាយលោកដែរ ដូច្នេះផែនការពិនិត្យសុខភាពរបស់លោក មិនអាចនឹងធ្វើភ្លាមៗបានទេ។ ដូច្នេះប្រហែលជាយ៉ាងអន់ណាស់ក៏៣សប្តាហ៍ទៅ៤សប្តាហ៍ដែរ។ តាមការស្មានទេណា ព្រោះខ្ញុំអត់មានអីច្បាស់លាស់ដែរ»។
មិនមានការបញ្ជាក់ជាផ្លូវការនៅឡើយទេថា មូលហេតុអ្វីបានជាព្រះមហាក្សត្រទ្រង់ត្រូវយាងចេញទៅក្រៅប្រទេសនាពេលនេះ ខណៈកម្ពុជាកំពុងជួបវិបត្តិនៃការរាលដាលវីរុសកូរ៉ូណា។ ព្រះអង្គបានយាងទៅប្រទេសចិនចុងក្រោយ កាលពីថ្ងៃទី២៦ ខែសីហា ឆ្នាំ២០១៩ ដើម្បីពិនិត្យព្រះរាជសុខភាព។
ការយាងចេញរបស់ព្រះមហាក្សត្រនៅថ្ងៃស្អែកនេះ ធ្វើឡើងក្រោយការប្រកាសរបស់លោកនាយករដ្ឋមន្រ្តី ហ៊ុន សែន កាលពីថ្ងៃច័ន្ទ ដែលថារដ្ឋាភិបាលរបស់លោកបានបញ្ចប់សេចក្តីព្រាងច្បាប់មួយសម្រាប់ត្រៀមដាក់ប្រទេសក្នុងគ្រាអាសន្ន នៅពេលដែលរដ្ឋាភិបាលយល់ថា ត្រូវប្រើកម្លាំងសន្តិសុខដើម្បីបង្ការការរាតត្បាតវីរុសកូរ៉ូណា។
លោក ហ៊ុន សែន បញ្ជាក់ថា ច្បាប់នេះនឹងត្រូវដាក់ទៅគណៈរដ្ឋមន្រ្តីដើម្បីអនុម័តនៅសប្តាហ៍នេះ ទើបបញ្ជូនទៅរដ្ឋសភាដើម្បីពិនិត្យ និងប្រកាសប្រើប្រាស់ជាប្រញាប់ដោយព្រះមហាក្សត្រ។
លោក ម៉ម ប៊ុននាង អ្នកនាំពាក្យព្រឹទ្ធសភា ប្រាប់VOAថា ព្រឹទ្ធសភាទើបតែបានទទួលព្រះរាជសាររបស់ព្រះមហាក្សត្រនិងត្រៀមមន្រ្តីដើម្បីជំនួសប្រធានព្រឹទ្ធសភាក្នុងការដឹកនាំប្រជុំ។ លោកបន្ថែមថា សេចក្តីព្រាងច្បាប់ពាក់ព័ន្ធនឹងការដាក់ប្រទេសក្នុងភាពអាសន្ន នឹងត្រូវចុះហត្ថលេខាជំនួសដោយលោក សាយ ឈុំ ដែលជាប្រមុខរដ្ឋស្តីទី ប្រសិនបើសេចក្តីព្រាងច្បាប់នេះត្រូវបានអនុម័តដាក់ឲ្យប្រើប្រាស់នៅមុនពេលដែលព្រះមហាក្សត្រយាងត្រឡប់មកវិញ។
អ្នកនាំពាក្យព្រឹទ្ធសភារូបនេះបន្ថែមថា ក្នុងករណីមានការប្រកាសដាក់ប្រទេសក្នុងភាពអាសន្ន លោកមិនទាន់អាចបញ្ជាក់បានថា តើត្រូវតែជាព្រះមហាក្សត្រជាអ្នកប្រកាស ឬក៏ប្រមុខរដ្ឋស្តីទីអាចប្រកាសជំនួសបាននៅពេលព្រះមហាក្សត្រអវត្តមាន ដោយលោកថា រង់ចាំសេចក្តីព្រាងច្បាប់ចេញជាផ្លូវការជាមុនសិន។
«ទាល់តែតាក់តែងច្បាប់ហ្នឹងហើយបានយើងអាចសន្និដ្ឋានដឹង។ ក៏ប៉ុន្តែរាល់ការស្នើដាក់ប្រទេសជាតិក្នុងភាពអាសន្ននោះ ទាល់តែមានការស្នើពីព្រះមហាក្សត្រហើយមានការឯកភាពពីនាយករដ្ឋមន្រ្តី ឬក៏ប្រធានរដ្ឋសភា ប្រធានព្រឹទ្ធសភាផងដែរ។ អាហ្នឹងក្នុងរដ្ឋធម្មនុញ្ញបានចែងអញ្ចឹង»។
លោក មាស នី អ្នកសិក្សាពីការវិវត្តសង្គម និងជាអ្នកវិភាគនយោបាយលើកឡើងថា ការព្រាងច្បាប់ពាក់ព័ន្ធនឹងការដាក់ប្រទេសក្នុងភាពអាសន្ន ត្រូវធានាថា ធ្វើឡើងដោយតម្លាភាព និងមានគោលការណ៍ក្នុងការការពារប្រយោជន៍របស់ប្រជាពលរដ្ឋ ជាពិសេសការរក្សាស្ថិរភាពស្បៀងអាហារ។
«រដ្ឋត្រូវតែធ្វើម៉េចផ្តល់នូវតុល្យភាពទាំងពីរពីការអនុវត្តប្រទេសនៅក្នុងករណីអាសន្នគឺយើងបិទសិទ្ធិសេរីភាពរបស់មនុស្សក្នុងការទំនាក់ទំនងដើរចុះឡើងដើម្បីកុំឲ្យឆ្លង ប៉ុន្តែរដ្ឋត្រូវមានចំណែកណាមួយដែលបម្រុងសម្រាប់ទប់ទល់ ផ្តល់ជីវភាពប្រជាពលរដ្ឋ នៅពេលដែលយើងមានបញ្ហាកង្វះស្បៀងកង្វះអី។ ហើយកិច្ចការអស់នេះវាត្រូវតែចេញជាគោលការណ៍ ជាគោលនយោបាយមួយច្បាស់លាស់»។
សម្រាប់ព្រះអង្គម្ចាស់ ធម្មិកោ មានព្រះបន្ទូលថា ការព្រាងច្បាប់ពាក់ព័ន្ធនឹងការដាក់ប្រទេសក្នុងគ្រាអាសន្នក្នុងគោលដៅដើម្បីគ្រប់គ្រងស្ថានភាពមេរោគកូរ៉ូណាជា «មូលហេតុមិនសមហេតុផល»។ ព្រះអង្គម្ចាស់បន្តថា កម្ពុជាមានរដ្ឋធម្មនុញ្ញដែលជាច្បាប់កំពូលចែងអំពីការដាក់ប្រទេសក្នុងភាពអាសន្ន ដូច្នេះលោកថា ការធ្វើសេចក្តីព្រាងច្បាប់នេះ អាចដោយសាររដ្ឋាភិបាលមានផែនការផ្សេង។
លោក ហ៊ុន សែន បានថ្លែងកាលពីថ្ងៃចន្ទថា ច្បាប់នេះធ្វើឡើងដើម្បីការពារអាយុជីវិតរបស់ប្រជាពលរដ្ឋ មិនមែនដើម្បីបំបិទសំឡេងរបស់ក្រុមប្រឆាំងនោះទេ៕
