សមាគមចំនួន ៣ ដែលធ្វើការក្នុងវិស័យហិរញ្ញវត្ថុនៅកម្ពុជាបានកំណត់បទដ្ឋានក្រមប្រតិបត្តិបន្ថែមដល់គ្រឹះស្ថានហិរញ្ញវត្ថុទាំងអស់ឲ្យអនុវត្តតាម ដើម្បីឈានទៅដល់ស្តង់ដារួមគ្នាមួយ ហើយដើម្បីបង្កើនតម្លាភាពដល់អ្នកប្រើប្រាស់ និងការយល់ដឹងកាន់តែល្អប្រសើរនូវសេវារបស់គ្រឹះស្ថានទាំងអស់។
ការដាក់ឲ្យប្រើប្រាស់ក្រមប្រតិបត្តិនេះ គឺដើម្បីធានាផលប្រយោជន៍កិច្ចការពារដល់អតិថិជន និងគ្រឹះស្ថានហិរញ្ញវត្ថុ កុំឲ្យមានហានិភ័យណាមួយកើតឡើងដោយប្រការណាមួយ និងដើម្បីលើកកម្ពស់ប្រសិទ្ធភាពទំនុកចិត្ត គណនេយ្យភាព ទំនួលខុសត្រូវក្នុងការប្រកបវិជ្ជាជីវៈធនាគារនិងហិរញ្ញវត្ថុ និងដើម្បីបង្កើនតម្លាភាពសម្រាប់អ្នកប្រើប្រាស់ក្នុងការយល់ដឹងឲ្យកាន់តែល្អប្រសើរ នូវអ្វីដែលពួកគេរំពឹងទុកពីសេវាដែលនឹងត្រូវបានផ្តល់ជូន។ នេះបើតាមការប្រកាសរបស់សមាគមទាំងនោះ នៅក្នុងកិច្ចប្រជុំមួយកាលពីព្រឹកថ្ងៃសុក្រ។
ស្ថាប័នទាំងនោះរួមមានសមាគមធនាគារនៅកម្ពុជា សមាគមមីក្រូហិរញ្ញវត្ថុកម្ពុជា និងសមាគមសហព័ន្ធហិរញ្ញវត្ថុនិងបច្ចេកវិទ្យានៃកម្ពុជា។
គោលបំណងផ្សេងទៀតនៃការដាក់ចេញក្រមនេះ គឺដើម្បីកសាងទំនាក់ទំនងល្អប្រកបដោយភាពស្មោះត្រង់និងមានវិជ្ជាជីវៈរវាងអ្នកប្រើប្រាស់និងគ្រឹះស្ថានហិរញ្ញវត្ថុ ដោយផ្អែកលើគោលការណ៍សមធម៌ និងសមភាពដើម្បីបង្កើនទំនុកចិត្តលើប្រព័ន្ធធនាគារ និងហិរញ្ញវត្ថុ និងដើម្បីលើកទឹកចិត្តឲ្យមានវប្បធម៌ល្អក្នុងការធ្វើអាជីវកម្មនិងការប្រកួតប្រជែងដោយភាពស្មោះត្រង់។
ក្រមប្រតិបត្តិនៃវិស័យធនាគារនិងហិរញ្ញវត្ថុ ហៅកាត់ថា «ក្រម» ត្រូវបានអនុម័តឲ្យប្រើប្រាស់លើកទីមួយកាលពីថ្ងៃទី ១៦ ខែកុម្ភៈឆ្នាំ ២០១៥ ដោយសមាគមធនាគារនៅកម្ពុជា។
លោក រ័ត្ន សុវណ្ណនរៈ អគ្គនាយកត្រួតពិនិត្យនៃធនាគារជាតិនៃកម្ពុជា (NBC) បានថ្លែងក្នុងពិធីសម្ពោធដាក់ឲ្យប្រើប្រាស់ «ក្រមប្រតិបត្តិសម្រាប់វិស័យធនាគារនិងហិរញ្ញវត្ថុ» ថា ក្រមនេះ គឺជាគោលការណ៍រួមនិងស្តង់ដាអប្បបរមាមួយសម្រាប់គ្រឹះស្ថានហិរញ្ញវត្ថុ អនុវត្តក្នុងការផ្តល់សេវាហិរញ្ញវត្ថុប្រកបដោយតម្លាភាព និងការទទួលខុសត្រូវ។ លោកបន្តថា ក្រមប្រតិបត្តិនេះ គឺជាបទបញ្ញត្តិនិងគោលការណ៍ផ្ទាល់ខ្លួន សម្រាប់អនុវត្តបន្ថែមលើបទបញ្ញត្តិនានាដែលចេញដោយធនាគារជាតិនៃកម្ពុជា។
លោកថ្លែងថា៖ «ធនាគារជាតិនៃកម្ពុជាជឿជាក់ថា ក្រមប្រតិបត្តិនេះ នឹងក្លាយជាគោលការណ៍រួមសម្រាប់គ្រឹះស្ថានធនាគារ និងហិរញ្ញវត្ថុក្នុងការបង្កើតតម្លាភាពក្នុងការផ្តល់សេវា និងកិច្ចការពារអតិថិជន និងកសាងទំនាក់ទំនងល្អ ការប្រកួតប្រជែងដោយស្មើភាព និងស្មោះត្រង់ ដើម្បីឲ្យប្រព័ន្ធធនាគារ រីកចម្រើនប្រកបដោយបរិយាបន្ន»។
លោកបន្តថា ក្រមប្រតិបត្តិនេះនឹងជួយពង្រឹងបន្ថែមទៀតដល់មន្ត្រីទទួលបន្ទុកក្នុងការផ្តល់សេវាហិរញ្ញវត្ថុ និងឥណទានដល់ប្រជាពលរដ្ឋ ប្រកបដោយក្រមសីលធម៌វិជ្ជាជីវៈត្រឹមត្រូវ ដោយកន្លងមកបុគ្គលិកគ្រឹះស្ថានមីក្រូហិរញ្ញវត្ថុមួយចំនួន មិនសូវមានការប្រាស្រ័យទាក់ទងល្អជាមួយអតិថិជន ឬប្រជាពលរដ្ឋ នៅពេលដែលពួកគេមានតម្រូវការហិរញ្ញវត្ថុនេះ។
លោក សុខ វឿន ប្រធានក្រុមប្រឹក្សាភិបាលសមាគមមីក្រូហិរញ្ញវត្ថុកម្ពុជា (CMA) និងជាប្រធានគ្រឹះស្ថានមីក្រូហិរញ្ញវត្ថុ អិលអូអិលស៊ី បានថ្លែងក្នុងពិធីសម្ពោធដាក់ឲ្យប្រើប្រាស់ «ក្រមប្រតិបត្តិ»នោះដែរថា ក្រមនេះពិតជាមានសារៈសំខាន់ខ្លាំងណាស់ ទាំងគ្រឹះស្ថានហិរញ្ញវត្ថុ និងអតិថិជនប្រើប្រាស់តែម្តង ដោយគ្រឹះស្ថានមីក្រូហិរញ្ញវត្ថុត្រូវតែបង្កើតផលិតផលមួយសមរម្យទៅតាមតម្រូវការរបស់អតិថិជនដែលចង់បាន និងតាមលទ្ធភាពជាក់ស្តែងរបស់អតិថិជន ដែលរួមមានសេវាកម្មសមរម្យ ប្រកបដោយសមធម៌ និងតម្លាភាព ដើម្បីកុំឲ្យអតិថិជនមានបំណុលលើសលប់ជាដើម។
លោកបន្តថា គ្រឹះស្ថានទាំងអស់ត្រូវផ្តល់ព័ត៌មានគ្រប់ជ្រុងជ្រោយ ដើម្បីឲ្យអតិថិជនដែលមានតម្រូវការហិរញ្ញវត្ថុ អាចពិចារណាបានត្រឹមត្រូវ។
លោកថ្លែងថា៖ «វិស័យធនាគារ ក៏ដូចជាអតិថិជនមុនពេលធ្វើអ្វីមួយ ឬកិច្ចសន្យាត្រូវតែមានតម្លាភាពត្រូវតែផ្តល់ព័ត៌មានឲ្យគ្រប់ជ្រុងជ្រោយឲ្យគ្រប់សាច់រឿង ហើយនឹងមានការយល់ទាំងអស់គ្នា ដើម្បីឲ្យការយល់ទាំងអស់ហ្នឹង ដែលធ្វើឲ្យមានការសម្រេចចិត្តត្រូវឬក៏ខុស ប្រសិនបើការសម្រេចចិត្តដោយមិនមានការយល់ច្បាស់ អត់មានតម្លាភាពទេ វាធ្វើឲ្យបញ្ហាហ្នឹង ការគិត ការសម្រេចចិត្តហ្នឹងខុស»។
លោកបន្តថា ប្រសិនបើអតិថិជនមានការមិនយល់ ឬមានការត្អូញត្អែរ មិនពេញចិត្តនូវគ្រឹះស្ថានមីក្រូហិរញ្ញវត្ថុ ឬធនាគារបានធ្វើ ឬបានបំពេញ គឺអតិថិជនមានសិទ្ធិក្នុងការសួរនាំគ្រឹះស្ថានដោយផ្ទាល់ ឬសមាគមទាំង ៣ ឬធនាគារជាតិ ដើម្បីរកដំណោះស្រាយ និងធានាថា ព័ត៌មានមួយគ្រប់ជ្រុងជ្រោយ និងការអនុវត្តបានពេញលេញតាមក្រមប្រតិបត្តិ។ ហើយករណីមន្ត្រីគ្រឹះសា្ថនណាមួយមិនបានអនុវត្តល្អតាមក្រម នោះវានឹងជះឥទ្ធិពលអាក្រក់ដល់ស្ថាប័នហរិញ្ញវត្ថុតែម្តង។
នាយករងទទួលបន្ទុកផ្នែកឃ្លាំមើលនៃអង្គការលីកាដូ លោក អំ សំអាត ប្រាប់វីអូអេនៅថ្ងៃសុក្រថាការកំណត់ស្តង់ដាប្រើប្រាស់«ក្រមប្រតិបត្តិសម្រាប់វិស័យធនាគារ និងហិរញ្ញវត្ថុ» ជារឿងល្អ ក្នុងការផ្តល់កម្ចីដល់ប្រជាពលរដ្ឋប្រកដដោយក្រមសីលធម៌ និងជាការលើកកម្ពស់ជីវភាពរបស់ប្រជាពលរដ្ឋ ដោយមិនបំពានសិទ្ធិ និងការការពារត្រឹមត្រូវជាដើម ពីព្រោះកន្លងមក លោកបានសម្គាល់ឃើញនូវភាពមិនប្រក្រតីរបស់មន្ត្រីឥណទានមួយចំនួន ទាក់ទងការនិយាយអូសទាញផ្តល់កម្ចីមិនគោរពតាមក្រមសីលធម៌ ដែលរួមមានការធ្វើឯកសារមិនសមស្រប ការផ្តល់កម្ចីមិនចំទិសដៅ និងការគំរាមកំហែងបំភិតបំភ័យ ឬបង្ខិតបង្ខំឲ្យលក់ដីសងបំណុលជាដើម។
លោកបន្តថា កន្លងមកធនាគារជាតិបានចេញគោណការណ៍ណែនាំច្រើនដែរ ប៉ុន្តែមិនទាន់បានក្លាយជាការគោរពនូវស្តង់ដាមួយល្អប្រសើរនៅឡើយទេ ។
លោកថ្លែងថា៖ «យ៉ាងណាក៏ដោយមកដល់ពេលនេះ វាអត់ទាន់បានក្លាយទៅជាការគោរពនូវស្តង់ដាអន្តរជាតិមួយនៃកម្ចីមីក្រូហិរញ្ញវត្ថុបាននៅឡើយ។ អ៊ីចឹងហើយបានទាមទារឲ្យមានការកែលម្អគោលនយោបាយ កែលម្អលើកិច្ចសន្យាផ្សេងៗ ឬក៏ធានា ជាពិសេសការធានាការពារដល់សិទ្ធិអ្នកខ្ចី»។
បើតាម «ក្រមប្រតិបត្តិសម្រាប់វិស័យធនាគារ និងហិរញ្ញវត្ថុ» ដែលមានកម្រាស់ ១៩ ទំព័រ និងត្រូវបានដាក់ឲ្យប្រើប្រាស់ជាផ្លូវការនៅថ្ងៃសុក្រនេះ គ្រឹះស្ថានធនាគារ និងហិរញ្ញវត្ថុត្រូវធានាថាបុគ្គលិក និងអ្នកតំណាងរបស់ខ្លួន ទទួលបានការតម្រង់ទិស និងទទួលបានការបណ្តុះបណ្តាលច្បាស់លាស់ ដើម្បីអាចបំពេញការងារប្រកបដោយសមត្ថភាព និងយល់ច្បាស់ពីក្រមនេះ ក្នុងការអនុវត្តសេវាកម្មជូនអ្នកប្រើប្រាស់បានឆាប់រហ័ស និងប្រកបដោយប្រសិទ្ធភាពជាដើម៕
