ចំនួនអ្នកឆ្លងកូវីដ១៩ក្នុងសហគមន៍លើកទី៣បន្តកើនឡើង ដោយមនុស្សសរុប៧៦នាក់ហើយ ត្រូវបានក្រសួងសុខាភិបាលរាយការណ៍ថាឆ្លងជំងឺកូវីដ១៩ ដែលភាគច្រើនជាជនជាតិចិន។ ការប្រកាសឆ្លងសហគមន៍ទ្រង់ទ្រាយធំ ធ្វើឡើងកាលពីថ្ងៃសោរ៍ ទី២០ ខែកុម្ភៈ ដោយមិនទាន់ដឹងប្រភពច្បាស់លាស់នៃការឆ្លងនៅឡើយទេ។
នៅក្នុងសេចក្តីប្រកាសព័ត៌មានមួយចេញផ្សាយកាលពីចុងសប្តាហ៍មុន ក្រសួងសុខាភិបាលបញ្ជាក់ថាអាជ្ញាធររកឃើញករណីដំបូង ក្រោយស្រ្តីជនជាតិចិនម្នាក់មកធ្វើតេស្ត ដើម្បីទទួលវិញ្ញាបនបត្រកូវីដ១៩ ក្នុងគោលបំណងត្រឡប់ទៅប្រទេសចិន ប៉ុន្តែលទ្ធផលតេស្តនេះវិជ្ជមានជំងឺកូវីដ១៩។ ស្រ្តីជនជាតិចិនម្នាក់នោះ អាយុ២៧ឆ្នាំ ស្នាក់នៅសណ្ឋាគារមួយនៅរាជធានីភ្នំពេញ ដែលបានទៅធ្វើតេស្ត កាលពីថ្ងៃទី១៨ ខែកុម្ភៈ។
ក្រោយរកឃើញករណីនេះ ក្រុមការងារឆ្លើយតបបន្ទាន់របស់ក្រសួងសុខាភិបាលបានស្រាវជ្រាវអ្នកប៉ះពាល់ផ្ទាល់ជាមួយស្រ្តីនោះ និងរកឃើញមនុស្ស២៤នាក់ផ្សេងទៀតដែលធ្វើការនៅក្លឹបកម្សាន្តមួយនៅភ្នំពេញ ដែលភាគច្រើនជាជនជាតិចិន ឆ្លងជំងឺកូវីដ១៩។ នេះបើតាមក្រសួងសុខាភិបាល។
ក្រសួងបញ្ជាក់ទៀតថាមានអ្នកជំងឺជនជាតិចិន ៣នាក់ផ្សេងទៀត ដែលមានបំណងធ្វើដំណើរទៅប្រទេសចិន បានទៅធ្វើតេស្តសុំវិញ្ញាបនបត្របញ្ជាក់សុខភាព កាលពីថ្ងៃទី១៩ ខែកុម្ភៈ ហើយលទ្ធផលបង្ហាញថាវិជ្ជមានជំងឺកូវីដដែរ។ ចំណែកស្រ្តីជនជាតិឈីលីម្នាក់ដែលមានបំណងទៅប្រទេសឡាវ ធ្វើតេស្តបញ្ជាក់សុខភាព ហើយលទ្ធផលក៏វិជ្ជមានដូចគ្នា។
ក្រសួងសុខាភិបាលកម្ពុជា នៅថ្ងៃច័ន្ទនេះ បានរាយការណ៍ថាមនុស្ស៣១នាក់ទៀត ឆ្លងជំងឺកូវីដ១៩ ពាក់ព័ន្ធនឹងព្រឹត្តិការណ៍ដែលលោកនាយករដ្ឋមន្រ្តី ហ៊ុន សែន ដាក់ឈ្មោះថា«២០ កុម្ភៈ»។ អ្នកឆ្លងនៅថ្ងៃច័ន្ទនេះ មានជនជាតិចិន១៩នាក់ កូរ៉េមួយនាក់ និងខ្មែរ១១នាក់។ នេះបើយោងតាមសេចក្តីប្រកាសព័ត៌មានរបស់ក្រសួងសុខាភិបាល។
ក្រសួងសុខាភិបាលបានបញ្ជាក់ថា៖ «តាមការរុករកស្រាវជ្រាវបានបង្ហាញថាស្ថានភាពនៃការចម្លងក្នុងសហគមន៍នាពេលនេះ មានលក្ខណៈធំជាង និងសាំញ៉ាំជាងព្រឹត្តិការណ៍សហគមន៍២៨ វិច្ឆិកា ហើយវិធានការនិងអន្តរាគមន៍នានាបានដាក់ជាបណ្តើរៗ គឺអាស្រ័យទៅតាមស្ថានភាពនៃការរកឃើញវត្តមានវីរុសកូវីដ១៩តាមទីតាំងនីមួយៗ ដើម្បីទប់ស្កាត់ការចម្លងបន្តនូវវីរុសកូវីដ១៩ នៅក្នុងសហគមន៍ទ្រង់ទ្រាយធំ»។
ទីតាំងជិត៣០កន្លែង រួមមានសាលារៀន កន្លែងស្នាក់នៅ និងកន្លែងកម្សាន្ត ត្រូវបានបិទជាបណ្តោះអាសន្ន។ ក្រសួងទេសចរណ៍ក៏បានប្រកាសឲ្យបន្តផ្អាកអាជីវកម្មខារ៉ាអូខេ(KTV) ក្លឹបកម្សាន្ត និងបៀរហ្គាឌិនជាដើម។
ក្រសួងសុខាភិបាលអំពាវនាវដល់បុគ្គលដែលធ្លាប់ចេញចូលទីតាំងទាំងនោះ ចាប់ពីថ្ងៃទី៦ដល់ថ្ងៃទី២០ខែកុម្ភៈ ត្រូវមាន«ភាពស្មោះត្រង់» «មិនលាក់លៀម» និង«ស្ម័គ្រចិត្ត»ធ្វើតេស្តរកវីរុសជំងឺកូវីដ១៩។
ក្រសួងបានអំពាវនាវឲ្យប្រជាពលរដ្ឋ បើមិនចាំបាច់ ត្រូវនៅផ្ទះ និងមិនត្រូវរើសអើងជាតិសាសន៍ឡើយ។
លោកនាយករដ្ឋមន្រ្តី ហ៊ុន សែន កាលពីថ្ងៃអាទិត្យ បានចាត់ទុកការឆ្លងសហគមន៍លើកទី៣នេះ«មិនធម្មតា» ហើយបញ្ជាឲ្យរដ្ឋមន្រ្តីក្រសួងការពារជាតិ ត្រៀមពេទ្យទាហាន ដើម្បីដោះស្រាយការឆ្លងសហគមន៍ទ្រង់ទ្រាយធំនេះ។
លោក ហ៊ុន សែន ថ្លែងថា៖ «ព្រោះសភាពការណ៍ វាមិនធម្មតាពេកទេ យើងត្រូវប្រុងប្រៀប ដើរមុនមួយជំហាន គ្រប់គ្រងសភាពការណ៍ហ្នឹង»។
ចំណែកកាលពីថ្ងៃសៅរ៍ លោកនាយករដ្ឋមន្រ្តី ហ៊ុន សែន បានថ្លែងថាមានករណីស្រ្តី៤នាក់បានលួចចេញពីកន្លែងធ្វើចត្តាឡីស័ក ដែលមានការជួយពីសន្តិសុខម្នាក់។ លោកនាយករដ្ឋមន្រ្តីមិនបានបញ្ជាក់ថាតើស្រ្តីទាំងនោះជាជនជាតិអ្វីនោះទេ ដោយគ្រាន់តែថា២នាក់មានជំងឺកូវីដ១៩។
លោកថ្លែងថា៖ «ហើយសូមកុំបណ្តោយឲ្យដូចការកើតឡើងនៅប៉ុន្មានថ្ងៃមុន ដែលមានស្រ្តី៤នាក់បានលួចចេញពីសណ្ឋាគារហើយបានមកកម្សាន្តនៅខាងក្រៅ រួចហើយទើបចូលត្រឡប់ទៅវិញ។ ក្នុងចំណោមស្រ្តី៤នាក់ ដែលបានចេញពីសណ្ឋាគារ ហើយចូលត្រឡប់ទៅវិញ បានរកឃើញមានវិជ្ជមាន២នាក់ហើយ។ ខ្ញុំជឿជាក់ថា២នាក់ទៀត ក៏នឹងកើតដូចគ្នាដែរ»។
សារព័ត៌មានស៊ីស៊ីថាមស៍(The Cambodia China Times)ដែលស្និទ្ធនឹងស្ថានទូតចិនប្រចាំនៅកម្ពុជា បានចុះផ្សាយកាលពីថ្ងៃអាទិត្យ ដោយយោងតាមស្ថានទូតចិនថាមានជនជាតិចិនមួយចំនួនបានរត់គេចពីសណ្ឋាគារចត្តាឡីស័ក ហើយមានពលរដ្ឋចិនមួយចំនួនក៏បានលាក់ខ្លួននិងគេចខ្លួន បន្ទាប់ពីដឹងថាពួកគេមានលទ្ធផលតេស្តវិជ្ជមានជំងឺកូវីដ១៩។
VOAមិនទាន់អាចសុំការអត្ថាធិប្បាយពីលោកស្រី ឱ វណ្ណឌីន រដ្ឋលេខាធិការ និងអ្នកនាំពាក្យក្រសួងសុខាភិបាល និងស្ថានទូតចិនប្រចាំនៅកម្ពុជា បាននៅឡើយទេនៅថ្ងៃច័ន្ទនេះ។
លោក យង់ គិមអេង ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍន៍និងសន្តិភាព មានប្រសាសន៍ថាការឆ្លងចុងក្រោយនេះ ជាក្តីព្រួយបារម្ភធំមួយ ដោយសារចំនួនអ្នកឆ្លងកាន់តែច្រើន ហើយមិនដឹងប្រភពច្បាស់លាស់។ លោកបន្តថាលោកបារម្ភខ្លាច«កម្ពុជាក្លាយជាប្រទេសរងគ្រោះចុងក្រោយគេ» ក្នុងវិបត្តិជំងឺកូវីដ១៩នេះ។
លោកបន្ថែមថាកម្ពុជាមាន«ការធ្វេសប្រហែស»ក្នុងការគ្រប់គ្រងជនបរទេស ទាក់ទងនឹងការធ្វើចត្តាឡីស័ក ឬដាក់ឲ្យនៅដាច់ដោយឡែកបង្ការជំងឺកូវីដ១៩។
លោកប្រាប់VOAថា៖ «កាលណាយើងធ្វើចត្តាឡីស័កអត់បានត្រឹមត្រូវ អត់បានច្បាស់លាស់ អាហ្នឹងគឺជាការបង្កហានិភ័យមួយខ្ពស់ហើយ។ កាលណាគាត់ចេញទៅ គាត់ទៅមានទំនាក់ទំនងជាមួយអ្នកដទៃ»។
លោក យង់ គិមអេង បន្តថាកម្ពុជាក៏មានការធ្វេសប្រហែសដែរ ដោយមានភាពធូរលុងក្នុងប្រទេស គឺពលរដ្ឋមិនពាក់ម៉ាស រក្សាគម្លាត និងរៀបចំពិធីផ្សេងៗតាមអំពើចិត្ត។
លោកបញ្ជាក់ថា៖ «ការធ្វេសប្រហែសរបស់យើងនៅក្នុងការត្រួតពិនិត្យបញ្ហាសុវត្ថិភាព សុខភាពហ្នឹង គឺដែលធ្វើឲ្យយើងជួបហានិភ័យហ្នឹងខ្ពស់។ ហើយម្យ៉ាងវិញទៀត នៅតាមកន្លែងមួយៗ គឺប្រហែលជាអត់បានគោរពបទដ្ឋានសុខាភិបាលឲ្យបានត្រឹមត្រូវ។ ហ្នឹងក៏ជាបញ្ហាដែរបាទ»។
ការរាលដាលសហគមន៍ទ្រង់ទ្រាយធំពេលនេះ ស្របពេលកម្ពុជាកំពុងចាប់ផ្តើមចាក់វ៉ាក់សាំងស៊ីណូហ្វាម(Sinopharm) ដែលជាជំនួយមនុស្សធម៌របស់ប្រទេសចិន ដែលចាប់ផ្តើមតាំងពីថ្ងៃទី១០ ខែកុម្ភៈ ហើយក្រសួងសុខាភិបាលបានពង្រីកការចាក់នេះទៅមន្ទីរពេទ្យនៅតាមបណ្តាខេត្ត ដូចជាខេត្តបាត់ដំបង បន្ទាយមានជ័យ ឧត្តរមានជ័យ ប៉ៃលិន កោះកុង ព្រះសីហនុ ស្វាយរៀង ពោធិ៍សាត់ និងខេត្តកែប។
គួរបញ្ជាក់ថាករណីឆ្លងជំងឺកូវីដ១៩សរុបក្នុងប្រទេសកម្ពុជា មានចំនួន៥៦៨នាក់ គិតត្រឹមថ្ងៃទី២២ ខែកុម្ភៈ ឆ្នាំ២០២១ ហើយកម្ពុជាមិនមានករណីស្លាប់នោះទេ៕
