អាជីវករនិងអ្នកប្រកបរបរសេដ្ឋកិច្ចក្រៅប្រព័ន្ធមួយចំនួន បានថ្លែងពីផលវិបាកនៃការរកប្រាក់ចំណូលដែលបន្តថយចុះ ខណៈពួកគេកំពុងបន្តជាប់បំណុលធនាគារ និងគ្រឹះស្ថានមីក្រូហិរញ្ញវត្ថុ។
ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ ហៅកាត់ថា IDEA លោក វន់ ពៅ ប្រាប់វីអូអេនាពេលថ្មីៗនេះថា អ្នករកស៊ីក្នុងសេដ្ឋកិច្ចក្រៅប្រព័ន្ធបាននិងកំពុងប្រឈមមុខនឹងការធ្លាក់ប្រាក់ចំណូលយ៉ាងគំហុក ហើយអ្នកខ្លះបានបាត់បង់មុខរបរ ដូចជាអ្នកលក់ដូរនៅជុំវិញបរិវេណមន្ទីរពេទ្យ និងនៅតាមទីកន្លែងមួយចំនួនទៀត គ្រាដែលអាជ្ញាធររៀបចំទីតាំងទាំងអស់នោះឲ្យមានសណ្តាប់ធ្នាប់ប្រសើរជាងមុន។
លោកថ្លែងថា៖ «សព្វថ្ងៃនេះ បើនិយាយពីប្រាក់ចំណូលមិនអាចមានតុល្យភាពទៅនឹងការសងទៅនឹងធនាគារវិញទេ ហើយមិនត្រឹមតែប៉ុណ្ណុង កន្លែងគាត់លក់មួយចំនួន ដូចផ្សារមួយចំនួនត្រូវបានថៅកែគេរុះរើផ្សារអ៊ីចឹងទៅ អាតម្លៃតូបធ្លាប់ទិញហ្នឹង វារឹតតែធ្ងន់ធ្ងរ អត់មានលុយបង់ថ្លៃតូប ថ្លៃអីជាដើម»។
បើតាមលោក វន់ ពៅ អ្នករកស៊ីសេដ្ឋកិច្ចក្រៅប្រព័ន្ធស្ទើរតែ ១០០ ភាគរយ បានខ្ចីប្រាក់ពីធនាគារ និងគ្រឹះស្ថានមីក្រូហិរញ្ញវត្ថុ។ រីឯអ្នកខ្លះទៀត ខ្ចីបុលពីឯកជនបន្ថែមលើបំណុលដែលមានស្រាប់។
អ្នកស្រី ឃុន ស៊ីដែត អ្នកលក់ដូរត្រីវ័យ ៤០ ឆ្នាំ នៅផ្សារគីឡូម៉ែត្រលេខ៦ ឬផ្សារឆេកូ នៅខណ្ឌឫស្សីកែវ បានកត់សម្គាល់ថា នៅក្នុងរយៈពេល ២ ឆ្នាំចុងក្រោយនេះ ការលក់ដូរជួបការលំបាកខ្លាំង ដោយសារមិនសម្បូរអតិថិជនដូចមុនៗ។
អ្នកស្រីថ្លែងថា៖ «ជំពាក់គេ ក៏ជំពាក់គេ ហើយកូនរៀនសូត្រផង អីផង ហើយរកអត់បានអ៊ីចឹង។ រាល់ថ្ងៃរំពឹងថាយើងហ្នឹងហើយ អ្នករកលុយផ្គត់ផ្គង់ពួកគាត់ ហើយសម្រាប់ចំណាយអីប្រចាំថ្ងៃ ដល់យើងរកអត់បានអ៊ីចឹង វាពិបាក»។
ស្រដៀងគ្នានេះដែរ អ្នកស្រី លាង លីហួយ វ័យ ៣៣ ឆ្នាំ មើលឃើញថា ស្ថានភាពនៃការលក់ដូររបស់អ្នកស្រីមានចំណូលកាន់តែធ្លាក់ចុះខ្លាំងនៅឆ្នាំ ២០២៥ នេះ គ្រាដែលប្រជាពលរដ្ឋផ្សេងទៀតដែលជាអតិថិជនរអ៊ូរទាំនឹងការពិបាករកប្រាក់ចំណូលដូចគ្នា។
អ្នកស្រីប្រាប់វីអូអេថា៖ «ស៊ឹងតែគ្រប់គ្នា មករអ៊ូតែរឿងអត់លុយ រកអីមិនបាន មិនដឹងទៅធ្វើអី តែអ្នកដើរលក់ ក៏គាត់មកនិយាយអ៊ីចឹងដែរ។ អ៊ីចឹងទៅ យើងទៅរកអី អ្នកធ្វើការ ធ្វើការប្រចាំខែ នៅគេរអ៊ូថាលុយចាយអត់គ្រប់ មកទិញអីវ៉ាន់យើង ពេលខ្លះ គ្នាខ្វះខាត មកជឿយើងដាក់ខែយើង ទម្រាំតែបានបើកលុយ បានយកមកសងបន្តៗចឹង អត់មានលុយ អត់សូវមានលុយទិញទេ»។
អ្នករត់ម៉ូតូកង់បីលោក ហឿន ស៊ីណែត បានសង្កេតឃើញពីការកើនឡើងនៃតម្លៃទំនិញនៅលើទីផ្សារ ដែលកាន់តែឡើងខ្ពស់ជាងប្រាក់ចំណូលដែលលោករកបាន។
លោកថ្លែងថា៖ «សម្រាប់ទំនិញ គឺថា វាឡើង ទីផ្សារវាឡើងរហូតចឹង ចំណែកប្រាក់ចំណូលយើងវាដូចថា វារឹតតែធ្លាក់ចុះ ធ្លាក់ចុះវិញ។ ចំណែកទំនិញលើទីផ្សារបែរជាឡើងអ៊ីចឹង»។
អង្គការពលកម្មអន្តរជាតិ ហៅកាត់ថា ILO បានបញ្ជាក់ឲ្យដឹងកាលពីពេលកន្លងទៅថា នៅក្នុងប្រទេសកម្ពុជា អ្នកពឹងផ្អែកចំណូលនឹងសកម្មភាពសេដ្ឋកិច្ចក្រៅប្រព័ន្ធមានចំនួនជាង ៧ លាន ៥ សែននាក់។ នេះបើយោងតាមប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ ហៅកាត់ថា IDEA លោក វន់ ពៅ។
លោក វន់ ពៅ បានឲ្យដឹងទៀតថា បច្ចុប្បន្ននេះក៏មានអ្នកពឹងផ្អែកលើចំណូលដែលបានមកពីរបរនៃសេដ្ឋកិច្ចក្រៅប្រព័ន្ធដែលបានចុះបញ្ជីក្នុងបេឡាជាតិសន្តិសុខសង្គម ហៅកាត់ថា (ប.ស.ស.) ដើម្បីទទួលបានការទំនុកបម្រុងពីរដ្ឋាភិបាល។ ប៉ុន្តែអ្នកខ្លះទៀតបាននិងកំពុងពើបប្រទះនឹងការលំបាកនៅក្នុងការរកចំណូល ខណៈស្ថានភាពសេដ្ឋកិច្ចមិនសូវអំណោយផល គិតចាប់តាំងពីវិបត្តិជំងឺកូវីដ១៩មក។ លោក វន់ ពៅ ចង់ឃើញរដ្ឋាភិបាលផ្តល់ប្រាក់ឧបត្ថម្ភធនដល់អ្នករកស៊ីសេដ្ឋកិច្ចក្រៅប្រព័ន្ធ និងរកវិធីសាស្ត្រធ្វើយ៉ាងណាឲ្យវិស័យទេសចរណ៍កម្រើកឡើងវិញ។
លោកថ្លែងថា៖ «ខ្ញុំសូមឲ្យរដ្ឋាភិបាលអន្តរាគមន៍ជាបន្ទាន់ ឆ្លើយតបទៅនឹងតម្រូវការរបស់អ្នកសេដ្ឋកិច្ចក្រៅប្រព័ន្ធ ជាពិសេសគួរតែរៀបចំកញ្ចប់ថវិកាឧបត្ថម្ភធនទៅដល់អ្នកសេដ្ឋកិច្ចក្រៅប្រព័ន្ធដែលខ្វះធន ហើយមួយទៀតត្រូវតែរៀបចំកន្លែងប្រកបមុខរបរអាជីវកម្មសម្រាប់អ្នកសេដ្ឋកិច្ចក្រៅប្រព័ន្ធឲ្យមានភាពសមរម្យ និងរដ្ឋមានគោលនយោបាយយ៉ាងច្បាស់លាស់ទាក់ទាញភ្ញៀវទេសចរដើម្បីឲ្យពួកយើងបានអាស្រ័យផលជាមួយភ្ញៀវទេសចរផងបាទ»។
អ្នកនាំពាក្យក្រសួងការងារលោក កត្តា អ៊ន ប្រាប់វីអូអេតាមប្រព័ន្ធទំនាក់ទំនងតេឡេក្រាមថា រដ្ឋាភិបាលបានដាក់ចេញនូវគោលនយោបាយ ដើម្បីជួយអ្នកសេដ្ឋកិច្ចក្រៅប្រព័ន្ធ ដូចជាការជួយបញ្ចូលអ្នកមានអាជីវកម្មខ្នាតតូចទៅក្នុងប្រព័ន្ធដោយស្របច្បាប់ និងផ្តល់ប្រាក់កម្ចីខ្នាតតូចដល់ពួកគេជាដើម។
លោកថ្លែងថា៖ «កន្លងមក រាជរដ្ឋាភិបាលបានដាក់ចេញនូវគោលនយោបាយលើកកម្ពស់អ្នកសេដ្ឋកិច្ចក្រៅប្រព័ន្ធតាមរយៈការចុះបញ្ជីអាជីវកម្មដើម្បីឲ្យអាជីវកម្មអ្នកសេដ្ឋកិច្ចក្រៅប្រព័ន្ធអាចចូលទៅក្នុងប្រព័ន្ធបានយ៉ាងងាយស្រួលនិងលឿន បានលើកទឹកចិត្តដល់អាជីវកម្មខ្នាតតូច ក៏ដូចជាអាជីវកម្មឯករាជ្យនានា ក្នុងការចូលទៅក្នុងប្រព័ន្ធដោយស្របច្បាប់ បានដាក់ចេញនូវយុទ្ធសាស្ត្រផ្តល់ប្រាក់កម្ចីខ្នាតតូច តាមរយៈធនាគារ ឬក៏មីក្រូហិរញ្ញវត្ថុដែលមានការប្រាក់ទាបសម្រាប់សម្រួលដល់ដើមទុនរបស់បងប្អូនអ្នកសេដ្ឋកិច្ចក្រៅប្រព័ន្ធក្នុងការពង្រីកសេដ្ឋកិច្ចរបស់ខ្លួន»។
លោក កត្តា អ៊ន បានថ្លែងបន្ថែមថា រដ្ឋាភិបាលក៏បានបញ្ចូលកម្មករ និងអ្នកប្រកបរបរសេដ្ឋកិច្ចក្រៅប្រព័ន្ធទៅក្នុងប្រព័ន្ធធានារ៉ាប់រងសង្គម ផ្តល់វិជ្ជាជីវៈបច្ចេកទេសដល់យុវជនមកពីគ្រួសារក្រីក្រ និងគ្រួសារងាយរងហានិភ័យ ក៏ដូចជាយុវជនមកពីសេដ្ឋកិច្ចក្រៅប្រព័ន្ធដើម្បីឲ្យពួកគេមានជំនាញ និងទទួលបានការងារដើម្បីរកប្រាក់ចំណូលផ្គត់ផ្គង់គ្រួសារ។
ក្រោយវិបត្តិជំងឺកូវីដ១៩ អ្នកប្រកបរបរសេដ្ឋកិច្ចក្រៅប្រព័ន្ធបាននិងកំពុងប្រឈមមុខនឹងការលំបាកជាច្រើន រួមមានការកើនឡើងនូវបំណុលជាបន្តបន្ទាប់ ការដណ្តើមមុខរបរពីជនបរទេស កង្វះភ្ញៀវទេសចរ ការប្រឈមមុខនឹងគ្រោះថ្នាក់ចរាចរណ៍ជាញឹកញាប់ និងការជួបគ្រោះថ្នាក់ដល់អាយុជីវិតដោយសារប្រឹងធ្វើការហួសកម្លាំងជាដើម។ នេះបើតាមការបញ្ជាក់របស់លោក វន់ ពៅ៕
វេទិកាបញ្ចេញមតិ