លោកប្រធានាធិបតី Joe Biden នឹងចូលរួមក្នុងកិច្ចប្រជុំកំពូលនៃក្រុមប្រទេសមានសេដ្ឋកិច្ច ជឿនលឿនចំនួន២០ឬ G-20 នៅក្នុងរដ្ឋធានីញូវដែលី (New Delhi) ប្រទេសឥណ្ឌា ប៉ុន្តែលោកនឹងមិនចូលរួមក្នុងកិច្ចប្រជុំកំពូលអាមេរិកអាស៊ាន និងកិច្ចប្រជុំកំពូលអាស៊ីខាងកើត នៅទីក្រុងហ្សាការតា (Jakarta) ប្រទេសឥណ្ឌូណេស៊ីទេ។ លោកបញ្ជូនលោកស្រីអនុប្រធានាធិបតី Kamala Harris ទៅចូលរួមវិញ។ នេះបើតាមសេចក្តីប្រកាសព័ត៌មានរបស់សេតវិមានកាលពីថ្ងៃអង្គារ។
ដើម្បីជាការបង្ហាញអំពីសារៈសំខាន់ដែលលោក Biden បានដាក់លើរដ្ឋាភិបាលលោកនាយករដ្ឋមន្ត្រី Narendra Modi លោក Biden នឹងស្ថិតនៅក្នុងប្រទេសឥណ្ឌាពីថ្ងៃទី៧ ដល់ថ្ងៃទី១០ ខែកញ្ញា គឺលោក ទៅដល់២ថ្ងៃមុនកិច្ចប្រជុំប្រចាំឆ្នាំរបស់មេដឹកនាំនៃក្រុមប្រទេសមានសេដ្ឋកិច្ចធំជាងគេក្នុងពិភពលោកទាំង២០។ មេដឹកនាំនៃប្រទេសទាំងនេះ នឹងចាប់ផ្តើមកិច្ចប្រជុំរបស់ពួកគេ នៅថ្ងៃទី៩ និង ទី១០ ខែកញ្ញា។ ពួកគេនឹងពិភាក្សាអំពីបញ្ហាពិភពលោក រួមមានទាំងការងាកទៅរកការប្រើប្រាស់ថាមពលស្អាត ការសម្រួលការប៉ះពាល់ផ្នែកសេដ្ឋកិច្ចនិងសង្គម ដោយសារសង្គ្រាមក្នុងប្រទេសអ៊ុយក្រែន និងការបង្កើនសមត្ថភាពរបស់ធនាគារអភិវឌ្ឍន៍ពហុភាគី។
ពេលស្ថិតនៅក្នុងប្រទេសឥណ្ឌា លោក Biden នឹងបញ្ជាក់ឡើងវិញអំពីការតាំងចិត្តរបស់សហរដ្ឋអាមេរិក ចំពោះក្រុមប្រទេស G-20 ថាជាវេទិកាសម្រាប់កិច្ចសហប្រតិបត្តិការសេដ្ឋកិច្ច ដោយមានរួមទាំងការធ្វើជាម្ចាស់ផ្ទះនៃកិច្ចប្រជុំនៅឆ្នាំ២០២៦។ នេះបើតាមសម្តីរបស់លោក Jake Sullivan ទីប្រឹក្សាសន្តិសុខជាតិ ប្រាប់អ្នកកាសែតក្នុងសន្និសីទកាសែតមួយកាលពីថ្ងៃអង្គារ។
រដ្ឋមន្ត្រីការបរទេសសហរដ្ឋអាមេរិក លោកAntony Blinken បានទៅចូលរួមក្នុងកិច្ចប្រជុំអាមេរិកអាស៊ាន កាលពីខែកក្កដា។ កិច្ចប្រជុំអាស៊ីខាងកើតជាកិច្ចប្រជុំថ្នាក់តំបន់មួយ ដែលអាស៊ានរៀបចំជារៀងរាល់ឆ្នាំ។ ដៃគូនៃកិច្ចប្រជុំនេះមានរួមសហរដ្ឋអាមេរិក ចិននិងរុស្ស៊ី។
លោក Sullivan បានច្រានចោលការរិះគន់ដែលថាការមិនចូលរួមរបស់លោក Biden ក្នុងកិច្ចប្រជុំទាំងនេះ នាំឱ្យមានការយល់ឃើញថាសហរដ្ឋអាមេរិកកំពុងតែបណ្តោយឱ្យចិនមានឥទ្ធិពលក្នុងតំបន់នេះ។ នេះជាការរិះគន់ដូចគ្នា លើលោកប្រធានាធិបតី កាលពីខែឧសភា ដែលនៅពេលនោះការជាប់រវល់ក្នុងការចរចាអំពីការបង្កើនពិដានបំណុលរបស់ប្រទេសអាមេរិក បានបង្ខំឱ្យលោក Biden លុបចោលទស្សនកិច្ចទៅកាន់ប្រទេសប៉ាពូអាស៊ីនូវែលហ្គីណេ ដែលអាចនិយាយថាជាទស្សនកិច្ចលើកទីមួយរបស់ប្រធានាធិបតីសហរដ្ឋអាមេរិកម្នាក់ទៅកាន់ប្រទេសនោះ៕
លោក Biden នឹងចូលរួមកិច្ចប្រជុំG20 រីឯលោកស្រីHarris ចូលរួមកិច្ចប្រជុំកំពូលអាស៊ាននិងអាស៊ីខាងកើត
វ៉ាស៊ីនតោន —
