អតីតមន្រ្តី និងសកម្មជនរបស់គណបក្សសង្រ្គោះជាតិយ៉ាងតិច ២០ នាក់ ត្រូវបានតុលាការខេត្តបាត់ដំបង កោះហៅឲ្យចូលបំភ្លឺក្នុងនាមជា«ជនសង្ស័យ» ពាក់ព័ន្ធនឹងការបំពានសាលដីការបស់តុលាការកំពូលដែលបានរំលាយគណបក្សប្រឆាំងកាលពីចុងឆ្នាំ ២០១៧។
គណបក្សសង្រ្គោះជាតិដែលជាគណបក្សប្រឆាំងដ៏ធំនៅកម្ពុជា ត្រូវបានតុលាការកំពូលប្រកាសរំលាយចោលកាលពីថ្ងៃទី១៦ ខែវិច្ឆិកា ឆ្នាំ ២០១៧ ពាក់ព័ន្ធនឹងការចោទប្រកាន់ថា មានបំណងផ្តួលរំលំរដ្ឋាភិបាល ដោយមានសហរដ្ឋអាមេរិកនៅពីក្រោយ។ អាមេរិកបានច្រានចោលការចោទប្រកាន់នេះ។
មន្រ្តីទាំងនោះ រួមមានអតីតមេឃុំចៅសង្កាត់របស់បក្សប្រឆាំង ក្រុមប្រឹក្សាស្រុកនិងសកម្មជនមួយចំនួនទៀតដែលបានបាត់បង់តំណែង ក្រោយគណបក្សត្រូវបានរំលាយ។ បើយោងតាមដីកាចំនួន ២០ ដែល VOA ទទួលបាននៅថ្ងៃចន្ទនេះ ពួកគេមួយចំនួនត្រូវបានតុលាការកោះហៅឲ្យចូលបំភ្លឺនៅថ្ងៃទី៨ ថ្ងៃទី៩ ទី១៦ ទី១៧ និងទី២១ ខែឧសភា ។ ដីកាទាំងអស់នោះបញ្ជាក់ថា ពួកគេត្រូវតុលាការកោះហៅជា«ជនសង្ស័យ» ក្នុងដំណើររឿង «បំពានសាលដីកាតុលាការកំពូល»។
លោក ផាន់ រ៉េត អាយុ ៦៥ ឆ្នាំ អតីតចៅសង្កាត់រងនៃសង្កាត់ក្តុលដូនទាវ ក្នុងខេត្តបាត់ដំបង ត្រូវបានតុលាការកោះហៅឲ្យចូលបំភ្លឺនៅថ្ងៃទី៨ ខែឧសភា វេលាម៉ោង២រសៀល។ លោកបានថ្លែងប្រាប់ VOA ថា លោកនឹងចូលបំភ្លឺតាមការកោះហៅ ប៉ុន្តែលោកចាត់ទុកដីកានេះ គ្រាន់តែជាការគំរាមកំហែងលោកតែប៉ុណ្ណោះ។
លោកបានថ្លែងប្រាប់ VOA តាមទូរស័ព្ទថា៖ «អាហ្នឹងជាការគំរាមកំហែងសារថ្មីម្តងទៀត។ ដាក់បន្ទុកធ្ងន់មកលើ»។
លោកបន្តថា ការប្រកាសគាំទ្រលោក សម រង្ស៊ី មេដឹកនាំបក្សប្រឆាំង ដែលកំពុងនិរទេសខ្លួននៅក្រៅប្រទេស ក្នុងការវិលត្រឡប់មកប្រទេសវិញ និងការប្រកាសគាំទ្រគណបក្សសង្រ្គោះជាតិ បើទោះជាគណបក្សត្រូវបានរំលាយចោល គឺជាសិទ្ធិរបស់ប្រជាពលរដ្ឋ។
លោក ជា ជីវ អតីតប្រធានប្រតិបត្តិខេត្តបាត់ដំបងរបស់គណបក្សសង្រ្គោះជាតិ មានប្រសាសន៍ថា រហូតមកដល់ពេលនេះ រូបលោកនិងសហការី ២០ នាក់ទៀត ត្រូវបានតុលាការកោះហៅឲ្យចូលបំភ្លឺដូចគ្នា។ លោកបញ្ជាក់ថា លោកត្រូវបានកោះហៅឲ្យចូលបំភ្លឺនៅថ្ងៃទី១៦ ខែឧសភា។
លោក ជា ជីវ ដែលធ្លាប់ជាសមាជិកក្រុមប្រឹក្សាខេត្តបាត់ដំបង បានចោទតុលាការថាធ្វើតាមបញ្ជារបស់អ្នកនយោបាយ ដែលលោកសំដៅទៅលើអ្នកនយោបាយមកពីគណបក្សប្រជាជនកម្ពុជា។
លោកមានប្រសាសន៍ថា៖ «វាជារឿងអយុត្តិធម៌ ហើយតុលាការធ្វើទៅតាមអំណាចរបស់អ្នកនយោបាយតែប៉ុណ្ណោះ ព្រោះតុលាការស្ថិតនៅក្រោមបញ្ជាអ្នកនយោបាយ»។
លោកបន្ថែមថា៖ «ព្រោះដីកានេះ បើសិនជាយើងយល់ថា វាជាការគំរាម បំបិទសិទ្ធិ និងបំភ័យ ហើយគ្មានសេរីភាពក្នុងការបញ្ចេញមតិ ក្នុងខ្ញុំជាប្រជាពលរដ្ឋទាល់តែសោះ»។
លោក ជា ជីវ អាយុ ៣៩ ឆ្នាំ ជាមន្រ្តីគណបក្សសង្រ្គោះជាតិម្នាក់ក្នុងចំណោមអ្នកនយោបាយបក្សប្រឆាំងទាំង ១១៨ នាក់ ដែលត្រូវបានកាត់សិទ្ធិនយោបាយ ក្រោយគណបក្សមួយនេះត្រូវបានរំលាយ។ លោកចាត់ទុកការកាត់សិទ្ធិនយោបាយនេះ គឺជាការបំបាក់អ្នកនយោបាយបក្សប្រឆាំងនៅថ្នាក់ខេត្ត ដូចជារូបលោក។
ក្រោយគណបក្សសង្រ្គោះជាតិត្រូវបានរំលាយ លោក ជា ជីវ មានប្រសាសន៍ថា រូបលោកនិងសកម្មជនផ្សេងទៀត ក្នុងខេត្តបាត់ដំបង ត្រូវបានកម្លាំងនគរបាលនៅថ្នាក់មូលដ្ឋានតាមដានជាបន្តបន្ទាប់។ ពួកគេមួយចំនួនក៏ត្រូវបាននគរបាលនៅតាមឃុំសង្កាត់ កោះហៅសាកសួរ ប្រសិនបើមានការប្រមូលផ្តុំណាមួយ ឬក៏ការបង្ហោះសារនៅលើប្រព័ន្ធសង្គមហ្វេសប៊ុកទាក់ទងនឹងលោក សម រង្ស៊ី និងគណបក្សសង្រ្គោះជាតិ។
អ្នកនាំពាក្យរបស់តុលាការខេត្តបាត់ដំបង លោកស្រី ទៀង សំបូរ មានប្រសាសន៍ថា លោកស្រីមិនបានដឹងអំពីការចេញដីកានេះនោះទេ ព្រោះលោកស្រីរវល់នៅភ្នំពេញ។
លោកស្រីមានប្រសាសន៍ថា៖ «ខ្ញុំអត់បានដឹង រវល់ជាប់សិក្ខាសាលានៅភ្នំពេញ»។
VOA មិនអាចសុំការឆ្លើយតបពីអ្នកនាំពាក្យមួយរូបទៀត លោក ហេង លុយ បាននៅឡើយទេ។
លោក អេង ឆៃអ៊ាង អនុប្រធានគណបក្សសង្គ្រោះជាតិ ដែលកំពុងនិរទេសខ្លួននៅក្រៅប្រទេស បានចោទប្រកាន់រដ្ឋាភិបាលថា តែងតែព្យាយាមបង្ក្រាបសកម្មជនគណបក្សប្រឆាំង ដោយលោកបញ្ជាក់ថា «លោក ហ៊ុន សែន ដឹងថាគណបក្សសង្គ្រោះជាតិ គឺជាឧបសគ្គនៃអំណាចរបស់គាត់»។
រហូតមកដល់ពេលនេះ លោក កឹម សុខា ប្រធានគណបក្សសង្រ្គោះជាតិ ត្រូវបានអាជ្ញាធរចាប់ដាក់ពន្ធនាគារ និងបន្តឃុំឃាំងនៅក្នុងលំនៅដ្ឋានរបស់លោក។
អ្នកនាំពាក្យរបស់រដ្ឋាភិបាល លោក ផៃ ស៊ីផាន មានប្រសាសន៍ថា នេះជាចំណាត់ការរបស់តុលាការ មិនពាក់ព័ន្ធនឹងរឿងនយោបាយនោះទេ។
លោកបានថ្លែងប្រាប់ VOA ថា៖ «អានេះជាការងាររបស់តុលាការ។ ចំពោះរាជរដ្ឋាភិបាលមិនមានអ្វីដែលយើងត្រូវឆ្លងឆ្លើយនោះទេ។ អាហ្នឹងជាអំណាចរបស់តុលាការ»។
មន្រ្តីរដ្ឋាភិបាលរូបនោះក៏បានច្រានចោលការចោទប្រកាន់ថា តុលាការស្ថិតនៅក្រោមរដ្ឋាភិបាល។
គណបក្សសង្គ្រោះជាតិធ្លាប់គ្រប់គ្រងអាសនៈក្រុមប្រឹក្សានៅថ្នាក់ឃុំសង្កាត់ ចំនួន ៥០០៧ គឺស្មើនឹង ៤៣ ភាគរយ មុនពេលគណបក្សមួយនេះត្រូវបានរំលាយ។ ប៉ុន្តែអាសនៈទាំងនេះត្រូវបានបែងចែកឲ្យគណបក្សផ្សេង ក្រោយគណបក្សសង្គ្រោះជាតិត្រូវបានរំលាយ ហើយគណបក្សប្រជាជនកម្ពុជាទទួលបានស្ទើរតែទាំងអស់។
គណបក្សប្រជាជនកម្ពុជាបានគ្រប់គ្រងអំណាចគ្រប់លំដាប់ថ្នាក់ ក្រោយការរំលាយគណបក្សសង្គ្រោះជាតិ រួមមានថ្នាក់ព្រឹទ្ធសភា រដ្ឋសភា ថ្នាក់ឃុំសង្កាត់ និងឈានទៅគ្រប់គ្រងថ្នាក់រាជធានី ខេត្ត ក្រុង ស្រុក ខណ្ឌ ក្រោយការបោះឆ្នោតថ្នាក់ក្រោមជាតិមួយទៀត ដែលនឹងប្រព្រឹត្តទៅនៅថ្ងៃទី២៦ ខែឧសភា៕
