នៅពេលដែលប្រធានាធិបតីសហរដ្ឋអាមេរិកលោក Donald Trump ចាត់វិធានការឆ្ពោះទៅកាន់ការពង្រីកពន្ធគយ រួមទាំងការបន្ថែមពន្ធគយចំនួន១០ភាគរយលើការនាំចូលទំនិញរបស់ចិនដែលចាប់ផ្តើមនៅសប្តាហ៍ក្រោយនេះ អ្នកដែលដឹងរឿងឧស្សាហកម្មនិងពួកអ្នកជំនាញនិយាយថាការបិទចន្លោះប្រហោងនិងរំលងច្បាប់ដែលក្រុមហ៊ុនកំពុងប្រើប្រាស់ដើម្បីបញ្ចៀសពន្ធគយពាណិជ្ជកម្មក៏ជាការសំខាន់មួយដែរ។
ការអនុវត្តមួយដែលកន្លងមកបានជួយក្រុមហ៊ុនមួយចំនួនមកពីប្រទេសចិននិងប្រទេសផ្សេងទៀតដើម្បីបញ្ចៀសការយកពន្ធគយជាដំណើរការនៃការដឹកជញ្ជូនឬការផ្ទេរទំនិញទៅកាន់ប្រទេសទី២ជាទីកន្លែងដែលស្លាកទំនិញផលិតក្នុងប្រទេសចិន ត្រូវប្តូរទៅដាក់ថាជាទំនិញផលិតនៅប្រទេសផ្សេងវិញ។
លោក Berwick Offray ជាម្ចាស់ក្រុមហ៊ុនផលិតបូនៅរដ្ឋ Pennsylvania ភាគឦសានមានបទពិសោធន៍មុនគេជាមួយការអនុវត្តនេះ។ ដោយបានបង្កើតឡើងនៅឆ្នាំ១៩៤៥ ក្រុមហ៊ុននេះមានមោទនភាពខ្លួនលើការសន្យាដើម្បីរក្សាផលិតផលរបស់ខ្លួនធ្វើនៅក្នុងសហរដ្ឋអាមេរិកហើយតួនាទីរបស់ខ្លួនជាក្រុមហ៊ុនផលិតបូដ៏ធំបំផុតមួយនៅក្នុងពិភពលោក។
នៅដើមខែកុម្ភៈ ក្រុមហ៊ុននេះបានប្តឹងក្រុមហ៊ុននាំចូលសហរដ្ឋអាមេរិកមួយចំពោះការទិញបូដែលធ្វើនៅក្នុងប្រទេសចិនដែលត្រូវបានគេដឹកទៅកាន់សហរដ្ឋអាមេរិកតាមរយៈប្រទេសឥណ្ឌាដើម្បីគេចវេសមិនបង់ពន្ធទាំងបំពានច្បាប់។
បូធ្វើនៅក្នុងប្រទេសចិនមានតម្លៃថោកជាងហើយបានលក់នៅក្រោមតម្លៃទីផ្សារនៅក្នុងសហរដ្ឋអាមេរិក។ លោក Berwick Offray ចោទប្រកាន់ថាក្រុមហ៊ុននាំចូលបូសហ រដ្ឋអាមេរិក TriMar បានទិញបូធ្វើនៅក្នុងប្រទេសចិនដែលត្រូវដឹកកាត់តាមប្រទេសឥណ្ឌា។
សេចក្តីជូនដំណឹងដែលបានចេញពីទីភ្នាក់ងារពន្ធគយនិងការពារព្រំដែនសហរដ្ឋអាមេរិកCBP នៅពេលដែលទីភ្នាក់ងារបានយល់ព្រមស៊ើបអង្កេតរឿងក្តីនោះថា«ការចោទប្រកាន់នៅពេលបច្ចុប្បន្ននេះចោទប្រកាន់ថាក្រុមហ៊ុន TriMar បាននាំចូលបូមកពីប្រទេសចិនចូលក្នុងសហរដ្ឋអាមេរិកតាមរយៈការផ្ទេរការដឹកជញ្ជូនពីឥណ្ឌា ហើយមិនបានប្រកាសត្រឹមត្រូវពីប្រទេសដើមដែលបានដឹកចេញនៅពេលនាំចូលនោះទេ។
លោក Daniel Pickard ជាអ្នកជំនាញអំពីពាណិជ្ជកម្មអន្តរជាតិនិងជាមេធាវីនៅឯក្រុមហ៊ុន Buchanan Ingersoll & Rooney ដែលតំណាងឱ្យលោក Berwick Offray និយាយថាមានរឿងក្តីជាច្រើននៃការផ្ទេរការដឹកជញ្ជូន ជាពិសេសនៅពេលដែលគេនិយាយដល់ផលិតផលមកពីប្រទេសចិន៕
