សមាជិករដ្ឋសភាសហរដ្ឋអាមេរិកភាគច្រើនបានបោះឆ្នោតទម្លាក់លោកប្រធានាធិបតី Donald Trump ចេញពីតំណែង ក្នុងរយៈពេលមួយសប្តាហ៍ក្រោយពីមានកុបកម្មដោយហិង្សានៅវិមានសភាសហរដ្ឋអាមេរិកដោយក្រុមអ្នកគាំទ្ររបស់លោក។
រដ្ឋសភាសហរដ្ឋអាមេរិកបានបោះឆ្នោតប្ដឹងទម្លាក់លោកប្រធានាធិបតីចេញពីតំណែង ចំពោះបទ«ញុះញង់ឲ្យមានការធ្វើកុបកម្ម» ដោយសំឡេងឆ្នោតគាំទ្រ២៣២ ទល់នឹង សំឡេងជំទាស់ ១៩៧ ដែលបានចោទប្រកាន់លោក Trump ថា «បានញុះញង់ឲ្យមានអំពើហិង្សាប្រឆាំងនឹងរដ្ឋាភិបាលសហរដ្ឋអាមេរិក»។
លទ្ធភាពនៃការបើកសវនាការលើករណីប្ដឹងទម្លាក់ប្រធានាធិបតីនេះនៅព្រឹទ្ធសភាទំនងជាមិនអាចធ្វើឡើងមុនពេលប្រធានាធិបតីជាប់ឆ្នោតលោក Joe Biden ស្បថចូលកាន់តំណែងនៅថ្ងៃទី២០ ខែមករានោះទេ។ នេះបើយោងតាមការបញ្ជាក់របស់អ្នកនាំពាក្យរបស់មេដឹកនាំគណបក្សសាធារណរដ្ឋនៅព្រឹទ្ធសភាលោក Mitch McConnell។
អ្នកនាំពាក្យរូបនោះបានឲ្យដឹងថា មេដឹកនាំគណបក្សសាធារណរដ្ឋ នឹងមិនយល់ព្រមអនុវត្តសិទ្ធិរបស់លោក ក្នុងការកោះហៅសមាជិកព្រឹទ្ធសភាដើម្បីបើកសវនាការបន្ទាន់នោះទេ។នេះមានន័យថា សមាជិកព្រឹទ្ធសភាសហរដ្ឋអាមេរិក នឹងមិនជួបប្រជុំគ្នាទៀតទេ រហូតដល់ថ្ងៃទី១៩ ខែមករា គឺក្នុងរយៈពេលមួយថ្ងៃមុនពិធីស្បថចូលកាន់តំណែងរបស់លោក Biden មកដល់។
ក៏ប៉ុន្តែ មេដឹកនាំគណបក្សសាធារណរដ្ឋនៅព្រឹទ្ធសភាលោក Mitch McConnell ក៏មិនទាន់ច្រានចោលការបោះឆ្នោតនៅព្រឹទ្ធសភា ដើម្បីចោទប្រកាន់ទម្លាក់លោក Trump ចេញពីតំណែង នៅឡើយដែរ។
នៅក្នុងលិខិតផ្ញើទៅកាន់សមាជិកព្រឹទ្ធសភាខាងគណបក្សសាធារណរដ្ឋ មុនរដ្ឋសភាបោះឆ្នោតសម្រេចដកលោក Trump ចេញពីតំណែង លោក Mitch McConnell បាននិយាយថា លោកមិនទាន់សម្រេចអំពីការប្ដឹងទម្លាក់លោក Trump នៅឡើយទេ។
លោក McConnell បានសរសេរថា៖ «ខណៈសារព័ត៌មានកំពុងផ្សព្វផ្សាយបំប៉ោងព័ត៌មាន ខ្ញុំមិនទាន់បានសម្រេចចិត្តចុងក្រោយទេ ថាតើខ្ញុំត្រូវបោះឆ្នោតយ៉ាងដូច្នេះ ហើយថាតើខ្ញុំគួរតែស្តាប់ការលើកឡើងជាអំណះអំណាងតាមផ្លូវច្បាប់ដែរឬយ៉ាងណា បើសិនជាអំណះអំណាងទាំងនោះត្រូវបានបញ្ជូនមកកាន់ព្រឹទ្ធសភានោះ»៕
