បព្វជិតបែលហ្សិក និងអ្នកស្រាវជ្រាវអ៊ីស្រាអែលផ្ដល់ដង្ហើមឡើងវិញដល់ប្រពៃណីបិតស្រាបុរាណ
វិហារគ្រិស្តសាសនាមួយកន្លែងនៅប្រទេសបែលហ្សិកកំពុងប្រឹងប្រែងដើម្បីផ្ដល់ដង្ហើមឡើងវិញដល់ប្រពៃណីផលិតស្រាបៀរាប់សតវត្សរបស់ខ្លួន បន្ទាប់ពីបានផ្អាកអស់រយៈពេល ២២០ ឆ្នាំមក។ បព្វជិតនៃវិហារគ្រិស្តសាសនា Grimbergen បានប្រើរូបមន្តធ្វើស្រាសម័យបុរាណដើម្បីផលិតស្រាបៀពិសេសនៅក្នុងរោងចក្រស្រាបៀថ្មីរបស់ពួកគេ។ ស្របពេលនោះដែរ អ្នកស្រាវជ្រាវនៅក្នុងប្រទេសអ៊ីស្រាអែលបានធ្វើស្រាបៀដោយប្រើមេស្រាដែលទាញយកចេញពីក្រឡស្រាអាយុកាលរាប់ពាន់ឆ្នាំ ដែលគេរកឃើញតាមរយៈការជីករុករកបុរាណវិទ្យា។ ស្រាបៀគឺជាភេសជ្ជៈចាស់ជាងគេបំផុត និងមានប្រជាប្រិយបំផុតមួយនៅលើពិភពលោក ហើយអ្នកផលិតស្រាបៀបានប្រជែងគ្នាដើម្បីអតិថិជនដោយប្រើវិធីបិតស្រាបៀថ្មី និងគួរឲ្យទាក់ទាញ។ គេឃើញមានចំណាប់អារម្មណ៍កើនឡើងចំពោះការធ្វើស្រាបៀបុរាណ និងចំពោះប្រវត្តិនៃការបិតស្រាបៀ។ អ្នកស្រី Zlatica Hoke នៃ VOA រាយការណ៍អំពីរឿងនេះ ពីរដ្ឋធានីវ៉ាស៊ីនតោន។ លោក ភី សុភាដា ជូនសេចក្ដីប្រែសម្រួល៕
