ជាងចម្លាក់ទឹកកកបង្កើតចម្លាក់ទឹកកកដ៏អស្ចារ្យក្នុងប្រទេសចិន
រៀងរាល់ខែមករា ទីក្រុង Harbin ដ៏ត្រជាក់នៅភាគខាងជើងប្រទេសចិនបានក្លាយជាដែនដីពោរពេញដោយទឹកកកដ៏អស្ចារ្យ ខណៈដែលទីក្រុងនេះធ្វើពិធីបុណ្យទឹកកកនិងព្រិលធំជាងគេបង្អស់នៅលើពិភពលោក។ វាជាទីតាំងដ៏ស័ក្តិសមសម្រាប់ព្រឹត្តិការណ៍នេះ ដោយសារតែទីក្រុង Harbin គឺជាទីក្រុងមួយក្នុងចំណោមទីក្រុងដែលត្រជាក់បំផុតនៅក្នុងប្រទេសចិន។ សីតុណ្ហភាពនៅទីនោះអាចធ្លាក់ទាបខ្លាំងដល់ដក៣៥អង់ហ្សាសេ។ ពិធីបុណ្យប្រចាំឆ្នាំដែលឆ្នាំនេះជាឆ្នាំទី៣៥ហើយដែលទាក់ទាញអ្នកដំណើររាប់លាននាក់ជារៀងរាល់ឆ្នាំមកលេងកំសាន្តនៅទីនេះដូចជាលេងកីឡាលេងកូនគោលលើទឹកកក ប្រកួតប្រជែងរូបថតនិងការពិព័រណ៌ទឹកកកនិងព្រិល។ អ្នកស្រី Deborah Block នៃ VOA រាយការណ៍ថា ការប្រកួតប្រជែងចម្លាក់ទឹកកកនោះ បង្ហាញពីស្នាដៃឆ្លាក់ដោយជាងចម្លាក់មកពីជុំវិញពិភពលោក។ កញ្ញា ស្រេង លក្ខិណា ជូនសេចក្តីប្រែសម្រួល៕
