អគ្គលេខាធិការអង្គការ OPEC ព្រមានថា ការធ្លាក់ចុះឧស្សាហកម្មប្រេងប៉ះពាល់សហគមន៍សាកលលោក
តម្លៃប្រេងបានធ្លាក់ចុះម្តងទៀត បន្ទាប់ពីការឡើងថ្លៃកាលពីពេលថ្មីៗនេះនៅពេលដែលតម្លៃប្រេងបានឡើងដល់ប្រហែល៥៦ដុល្លាក្នុងមួយធុង ដែលជាតម្លៃខ្ពស់បំផុតនៅក្នុងរយៈពេល១៨ខែ។ តម្លៃប្រេងឆៅបានឡើងថ្លៃបន្ទាប់ពីអង្គការ OPEC (អង្គការរបស់ប្រទេសនាំប្រេងចេញទៅក្រៅប្រទេស) បានធ្វើកិច្ចព្រមព្រៀងជាមួយប្រទេសដែលស្ថិតនៅខាងក្រៅអង្គការនេះ ដើម្បីកាត់បន្ថយរួមគ្នានូវទិន្នផលដើម្បីទប់ស្កាត់ការផ្គត់ផ្គង់ច្រើនហួសនៅលើសាកលលោក។ តម្លៃប្រេងបានធ្លាក់ចុះកាលពីថ្ងៃពុធនៅពេលដែលមានសេចក្តីរាយការណ៍ពីការកើនឡើងនៅក្នុងបញ្ជីសារពើភ័ណ្ឌប្រេងឆៅនៅក្នុងសហរដ្ឋអាមេរិក។ មានការព្រួយកង្វល់ថា ការផ្គត់ផ្គង់ប្រេងលើសចំនួន ហើយនឹងប្រាក់ដុល្លារកាន់តែឡើងថ្លៃអាចនាំឲ្យមានការធ្លាក់ចុះតម្លៃប្រេងឆៅម្តងទៀត។ VOA បានធ្វើការពិភាក្សាពីស្ថានភាពប្រេងសាកលលោកជាមួយលោក Mohammad Sanusi Barkindo អគ្គលេខាធិការរបស់អង្គការ OPEC ។ អ្នកស្រី Zlatica Hoke រាយការណ៍អំពីរឿងនេះ។ លោក ជឹង ប៉ូជីន ជូនសេចក្តីប្រែសម្រួល៕
