ამერიკის სახელმწიფო მდივანმა მარკო რუბიომ განაცხადა, რომ მან ხელი მოაწერა დეკლარაციას ისრაელისთვის დაახლოებით 4 მილიარდი დოლარის სამხედრო დახმარების მიწოდების დაჩქარების შესახებ.
განცხადებაში, რომელიც სახელმწიფო დეპარტამენტმა გაავრცელა, ნათქვამია, რომ ტრამპის ადმინისტრაციამ, ისრაელისთვის თითქმის 12 მილიარდი დოლარის ღირებულების უცხოური სამხედრო შესყიდვა დაამტკიცა. განცხადებაში საუბარია იმაზეც, რომ ამერიკა „გააგრძელებს ყველა ხელმისაწვდომი ინსტრუმენტის გამოყენებას ისრაელის უსაფრთხოებისადმი ამერიკის დიდი ხნის ვალდებულების შესასრულებლად, მათ შორის უსაფრთხოების გამოწვევების წინააღმდეგ საბრძოლველადაც“.
რუბიომ თქვა, რომ მან საგანგებო უფლებამოსილება სამხედრო დახმარების მიწოდების დასაჩქარებლად გამოიყენა. ისრაელს ახლა მყიფე ზავი აქვს ამერიკის მიერ ტერორისტულ ორგანიზაციად გამოცხადებულ "ჰამასთან".
პენტაგონმა პარასკევს განაცხადა, რომ სახელმწიფო დეპარტამენტმა ისრაელისთვის თითქმის 3 მილიარდი დოლარის ღირებულების ბომბების და სხვა იარაღის შესაძლო მიყიდვა დაამტკიცა.
სახელმწიფო მდივნის მიერ საგანგებო უფლებამოსილების გამოყენება ამ შემთხვევაში ნიშნავს იმას, რომ ისრაელისთვის დახმარების გაგზავნას კონგრესის თანხმობა არ დასჭირდება. ეს უკვე მეორე შემთხვევაა, როდესაც ამერიკა მსგავსი ტიპს ნაბიჯს დგამს ისრაელის დასახმარებლად. აქამდე ასეთივე გადაწყვეტილება ბაიდენის ადმინისტრაციამაც მიიღო.
