Rundunar Sojan Amurka Tace Rasha Zata Iya Sake Yin Katsalanda A Zabukan Amurka

Jami’an tsaro da na soji sun nuna damuwa game da aniyar Moscow na haddasa rikici da rarraba tsakanin Amurkawa domin ta ga tayi nasara a kan sojan Amurka, wannan karo bada harsashi ba ko kuma muggan makamai amma ta hanyar aikewa da sakonnin Twitter da yada sakwanni ta yanar gizo

A ciki dabarun Rasha, tana kokarin neman inda akwai rikici ko rarraba tsakanin jama’a a Amurka domin ta kara dagula al’amura ta hanyar fadada baza sakwannin raba kan al’ummar.

Game da sojan Amurka, jami’an sojan na yanzu da na da, sun ce akwai yiwuwar manufar Kremlin ce ta samu tasiri a kan sojojin Amurka, ta hanyar aikewa da bayanan karya ga sojojin Amurkan kuma Rasha zata iya sa sojojin sun yanke shawarwarin da ita take so.

Sai dai ba a iya gano matsayin yanda Rasha ta auna jami’an sojan Amurka ba.