WASHINGTON, D. C. - Hakan na zuwa ne yayin da ake ci gaba da gudanar da muhimman tarurruka a yau Talata tsakanin bangarorin yankin a babban birnin kasar Egypt.
Ana ci gaba da tattaunawar ko da yake har yanzu Isra'ila ta tsananta kai hare-hare a kudancin Gaza a garin Rafah, inda Falasdinawa miliyan 1 da dubu 400 suka tsere don neman mafaka daga fada a wasu wurare.
Jami'an kiwon lafiya na kasar Isra'ila sun bayyana cewa, an kubutar da wasu fursunoni biyu da aka yi garkuwa da su da aka kai wani mummunan harin amma kuma a garin da ke kan iyaka da Masar, harin ya yi sanadin mutuwar Falasdinawa akalla 74.
Yarjejeniyar za ta bai wa mutanen Gaza jinkirin da suke bukata daga yakin, wanda yanzu a cikin wata na biyar, da kuma ba da 'yanci ga akalla wasu mutane 100 da ake tsare da su a Gaza. A yayin da ake ci gaba da gwabzawa, kokarin da Qatar, Amurka da Masar suka shiga na ganin an cimma matsaya ya ci tura, sakamakon sabanin ra'ayi na Hamas da Isra'ila.
Yakin ya yi barna mara misaltuwa a zirin Gaza, inda aka kashe sama da mutane 28,000, sama da kaso 70 cikin dari na mata da kananan yara, a cewar jami’an kiwon lafiya na yankin.
Rikicin na Isra'ila ya lalata yankuna da dama, kusan kaso 80 cikin dari na al'ummar kasar sun rasa matsugunansu kuma bala'in jin kai ya jefa sama da kashi daya bisa hudu na Falasdinawa a Gaza ga yunwa.
Firai Ministan Isra'ila Benjamin Netanyahu dai ya sha alwashin ci gaba har sai an samu "cikakkiyar nasara," kuma ya dage cewa matsananciyar matsin lamba na karfin soja zai tabbatar da 'yancin 'yan garkuwar, ra'ayin da abokansa suka ce aikin ceton ne ya karfafa shi.
-AP
Dandalin Mu Tattauna