Amurka Na Shirin Haramta Tufafin Da China Ta Yi Da Gumin Tsiraru

Jaridar New York Times ta bayyana cewa gwamnatin shugaban Amurka Donald Trump na kokarin kakaba takunkumi kan dukkanin abubuwan da aka sarrafa da audugar yankin Xinjiang na kasar China, a dai dai lokacin da ake samun rahotanni masu zargin cewa ana tilasta wa mutane yin ayyukan da suka keta hakkin dan adam a yankin Xinjiang na China.

Jaridar ta ce, mutum uku wadanda suke da masaniya kan lamarin ne suka bayyana hakan kuma za a fara aiwatar da wannan takunkumin ne a yau.

Dama dai a baya an sha samun rahotanni masu nuna yadda mutane a Xinjiang, musamman ma al'ummar Musulmin Uighur ke fuskantar muzgunawa da kuma yadda ake sa su ayyukan da basu dace ba.