Joe Biden fiton Nevadën
Shteti i Nevadës i ka kaluar demokratit Joe Biden, i cili më herët të shtunën u shpall fitues i zgjedhjeve presidenciale 2020, menjëherë pasi u bë e qartë se ai kishte fituar Pensilvaninë me 20 vota elektorale. Ai ka tani një numër të përgjithshëm prej 279 votash elektorale.
Trump, padi zgjedhore në Arizona
Ekipi i presidentit republikan Donald Trump tha të shtunën se kishte ngritur padi në Arizona, në të cilëmn pretendon se qarku më i populluar i këtij shteti jugperëndimor skualifikoi në mënyrë të gabuar një numër votash të hedhura ditën e zgjedhjeve nga disa votues.
Në padinë, e ngritur në Gjykatën e Lartë shtetërore të Qarkut Marikopa, thuhet se punonjësit e zgjedhjeve u kishin thënë disa votuesve të shtypnin një buton, pasi një makinë kishte zbuluar një votë të tepërt.
Paditësit thonë se ditën e zgjedhjeve janë përdorur makineri të reja votimi dhe se ato vota mund të kenë qenë "përcaktuese" në rezultatin e garës Trump-Biden, i cili u shpall fitues të shtunën nga rrjetet e mëdha televizive.
Biden kryeson me 0.65%, ose pak më shumë se me 21,000 vota në shtetin Arizona.
Joe Biden merr urime nga udhëheqës evropianë dhe të NATO-s
Udhëheqës evropianë dhe ata të NATO-s përgëzuan kandidatin demokrat Joe Biden për fitoren në zgjedhjet presidenciale.
Shefi i politikës së Jashtme të Bashkimit Evropian, Josep Borrell, e cilësoi ditë të shkëlqyeshme për Shtetet e Bashkuara dhe Evropën.
Sekretari i Përgjithshëm i NATO-s, Jens Stoltenberg tha se zoti Biden është mbështetës i fuqishëm i NATO-s dhe marrëdhënieve transatlantike.
Kancelarja gjermane, Angela Merkel, duke uruar zotin Biden tha se mezi pret të punojë me të.
Kryeministri britanik Boris Johnson përgëzoi zoti Biden dhe zonjën Harris për "arritjen e tyre historike".
Presidenti francez Emmanuel Macron, tha se "kemi shumë për të bërë për të kapërcyer sfidat e sotme. Le të punojmë së bashku"! shkroi ai.
Dëshira të ngjashme shprehën edhe udhëheqës të shumë vendeve evropiane.