BULAWAYO — 

Abanye abantu kwele Zimbabwe bathi bayalulandela kakhulu ukhetho lweMelika lobanje kukhanya engani kalusoze luguqule impilo kazulu.

Bakhona abancoma indlela ukhetho lweMelika olulungiselelwa ngayo kubekhona njalo abanye abakuchothozayo besithi kuyaxokozela okumangalisayo kukhetho lolu.

UMnu. Effort Ncube, olandela ezombangazwe, uthi luqakathekile ukhetho lweMelika.

“Ukhetho lwe Melika luqakatheke kakhulu empilweni yabantu beZimbabwe lasemhlabeni wonke jikelele. Lilizwe elilamandla elincedisa kwezomnotho kanti ke nxa ulobudlelwano obuhle lalo impilo ijayele ukuba nhle nxa ungela budlelwano labo ijayele ukuba mbi, ibenzima ebantwini bakulelo lizwe. Kodwa nxa singadlulisela kwaba seMelika sibukele kuyadonselwana ngendlela esingazange sayibona phambilini kodwa asithembeni ukuthi kuzaphuma okuqondileyo kuhlonitshwe okuyabe kuyisinqumo sabantu kungakhathalekile ukuthi kuqonde ngaphi.”

UMnu. Mbuso Fuzwayo, owenhlanganiso yeIbhetshu Likazulu, uthakazelela ukuthi amabandla aphikisayo akhankasa emphakathini njengebandla elibusayo.

“Sibona inhlangothi ezincintisayo zonke bezikhankasa ngokufanayo kungela oncidezela omunye. Wonke umuntu ubekhuluma abona kungamnikeza usekelo okungafani lesikubonayo kusenzakala lapha ekhaya ukubana abaphikisayo bayavalelwa imihlangano kuyatshaywa ksetshenziswa ingatsha zikahulumende ukuncindezela. Sibona lomongameli ekhonona ukuthi engadliwa uzakuya emthethwandaba lapha okungumehluko ngoba umthethwandaba uyabe uphethwe ngobusayo.”

UMnu. Believe Gaule, owebandla leZANU PF, uthi umkhuhlane weCOVID-19 ungamlahla phansi uMongameli Donald Trump.

“Engikukhangeleyo yikuthi besengikubonile ukuthi abantu bebengasamfuni wehlulekile ukubamba indaba eyeCOVID-19. Yenze abantu bacina bambona eyisehluleki. So, ngibona engani abantu bafuna utshintsho. Nxa sikhangela singaphandle sesibona ukuthi kuncedisile ukuthi uBiden akhanye engumuntu ongatholanga abangamphikisa kube lula kakhulu ukuthi anganqoba kukhetho lolu.”

UMnu. Felix Mafa, umsekeli wesikhulumeli sebandla leMovement for Democratic Change ekhokhelwa nguMnu. Nelson Chamisa, uthi ukuphumelela kokhetho kusezandleni zabantu bakwele Melika.

“Ama elections eAmerica azaba yisiboniso ukuthi amazwe onke bawahambisa njani. Khathesi sibona engani iAmerica silahleka ngoba bengafuni abantu abamnyama singazi ukuthi sekusiba yiRussia yini ngakho yikho sisithi sebelahleka. Thina sifuna ukuthi konke okwenzakalayo kube semthethweni kungabi lobandlululo. Abantu bakhethe abakufunayo.”

Bakhona abanye abathi ukhetho lolu kalusoze luguqule lutho eZimbabwe. Omunye wabalombono lo nguMnu. Everton Nyoni, ohlala koBulawayo.

“Nxa sikhangele indaba zokhetho lezi ngibona engani akutsho okukhulu ngamanye amazwe. Amanye amazwe angabe ekhangelele ukuthi mhlawumbe kube lalo umongameli kodwa siyakwazi ukuthi okuvele kuhlose yiAmerica kuyafanana, ngoba singakhangela ukuthi wonke umongameli ongenayo ulezakhe izimpi ayabe ezazikhwezela. Okufana lokuthi injongo yeMelika ihlala ivele ifana akula kuthi kungene wuphi umongameli sekuzaba lenguquko. Inguquko ibakhona kibo phakathi empilweni zabantu beMelika kodwa-ke kwamanye amazwe akula lutho ngoba imithetho yeMelika ayitshintshi loba kungaze kungene umongameli omutsha.”

Umhlaba wonke jikelele umelele ukubona okuzaphuma kukhetho lolu.

Abantu abafika phose izigidi ezilikhulu – 91,6 million sebevotile kukhetho lweMelika oluzakwenziwa ngoLwesibili.

Abavotayo basebenzisa iposo, amabhokisi okuvotela lokuya endaweni zokuvotela. Zinengi izabelo ezivumela abantu akuthi bavote kusetshenziswa indlela lezi.

Abancintisa kukhetho lolu, uMongameli Donald Trump lowayengumsekeli kamongameli uMnu Joe Biden bakhangelelwe ukuthi bazaphetha ukukhankasa ngoMvulo.

Banengi abadabuka eZimbabwe asebevotile. Omunye wabo nguNkosikazi Priscilla Ndlovu, ohlala eSeattle, esabelweni seWashington State.

Uthi kulabantu abesaba ukuthi amavoti abo angalahlwa nxa bengaphuza ukuwafaka kuposo ngakho-ke sebecabanga ukuyavota ngoLwesibili.

UNkosikazi Ndlovu uthi sebencedisa abangakavoti endaweni ezinengi.

UMnu. Dan Moyo, ungcinisihlalo webandla leMovement for Democratic Change kwele Melika elikhokhelwa nguNkosazana Thokozani Khupe, laye usevotile.

UMoyo uphinde wathi kuvotwa kahle kukhetho lolu ezabelweni ezitshiyeneyo.

Kulezabelo ezigoqele iPennyslyvania, Wisconsin, Florida, Michigan, North Carolina lezinye okukhanya kuyizo okumele uTrump loBiden benqobe nxa befisa ukuthi bangene esikhundleni sikamongameli.

MARYLAND — 

Owayengumsekeli kamongameli wakwele Melika, uMnu. Joe Biden, uncintisa kukhetho lukamongameli oluzakwenziwa ngoLwezi lonyaka. Lokhu ngokwesithathu ukuthi azame ukubangumongameli wakwele Melika. Okwamanje usekhethwe libandla lama Democrats ukuthi ancintise kukhetho lolu.

Enganqoba kukhetho lolu, uBiden uzaba ngumongameli wamatshumi amane lesithupha – 46 wakwele Melika. Uzabeseleminyanga engamatshumi ayisikhombisa lasitshiyangalombili – 78. UTrump okwamanje uleminyaka engamatshumi ayisikhombisa lane – 74.

UBiden uthi ufisa ukususa embusweni umbuso “wobugelekeqe” okaTrump. “Lapha silwela inhliziyo yeMelika,” utsho lokhu uBiden ebulenjini beInternet ekhasini lakhe. Ugcizelela esithi, “kumele sikhumbule ukuthi singobani. Siyizizalwane zeMeliika, sizimisele, siqinile njalo sihlala silethemba lokwenza konke okutshiyeneyo. Sifuna kubelezisebenzi ezisebenza kahle, Sifisa ukuvimba ubugelekeqe bombuso lo esiwubonayo. Kumele sizihlole sinanzelela ukuthi kulempilo enhle phambili.”

UBiden uthi uTrump kafanelanga ukubuso ilizwe leMelika. “Sokuyisikhathi ukuthi sibelomkhokheli ohloniphekayo ekhaya lemazweni.”

Ukukhankasa kwakhe akufani leminye iminyaka ngenxa yeCOVID-19. Ukhankasa esendlini yakhe hatshi ukuthi angene emphakathini okumemetheka khona umkhuhlane weCoronavirus. Ukhankasa esendlini yakhe eDelaware ahambahambe endaweni ezibalisa iWilmington Philadelphia, Pennsylvania lezinye.

Impilo lakutholayo: UBiden wathi eqeda izifundo zakhe eUniversity of Delaware Syracuse Law School eleminyaka engamatshumi amabili lasitshiyagalolunye, wangena kudale leSenate. Kazange akholise kangako ngoba wafelwa ngumkakhe, uNeilia, lengane yakhe, uNaomi, engozini yomgwaqo ngesikhathi sekhefu leKhisimusi. Wacabanga ukutshiya umsebenzi ukwenzela ukuthi agcine abantwana bakhe ababili. Kodwa wacina ephume lecebo lokuthi uzagada isitimela nsukuzonke okwamahola phose amabili esuka eWashington DC esiya endlini yakhe eDelaware. Wenza lokhu okweminyaka engamatshumi amathathu lesithupha – 36.

Wathandana loJill Jacobs Tracy, owayebalela ukuba ngumbalisi, batshada bathola intombazana. Wangena kukhetho lukamongameli ekubandla lama Democrats ngomnyaka ka1987 lo2007 kodwa katholanga usekelo olugcweleyo. Wathi esephumile ukukhankasela ukuba akhethwe ngama Democrats ukuthi angene kukhetho ngomnyaka ka2007, uMnu. Barack Obama wamkhetha ukuthi abengumsekeli wakhe kukhetho olwenziwa ngoLwezi. Banqoba kukhetho lolu wabangumsekelo kaObama. Baphinda banqoba ngomnyaka ka2012.

Ukudlelana Lamanye Amazwe: Wathi esedale leSenate, uBiden wayekukhomithi ebona ngokudlelana lamanye amazwe eyeForeign Relations Committee, acina eyikhokhela. Waphikisa kakhulu ukuthi kuhanjiswe ibutho empini yePersian Gulf War ngomnyaka ka1991 wavotela ukuthi ibutho lihlasele ilizwe leIraq ngomnyaka ka2003. Wakhankasela ukuthi ilizwe leMelika leNATO inkenele empini yomvukela eBosnia ngomnyaka ka1994. Wathi engumsekeli kaObama waloba inhlelo zokudlelana lelizwe leIraq, okugoqela ukuthi ibutho leMelika lisuke elizweni leIraq. Wasekela njalo ukuthi inhlanganiso yeNATO ingenele empini yomvukela kwele Lybia ngomnyaka ka2011.

UBiden esedale leSenate wancedisa ukwenziwa kwemithetho enjengengowokuvikela uzulu ezikhalini ezinjengemibhobho owasebenza okweminyaka elitshumi kwaze kwafika umnyaka ka2004. Wasekela njalo ukuthi kubelemithetho eqinileyo yokuvimba ubudlova eMelika. Kodwa okwamanje uthi imithetho enje yenza ukuthi kubotshwe kakhulu abantu abansundu. Uthi umthetho obizwa ngokuthi yiViolence Against Women Act ngeminye yaleyo azitshaya isifuba esithi kuveza ukuba wazebenza kakhulu ukuthi abesifazane bahlonitshwe. Kodwa-ke kulabanye abamchothoza ngedlela aphatha ngayo udaba kula Clarence Thomas, owayekhankasela ukuba angene kudale leSupreme Court ngomnyaka ka1991. Ngesikhathi leso, uNkosazana Anita Hill, owayesebenza loClarence, wathi wamdlwengula ngesikhathi besemsebenzini. UHill wathi ekhuluma ngodaba lolu kukhomithi ye Senate Judiciary Committee, uBiden kazange amlamulele ngokuthi kubelabantu abanengi okwakumele bethule ubufakazi ngodaba lolu edale leli. UClarance wacina engena kudale leSupreme Court kwathi-ke nyakenye uBiden wafonela uHill exolisa ngokwenzakalayo. UHill uthi wakwemukela kancane okwakhuunywa nguBiden.
Okungenzakala: Umbuso kaBiden ulakho ukuba njengoka Obama, ikakhulu ekukhuthazeni ukulinganiswa kwamathuba abansundu labamhlophe lamalungelo abasifazana, ukudlelana lamanye amazwe kanye lokuvimba ukukhudumala komkhathi. UTrump wadiliza konke lokhu okwenziwa nguObama esithi kululaza eleMelika.

MARYLAND — 

UMongameli Donald J. Trump, ongumongameli wamatshumi amane lanhlanu kwele Melika, ongumongameli wesithathu ukuma phambi komthethwandaba {impeachment} kodwa wadedelwa, ukhankasela ukhetho lukamongameli oluzakwenziwa ngoLwezi.

UMnu. Donald J.Trump usungule umkhankaso wokhetho okusemthethweni ngoNhlangula 2019 eOrlando, Florida, lapho ethula khona isihloko sakhe sokukhankasa esithi “Keep America Great,“ kulandela uhlelo lwakhe luka2016 oluthi “Make America Great Again.”

Lapha-ke uthe, “Sinqobile kuqala, lakhathesi sizanqoba, sihle sigqibe umsebenzi.”

Okumqoka NgoTrump: Engakabi ngumongameli, wayengusomabhizimisi ophakeme, owayebona ngezokuthenga lokuthengiswa kwezindlu eNew York, njalo engumlingisi omkhulu kumabonakude. Ngemva kokuthola isicoco semfundo eWharton School of Finance eUniversity of Pennsylvania, wahle wangena kubhizimisi yezindlu eyayingeyemuli yakwabo, wayiqhelisa ngokwengeza amahotela amacasino lenkundla zegolf emhlabeni wonke jikelele.

Kanenginengi, uTrump waphephela ekuceleni uncedo lwemali kuhulumende ngoba amabhizimizi akhe asendaweni yeAtlantic City lase New York ayengenzi kahle. Noma kunjalo, wasebenza ngokuzikhandla, ngo2016 abezomnotho bafanisa ukuthi wayeyisikhulu esilinganiswa ukuthi ulemali efika $3.7 billion. Ngomnyaka ka2004, uTrump wazakala kakhulu kwezemidlalo, ngokulingisa kumabonakude emdlalweno okuthiwa “The Apprentice,” eyathakazelelwa kakhulu kuNBC. Watshiya lapha ngo2015 eseqala ukukhankasela ukuba ngumongameli welizwe.

Ubukhokheli buka Mnu. Trump: Eminyakeni emithathu lengxenye engumongameli, uTrump ubumbe umthetho oqakathekileyo wemithelo kahulumende owe-tax , wakhupha amanye amabutho ase Syria, wabuye wanqoba ekukhethweni kwabakhokheli bezenkantolo enkulu elizweni lonke. Abakhethwayo nguNeil Gorsuch loBrett Kavanaugh abathatha izikhundla ezazivulekile kunkantolo enkulu. Waphinda wanqoba ekukhetheni abanye abehluli abangamakhulu amabili kunkantolo eziphansi. Ukukhethwa kuka Kavanaugh kwadala ukuxokozela okukhulu sekukhangelwa indlela ayenatha okudakayo ngayo esakhula kunye lokudlwengulwa kwabomama ayekwetheswa. Wacina ephumelela ngentutshana ukuze angene kunkantolo enkulu elizweni.

UTrump usebenze kakhulu ekuhluzeni uhlelo lwabantu bokuza olweImmigration, waphinda wanqoba kumpikiswano yokwakha umduli obiza amadola eAmerica ayi $3.6 billion. Umongameli ugcwalise izithembiso zakhe azenza ekhankasela ukhetho okuhlanganisela ukukhipha ezinye inhlelo zikahulumende ezinjenge Affordable Health Care eyaziwa ngokuthi yiObamacare lobanje izigidi zabantu bakwele Melika belahlekelwe yimisebenzi lenhlolo zokwelatshwa ngenxa ye-coronavirus. UTrump waya enkantolo enkulu elwisana lokwesulwa kweObamacare ngokugcweleyo. Utshengiselele kakhulu ukungathokozeleli izinqumo zombuso ezenziwa nguObama, indlela zakhe zokubusa engumuntu omnyama wakuqala ukuba ngumongameli kuleli.

Okweminyaka emithathu uTrump ukhuphule umnotho welizwe, wehlisa inani labangasebenziyo laya kusilinganiso se3.5%, esiphansi kakhulu kuminyaka engamakhulu amahlanu kulelilizwe lomnotho omkhulu umhlaba wonke jikelele, unkambo wemali waqonga ngendlela ephezulu. Kodwa konke lokhu kukhukhulwe ngumkhuhlane ohlasele ilizwe, oqalise kwele China osutshaye wabhuqa umhlaba wonke kusukela ekuqaleni kuka 2020, lapho umongameli ubewudelela lomkhuhlane ethi uzodlula kanti qha.

Ekupheleni kukuNhlolanja, uTrump waphuma kanenginengi emsakazweni esithi, ”Uzanyamalala. Langa linye njengesilingo, uzanyamalala.”

Kodwa-ke igciwane lecoronavirus selimemetheke ilizwe lonke ikakhulu ezabelweni ezingamatshumi amahlanu – 50. Umkhuhlane lo uletha ukungahlaliseki elizweni. Ngesikhatshana nje umnotho welizwe wahlukuluzeka, izisebenzi ezedlula izigidi ezingamatshumi amane lasitshiyangalombili – 48 million zalahlekelwa yimisebenzi - okuyisilinganiso esiyingxenye yengxenye (quarter) lezisebenzi zeAmerica - osibalukhulu bezigaba zelizwe bakhupha umbiko wokuthi amabhizimisi lezikolo kumele kuvalwe abantu bahlale ngekhaya. Bathi lokhu kwenzelwa ukuvimba ukumemetheka kwegciwane lecoronavirus. Abafundi sebefunda ebulenjini bengekhaya. Imidlalo yokuzilibazisa kanye leqeqetshileyo yamiswa, ngapha izibhedlela zamisa ukwelatshwa okungaqakathekanga kanye lokunhlizwa okungama, izindlu zokudlela zavalwa, abantu bevunyelwa ukuthenga ebulenjini besebezothatha ukudla kwabo.

Okwamaviki ambalwa, uTrump wayenika imibiko ngegciwane lecorronavirus nsukuzonke elokhu elithathalula ngoba esesaba ukuthi ukuvuma ukuzika kwalo kwakungahle kuphambanise ukukhethwa kwakhe kukhetho olukhulu oluzayo lonyaka kuLwezi. Wayelokhu ethembisa ukuthi umuthi waleligciwane wawuzatholakala kungekude lobanje ingcwethi zempilakahle zazigcizelela ukuthi lokhu ngeke kubekhona kuze kube ngumnyaka ozayo. Okwesikhathi eside uTrump wakhuthaza ukuthi abantu banathe iphilisi lemalaria elibizwa ngokuthi yi-hydroxychloroquine esithi liyelapha abalegciwane lecoronavirus. Watsho ukuthi yena uyalinatha. Kodwa ingcwethi kwezempilakahle emazweni amanengi zathi alisebenzi, laye-ke umongameli wacina ukukhuluma ngalo. Kokunye, izizalwane zeMelika zabamba owangaphansi aze athi ukunanatha izinto eziyitshefu ezinjenge bleach kungabulala igciwane leli. Loba ingcwethi zempilakahle zaqonqosela uzulu ukuthi aagqoke ama-masks ukuvikela ukumemetheka kwegciwane, uTrump wakutshaya indiva lokhu ethi yena ngeke akwenze lokho, weyisa labo abawaqgokayo.

Kancane kancane okwamaviki athize, inani lababhubha ngegciwane leli laqonga ledlula ikhulu lamatshumi amathathu enkulungwani kwele America kubanga ingxenye yomnyaka , kuthi abalengciwane baba yizigidi ezintathu , okulinani eledlula wonke amazwe emhlabeni. Ingcwethi zibhula ukuthi itshumo lenkulungwane zabantu khona zizabhubha ngaleligciwane kwele America kunyanga ezilandelayo. Ngesikhathi inani lababanjwa yileligciwana liqansa enyakatho yelizwe leAmerica, kwabalokumemetheka okutsha ningizimu yelizwe lapho osibalukhulu balezizigaba baphanga ukuvula indawo lapho uzulu ahlangana khona , babuye bavala ngokutshetsha indawo ezinjengamabhawa lamabhizimisi.

Inani labangelamsebenzi eMelika likhuphuke laba kusilinganiso setshumi lane elilengxenye ekhulwini ngoMabasa kodwa lehla laba kutshumi lanye lokukodwa ekhulwini ngoNhlangula lapho umnotho welizwe wengenaz imisebsnzi eyizigidi ezinhlanu. UTrump egida eziqakezela , wathembisa ukuthi insuku ezingcozo sezisondele kusiya ngomnyaka ozayo.

Ngesikhathi umbhuqazwe lo uhlasela iMelika , uMongameli Trump wabhekana labantu ababetshengisela ngemva kokubulawa komuntu osundu, owesilisa ngoNkwenkwezi 25, uGeorge Flyod, owabandezelwa phansi eMinneapolis ngamapholisa amhlophe waze wabhubha ecela ukudedelwa aphefumule. Loba uTrump wathi uyasekela lokhu kutshengisela, wamangalisa inengi ngokuthi umutsho othi “Black Lives Matter “ utshengisa inzondo ngomhlobo. Wasekela omunye walandeli bakhe owakhupha umbiko othi “Amandla Kwabamhlophe” kodwa watshetshe wawukhupha kubulembu beTwitter ngemva kokuchothozwa okubanzi, ngapho osebenzela umongameli laye esithi kakuzwanga lokho. Ngesikhathi abeMelika bejabulela uzibuse wamakhulu amabili lambili zine kuNtulikazi, umongameli wathi laba abatshengiselayo batshengisa ukuthi balomoya omubi, wathi bamela uhulumende wochukuodinga ukubhidlisa ilizwe leMelika.

Kungxenye yokuqala kumnyaka ka2020 umbusazwe kaTrump wakhanya uxega ngoba lapho okwabonakala khona esedlulwa nguMnu. Joe Biden ekuthandweni ngabantu ngesilinganiso esilitshiyangalolunye ekhulwini, sekusele inyanga ezine ukuthi kube lokhetho luka hulumende kuleli. Kulabo mongameli ababili abangenelisanga ukunqoba kukhetho lwesibili kuminyaka engamatshumi amane, kukanti njalo abalandeli bakhe bathi wayengemuva kukhetho olwadlulayo ngo2016 lapho anqoba khona uNkosikazi Hillary Clinton kungananzelelwe.

Ubudlelwano lamanye amazwe; Umongameli Trump wazakala kakhulu ngesisekelo sombuso wakhe esithi “America First”, lapho athi ufaka izizalwane zeMelika kuqala kulezamanye amazwe. Waphuma kwezinye izivumelwane lamanye amazwe ezinjenge Trans-Pacific Partnership, iParis Climate Agreement kunye leIran Nuclear Deal. Kwezokuthengiselana uMongameli Trump, wagcwalisa isithembiso asenza ekhankasa esokuvuselela ingxoxo yeNorth American Free Trade Agreement lamazwe abalisa iCanada leMexico ngapha ehlomisa ezempi leChina. Wake wathoniswa edale leCongress, okwamenza abengomunye wabakhokheli belizwe leMelika ababhekana lalokhu okubizwa ngokuthi yi-Impeachment. Uqale umkhankaso wakhe eFlorida olesihloko esithi “Keep America Great”. Wathi ekhankasa ngomnyaka ka2016 wayesebenzisa isihloko esithi “Make America Great Again”.

WASHINGTON — 

Sokuvote izigidi lezigidi zabantu kukhetho lokudinga umongameli weMelika phambilini kwelanga elibekelwe lumsebenzi ngoLwesibli oluzayo. Abancintisana kulokukhetho ngumongameli Donald Trump webandla lamaRepublicans kanye loMnu. Joe Biden owelama Democrats, labanye.

Kulabanye abavota mathupha besendaweni zokuvotela, labanye abathumela incwadi njalo ingcwethi zithi kulokunye okuhle lokungakhwabithekiyo ngaloluhlelo.

Ingcwethi zithi amavoti edlula isigidi alakho okungemukelwa ngoba kulendlela okufanele amaphetshana okwenza lokhu agcwaliswe ngayo njalo afike ngesikhathi esithile.

Umzekeliso walokhu nguMnu. Tom Moore owe Woodbridge e Virginia, otshele umsakazo we Voice of America ukuthi uthole incwadi imazisa ukuthi iphetshana lakhe avote ngalo belingagcwaliswanga kuhle ngoba engalisayinanga.

Uthi ucabange ukuthi kungcono ayevota mathupha kulokuzama ukulungisa leliphepha, okutsho ukuthi banengi abadibana laloluhlupho.